Милијарди луѓе се загрозени од климатските промени, открива новото истражување

Најголемата годишна студија за влијанието на климатските промени врз здравјето на луѓето покажала дека во 2020 година до 19 отсто од копнената маса на Земјата била погодена од екстремна суша.

Предупредија дека климатските промени претставуваат голема закана за безбедноста на храната, што веќе влијае на повеќе од две милијарди луѓе.

Студијата на Lancet Countdown покажала дека, споредено со историскиот просек, глобалното население на возраст над 65 години доживеало 3,1 милијарди дополнителни екстремно топли денови минатата година.

Населението од 134 земји сега е изложено на поголем ризик од шумски пожари отколку порано, а милиони земјоделци и градежни работници ги губат приходите поради зголемениот број на екстремно топли денови.

А климатските промени создаваат идеални услови за заразни болести како денга треска, вирусот Зика, колера и маларија во многу поголеми области во светот, вклучително и во Европа, отколку пред само неколку децении.

„Климатските промени се тука и ние веќе гледаме штета по здравјето на луѓето низ целиот свет“, рече Ентони Костело, извршен директор на Lancet Countdown.

„Како што продолжува кризата со Ковид-19, секоја земја исто така се соочува со некој аспект од климатската криза“, рече тој.

Анализата покажала дека петте години со најмногу подрачја погодени од екстремна суша се по 2015 година.

Нарушувањето на циклусот на водата поради глобалното затоплување го скратува времето во кое растенијата достигнуваат зрелост, што резултира со низок принос и зголемен притисок врз производството на храна.

Според Лансет, потенцијалот за принос на пченка, глобална главна храна, веќе е намален за 6 проценти од нивоата 1981-2010 година. Пченицата забележала потенцијален пад на приносот од 3 отсто, а оризот за 1,8 отсто.

И морската храна, од која зависи 3,3. милијарди луѓе, е под „сè поголема закана“, а просечната температура на морето се зголемува во речиси 70 отсто од територијалните води во споредба со пред само 15 години.

Извештајот, исто така, предупредува дека речиси три четвртини од анкетираните земји рекле дека веруваат дека не можат да си дозволат интегрирана национална стратегија за здравје и клима.

„Оваа година видовме луѓе кои страдаат од големи горештини, смртоносни поплави и пожари“, рече водачот на студијата Марија Романело.

„Ова се мрачни предупредувања дека со секој ден што го одложуваме одговорот на климатските промени, ситуацијата станува сè покритична. Време е да сфатиме дека никој не е безбеден од ефектите на климатските промени“, додаде таа.

Во едиторијалот, Лансет ги повика светските лидери да пренасочат дел од милијардите што ги трошат за закрепнување од ковид-19 кон намалување на нееднаквоста и заштита на здравјето на претстојниот самит COP26.

„Овогодинешните показатели даваат мрачна перспектива: глобалните нееднаквости се зголемуваат, а здравствените резултати се влошуваат.

АФП добил нацрт-оценка за влијанието на климатските промени од Меѓувладиниот панел за климатски промени во јуни.

Предупредено е дека зголемувањето на температурите ќе изложи уште десетици милиони на суша и болести веќе во 2050 година.

Неверојатен потфат: Французин на 70 метри височина ја премина Копакабана (ВИДЕО)

Одејќи по јаже, 27-годишниот Французин Нејтан Паулин го изведе својот нов потфат на воодушевување на многумина меѓу двата врва на познатиот Шеќерен рид во Рио де Жанеиро.

Паулин пешачеше петстотини метри по јажето, а до крај бил прицврстен со јаже за потпора. И добро што го направил тоа, бидејќи неколку пати изгубил рамнотежа и се лизнал.

Јажето било поставено на височина од седумдесет метри, а по целата должина под него била плажата Копакабана со капачи.

Публиката со ентузијазам ја следела прошетката, лежејќи на лежалките.

Но, Нејтан бил особено воодушевен, благодарение на прекрасниот поглед кој го пружа ова уникатно место, поради што го избрал за својата „прошетка“.

