Милиони работници на улиците во потрага по права: Меѓународниот ден на трудот се слави секаде - Канал 5

Свет

Милиони работници на улиците во потрага по права: Меѓународниот ден на трудот се слави секаде

-Меѓународниот ден на трудот се слави низ целиот свет.

Милиони работници на улиците во потрага по права: Меѓународниот ден на трудот се слави секаде

Илјадници луѓе денеска излегоа на улиците на Токио со звуците на традиционалните тапани за да го прослават Први мај, Меѓународниот ден на трудот, што денес се слави низ целиот свет од Токио до Лос Анџелес.

Овој празник ги одбележува борбите и достигнувањата на работниците и работничкото движење.

Се очекува илјадници луѓе да учествуваат на протестните маршеви низ САД, вклучително и во Чикаго, Лос Анџелес, Њујорк и Филаделфија.

Во јапонската престолнина, Токио, Јунко Курамочи, членка на група мајки кои излегоа на улиците на Токио, рече дека правата на работниците мора да бидат признати за да можат нивните деца да живеат со надеж.

Американските организатори рекоа дека нивната порака оваа година е за борба против антиимигрантските и антидиверзитетските политики на американскиот претседател Доналд Трамп.

Градежниот работник Тадаши Ито, рече дека е загрижен за можното зголемување на цената на увезените суровини во наредните месеци.

„Сите се борат за работа, па затоа договорите имаат тенденција да одат таму каде што платите се најниски“, рече тој, додавајќи дека работниците во Јапонија мислат дека мирот е на прво место и се надеваат дека Трамп ќе ги искорени конфликтите и нееднаквоста.

Во Индонезија, претседателот Прабово Субианто ги поздрави илјадниците работници кои се собраа во Националниот парк во Џакарта.

„Владата што ја водам ќе работи што е можно понапорно за да ја елиминира сиромаштијата во Индонезија“, им рече Субианто на насобраните.

Се очекува околу 200.000 индонезиски работници да учествуваат во маршевите за Први мај во земјата, најголемата економија во Југоисточна Азија, рече претседателот на Конфедерацијата на индонезиски синдикати, Саид Икбал.

Тие бараат зголемување на платите и заштита на домашните работници и работниците имигранти во странство.

Во Тајван, околу 2.500 членови на синдикатот кои претставуваат повеќе сектори, од рибарство до телекомуникации, излегоа на улиците на главниот град Тајпеј, носејќи знамиња и барајќи подобри услови за работа.

Во Јапонија, барањата на учесниците на маршот се движат од повисоки плати, родова еднаквост, здравствена заштита, до намалување на воените трошоци и помош за жртвите од земјотресот. Тие, исто така, побараа прекин на огнот во Газа и крај на руската инвазија на Украина.

„Работници од целиот свет обединете се. Први мај“, скандираа толпата во Јапонија.

Се очекува еден од најголемите собири за Меѓународниот ден на трудот оваа година во Лос Анџелес, а транспарентот во тој град концизно ја пренесе денешната порака: „Една борба, една битка, работниците обединете се“.

„Ја носиме борбата против милијардерите и политичарите кои се обидуваат да нè поделат со страв и лаги. Ја знаеме вистината, нападот врз работниците имигранти е напад врз сите работници“, изјави Ејприл Верет, претседател на Меѓународниот синдикат на работници во служба, кој претставува два милиони работници.

Повеќе од 150 членови на левичарски партии, синдикати и младински организации беа приведени во рации во домовите во вторник и среда во големите градови, вклучувајќи ги Истанбул, Анкара и Измир, пред демонстрациите за Први мај, објавија турските медиуми.

Една од причините за полициските операции во Истанбул е тоа што работниците и младите сакаат да го прослават Први Мај на плоштадот Таксим.

Од 2013 година, владата на претседателот Реџеп Таип Ердоган го затвори овој историски важен плоштад за работничката класа за да ги спречи демонстрациите за Први Мај.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Фудбал

Видео: Меч за аналите: 11 гола за едно полувреме и победнички гол во 90+9. минута

Најлудиот натпревар во годината – 11 гола за едно полувреме и победнички гол во 90+9. минута .

Видео: Меч за аналите: 11 гола за едно полувреме и победнички гол во 90+9. минута

Ролеркостер од емоции и возбудување во Солна , Шведска.Спектакуларен натпревар со 11 постигнати голови одиграа АИК и Бромапојкарна во 23-тото коло од шведското првенство, мечот заврши со победа на гостите од 6:5.

Највозбудливиот момент на мечот кој без сомнение е најдраматичниот оваа година се случи во деветтата минута од судиското надополнување, кога фудбалерите на Бромапојкарна го постигнаа победничкиот гол.

Би било преблаго да се каже дека коментаторот на натпреварот, како и гостинските фудбалери, се разбира, паднаа во делириум.

Не се знае што беше поневеројатно во овој крајно луд натпревар: фактот што сите голови беа постигнати во второто полувреме или тоа што гостите водеа со 5:1, ја испуштија предноста, а потоа го постигнаа победничкиот гол длабоко во судиското надополнување. А можеби врвот на лудилото беа последните две минути од судиското надополнување – АИК постигна гол за 5:5 во 90+8. минута, а Бромапојкарна дојде до победа во 90+9. минута!

Па така, ако навивачите на двата клуба го гледале натпреварот на телевизија и се откажале од следење на второто полувреме по првиот дел без голови – зажалиле.

