„Нема ретерирање, Законот за пушење не се одложува и ќе се донесе!“, децидни се од Министерството за здравство, откако во јавноста се отвори прашањето за тоа што точно значи неговата „фазна имплементација“ во пракса и дали на угостителите и на граѓаните ќе им се даде време од една година за адаптација. Од Министерството за Канал 5 велат дека тоа што не сакаат веднаш, уште од 1 ви март или кога законот ќе го мине „собранискиот филтер“ да има казни нема да значи дека се повлекуваат од идејата за проевропски закон за заштита од пушење, кој во својот предлог текст вклучува воопшто да не се пуши, ниту тутун ниту електронски цигари во затворено, ама и надвор пред врата на институции, фирми, болници и автобуски постојки.

„Законот за заштита од пушење не се одложува. Министерството е целосно посветено на негово донесување во најкраток можен рок. Законот ќе стапи на сила согласно законските рокови. Во почетната фаза фокусот ќе биде на информирање, надзор и опомени, пред изрекување казни. Во однос на „фазната имплементација“, тоа не значи одложување ниту едногодишен преоден период.“

По реакциите дека основите на предлог-законот се земени од земји каде многу мал дел од населението се пушачи на цигари, или од такви кои никогаш не произведувале тутун, од Министерството појаснуваат дека текстот не е финализиран, туку по анализата на коментарите од јавната расправа и институционалното усогласување, ќе се дефинира и како таков ќе биде доставен до Владата и потоа во собраниска процедура.

„Нашата цел не е казнување, туку заштита на здравјето. Сакаме јасни правила што ќе важат еднакво за сите и ќе обезбедат чист воздух за граѓаните и работниците.

Суштината на законот не се менува. Целта е јасна: заштита од пасивно пушење во затворени јавни и работни простории и спречување на започнување со пушење кај младите.“

Со новиот предлог-закон се забранува пушење во сите затворени угостителски објекти, кафеани, барови, фирми, а освен пред училишта, градинки и болници, цигара нема да смеете да запалите и на автобуски и железнички станици, пазари, а и пред театар и спортски објект. Во присуство на дете, забрана за цигари и тутунски апарати ќе има и во автомобил. Казните за граѓаните ќе се движат од 150-300 евра, а за фирмите до 5.000 евра, но на почеток, дали поради адаптација или поради што нема кој да казнува, нема да има силна контрола.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.