Во тензична атмосфера, исполнета со меѓусебни напади и обвинувања кои на момент преминуваа на лична основа, помина седницата на комисијата за надворешна политика каде единствена точка на дневен ред беше отчетот на шефот на дипломатијата Никола Димитров за евроинтегративните процеси на земјава.
Во долгиот, 1,5 часовен говор пред комисијата, Димитров даде екстензивен историјат за надворешната политика на земјава од осамостојувањето до денес и кажа дека членството на земјава во ЕУ е посебен случај, а многу работи се промениле од кандидатскиот статус на Македонија пред 15 години. Порача дека треба да се затворат сите дополнителни прашања како законот со јавното обвинителство и додаде дека се обиделе да вметнат клаузули во законот во Преспанскиот договор кои ќе важат со отворањето на секое поглавје за членство во ЕУ. Тоа пак наиде на жестоки реакции од пратеникот Илија Димовски, кој кажа дека целта на Преспанскиот договор не е остварена, а земјава не е поблиску до членство во ЕУ.
На седницата, пратениците наместо за надворешната политика на земјава и евроинтегративните процеси, често пати излегуваа од темата, па така се разговараше за судскиот систем, состојбите во МНР и ситуацијата која Димитров ја наследил откако дошол на функцијата, а обвинувањата на релација власт- опозиција продолжија и за извештаите од Европската комисија за Македонија во изминатите години.