Следеше вистински фудбалски спектакл. АИК, по резултатот 1:5 што стоеше на семафорот во 73. минута, се опушти, уверен во лесен триумф, и му дозволи на ривалот да се разбуди, да возврати и да се врати во натпреварот. Играчите на АИК редеа гол по гол, навивачите се „запалија“, а трибините „експлодираа“ во моментот кога на семафорот стоеше – 5:5. А потоа – шок, вистинска шлаканица.

Буквално во следната акција по израмнувањето, гостинскиот играч Хансен ја стивна еуфоријата на трибините и ја разгоре радоста на својот тим – погоди за 6:5 и стави крај на најлудиот натпревар одигран оваа година.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

Честитка од претседателката Сиљановска-Давкова по повод 11 Октомври – Денот на народното востание

На 11 Октомври 1941 година, македонските востаници му се придружија на антифашистичкиот демократски фронт, решени да го продолжат патот на илинденците до конечната победа и слобода, формирајќи македонска држава. 

Честитка од претседателката Сиљановска-Давкова по повод 11 Октомври – Денот на народното востание

На 11 Октомври 1941 година, македонските синови и ќерки тргнаа во решителен бој против фашистичките окупатори, бранејќи ја татковината.

Во време кога фашистичките сили маршираа низ европските држави, македонскиот мирољубив народ не беше тивок набљудувач на злото, туку патриотски ја прифати обврската за ослободување.

Идеја водилка на востанието како народен отпор беше вековниот стремеж за слободна македонска држава. Востанието прерасна во Народноослободителна борба, низ која, со крв, саможртва и непоколебливост на знајни и незнајни јунаци, се трасираше патот кон АСНОМ.

11 Октомври не е само важен историски датум. Тој е незаборавна и небришлива меморија и вечен завет за чување и развој на татковината. Заветот пак, не значи евоцирање спомени, имиња и настани, туку водење државен и општествен живот, достоен на нивната жртва.

Прилепските и кумановските востаници, но и сите други, не ни оставија само славна страница од минатото, туку аманет дека слободата се добива со храброст, дека правдината бара стаменост и пожртвуваност, дека држава се гради со труд, чест и одговорност. Нивниот херојски подвиг нè задолжува да бидеме не само нивни благодарни потомци, туку и достојни чувари и бранители на нивното непроценливо дело.

Се разбира, денешново време наметнува други приоритети, но секогаш остануваат човековата жед за правда, достоинство и слободен живот како насушна потреба.

Современиот бурен, сложен и конфликтен историски миг, од нас бара сплотеност, зрелост и мудрост, како неопходни доблести во справувањето со новите предизвици и проблеми со коишто сме соочени не само ние, туку и Европската Унија, Европа и светот.

Време е да се однесуваме кон државата како кон заеднички дом, во кој различностите не се повод за делби, туку причина за учење едни од други, за разбирање едни други, за градење свест за заедничко добро.

Мора да градиме правна и демократска држава, но и граѓанско општесто во кое законите ќе важат за сите, институциите ќе им служат на сите, а сечие човеково достоинство ќе биде неприкосновена вредност.

Секое поколение има свој испит пред историјата. Нашиот испит не е да раскажуваме, а уште помалку да ги повторуваме битките на претходниците, туку, да ги оживотвориме нивните подвизи: со знаење, наместо со незнаење; со право, етика и морал, наместо со самоволие; со единство, наместо со раздор; со заслуги, наместо со политички, партиски и статусни привилегии.

На крајот, на востаниците и на партизаните им должиме заслужена почит што се избориле и ни оставиле држава!

Ние пак, имаме политичка, економска и граѓанска обврска да градиме демократска, правна и просперитетна европска држава.

Нека ни е честит 11 Октомври – Денот на народното востание!

д-р Гордана Сиљановска-Давкова

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

Мицкоски со честитка за 11 Октомври: „Слободата е дело што секоја генерација мора да го продолжи“

Премиерот Христијан Мицкоски упати честитка по повод 11 Октомври – Денот на народното востание, потсетувајќи на храброста и пожртвуваноста на предците кои се бореле за слободата на Македонија.

Мицкоски со честитка за 11 Октомври: „Слободата е дело што секоја генерација мора да го продолжи“

Во објавата, Мицкоски истакнува дека борците од пред 85 години немале гаранција за победа ниту сигурност дека ќе се вратат во своите домови, но верувале дека слободата вреди повеќе од сопствениот живот.

Пред осумдесет и пет години, во една од најтешките ноќи на нашата историја, имало луѓе кои не знаеле дали ќе го дочекаат утрото. Но, знаеле дека татковината мора да дочека подобро утро. Тие немале гаранција дека ќе победат. Немале сигурност дека ќе се вратат во своите домови. Немале можност да знаат како ќе изгледа светот што ќе го остават зад себе. Но, имале нешто посилно од стравот. Имале верба дека слободата вреди повеќе од сопствениот живот.

Нашите предци го направија она што во нивното време изгледало невозможно. Ја отворија вратата на слободата. Нашата должност е таа врата никогаш да не се затвори и низ неа да поминат генерации кои ќе живеат подобро, послободно и подостоинствено.

Нека овој 11 Октомври не биде само ден на сеќавање. Нека биде ден на нова одговорност. Одговорност да ја чуваме слободата. Затоа што слободата не е завршена приказна. Слободата е дело што секоја генерација мора да го продолжи.

Честит 11 Октомври!

Да е вечна Македонија!

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

притисни ентер