Во интервју за грчката телевизија „Антена“ тврди дека не ги сменил старите ставови од времето кога бил во опозиција, но оти сфатил дека договорите не можат да се променат. Откри дека новото уставно име на Македонија не му било трн во очи, туку други формулации во Спогодбата.
-Моите критики за договорот не се однесуваа на името, туку на македонскиот јазик и македонската етничка припадност. Продолжувам да верувам дека ова е голема грешка. Јас сум многу јасен и многу искрен. , вели Кирјакос Мицотакис, премиер на Грција.
Мицотакис нема никакви дилеми дека Македонија треба да го почне пристапниот процес, кој според него, ќе биде дополнителна алатка Атина да го интензивира спроведувањето на Договорот, но и да се обиде да коригира одредени недостатоци.
-Сметаме дека пристапниот процес за соседната земја треба да започне веднаш, бидејќи преку процесот на пристапување имаме можност да се заложиме за имплементација на договорот и да ги решиме сите негови слабости, колку што ни дозволува правната рамка., додаде Мицотакис.
И покрај тоа што Договорот од Преспа стапи на сила пред три години, Грција се уште не ги променила сообраќајните табли со Скопје и Фиром, со образложение дека проблемот лежи кај локалните власти, кои се надлежни, но без ентузијазам да ги сменат. Во исто време, три меморандуми за соработка потпишани меѓу двете земји, иако доставени во грчкото собрание пред година и пол, се уште чекаат ратификација. За разлика од Грција, Македонија освен промената на таблите и имињата на државните институции, почна и со издавање на документи со новото уставно име.