„Горе беше одлично бидејќи имате панорамски поглед од 360 степени. Од едната страна го гледате Шеќерниот Рид, потоа Корковадо. Самиот Рио е посебен по тоа што градот е помеѓу планините и морето, од сите страни имате поглед на море и планини, а стоењето над се` е незамисливо “, рече Французинот.

Нејтан долго време се подготвувал за овој потфат, но поради пандемијата морал секој пат да го одложува.

Почна судењето на данскиот голфер кој јавно уринирал во авион и напаѓал жени

Во Лондон започна судењето на данскиот играч на голф Торбјорн Олесен, кој е обвинет за сексуална злоупотреба на стјуардеса и жена и уринирање на седиште пред две години на летот од САД до Лондон.

Британската полиција го уапсила Олесен на 29 јули 2019 година под сомнение за сексуален напад на летот на Бритиш ервејс, а на 6 август тој бил официјално обвинет. Данскиот играч на голф ги отфрлил сите обвинувања, велејќи дека не се сеќава на ништо.

Сведоците го опишале неговото однесување на летот од Нешвил до Лондон како сосема бизарно.

Под дејство на алкохол, Олесен почнал да трча низ авионот, да го навредува екипажот, потоа да ја гушка и се обидел да ја бакне стјуардесата, наводно фатил друга жена за градите, уринирал на седиштето, а потоа плачел пред да заспие на своето место во бизнис класата.

„Во текот на моите 27 години кариера, никогаш не сум видела нешто слично“, рече стјуардесата. Олесен го негирал сексуалниот напад, велејќи дека никогаш свесно не би ја ризикувал својата кариера со извршување на кривично дело. Тој додаде дека земал апчиња за спиење и не се сеќава на ништо.

„Се чувствував целосно ужасно и многу ми беше жал. Не можев да верувам што зборуваат, што се случило... Засрамен сум и се чувствувам ужасно“, изјавил 31-годишниот Олесен на судењето.

Данецот, кој освои пет европски турнири во текот на својата кариера, загуби профитабилни спонзорски договори по инцидентот и падна од 50. на 400. место на ВТА.

Седуммина припадници на „сините шлемови“ загинаа во Мали

Седуммина припадници на тогоанските сини шлемови загинаа, а тројца се тешко повредени во напад со експлозивна направа во центарот на Мали, што најостро го осуди генералниот секретар на ОН.

„Денес, 8 декември, логистички конвој на мировници (MINUSMA) кој патуваше од Дуенце до Севаре, во центарот на земјата, наиде на експлозивна направа.“ објави на Твитер Мисијата на ОН во Мали (MINUSMA).

Нападот се случил во околината на Бандиагара, во провинцијата Мопти, додава MINUSMA.

Генералниот секретар на ОН Антонио Гутереш „остро го осудува овој грозоморен напад“, изјави неговиот портпарол Стефан Дужарик во Њујорк. Тој ги повика властите во Мали да направат се` за да ги пронајдат виновниците и да ги изведат пред лицето на правдата, додаде тој.

Врховниот командант на MINUSMA, Ел Гасим Ване, исто така „остро“ го осуди овој „кукавички“ напад, истакнувајќи во изјавата дека тоа може да се опише како „воено злосторство“.

„Оваа трагедија го зголемува бројот на жртвите на нападите врз мировниците во Мали.“

Нападот доаѓа еден ден откако MINUSMA ја објави смртта на мировниците во Дакар во понеделникот, кои биле убиени кога нивното возило наишло на импровизирана експлозивна направа на 22 ноември во близина на Тесалит, во северниот дел на Мали.

Во Мали беснее конфликт од 2012 година во кој џихадистичките групи поврзани со Ал Каеда и групата Исламска држава постојано извршуваат напади по насилството врз цивили на вооружените групи, од кои некои се нарекуваат сили за самоодбрана.

MINUSMA, распоредена во Мали во 2013 година, моментално е мировната мисија на ОН со најмногу смртни случаи во светот. До 31 октомври, 146 нејзини членови биле убиени во воените дејствија, според статистиката на ОН.

притисни ентер