Македонија

Мицкоски: Заев се вози во БМВ од 100.000 евра, додека народот го пикаат во болници кои горат

„Зошто велам дека Заев и власта се најлошото? За тоа што тоа што се случува изминативе четири години навистина направија да сите ние се чувствуваме буквално најлошо. “

„Не само овде во Неготино, туку низ цела Македонија и тоа можете да го слушнете буквално од секој еден граѓанин. Ја започнаа оваа кампања за локалните избори со можеби најголемата лага досега што ја смислиле, а тоа е дека биле најдоброто во Македонија и најдоброто во секоја општина во Македонија. Како што впрочем прават сите овие четири години откако се Влада во Македонија", истакна Христијан Мицкоски, претседател на ВМРО-ДПМНЕ од митингот во Неготино.

Мицкоски додаде дека СДСМ и Заев единствено се најдобри по лажење и по крадење. Тука на СДСМ им нема рамен.

„За тоа што се најдобри во лажење и во крадење денеска Македонија е најкорумпираната држава во Европа, со најкорумпираните политичари во Европа, и тоа не го велам јас за тоа што сакам на тој начин да им мислам лошо туку тоа го велат реномирани и кредибилни европски институции. Никогаш во овие триесет години не сме имале покорумпирана и покриминална Влада од оваа која што денеска ја има", рече Мицкоски.

Мицкоски посочи дека власта на СДСМ се најдобрите предавници кои што некогаш се родиле овдека во Македонија.

„Се сеќавате на оние ветувања кога велеа дека ќе донеселе живот, ќе обезбедиле најдобри услови за работа на земјоделците, а вчера доаѓам од Ресен и таму некој ден пред, односно во понеделникот Зоран Заев се паркираше со најновото патничко возило од марката БМВ кое што верувале или не чини ни повеќе ни помалку точно 3 милиони килограми квалитетно ресенско јаболко. Точно три милиони килограми. Денеска еден килограм во Ресен се купува по два денари. Не е ни подобра ситуацијата во Тиквешијата, кај лозарите, го видовме нивниот револт, не е ни подобра ситуацијата во Кочани и кочанско кај оризопроизводителите. Буквално насекаде гледаме порази, насекаде гледаме понижувања. Далеку од тоа дека е најдобро, напротив најлошо", нагласи Мицкоски.

Мицкоски рече дека нема нарко бос на Балканот кој што нема македонски пасош, и тоа издаден од МВР предводено од Оливер Спасовски, најверниот слуга на Зоран Заев.

„Власта најлошо убедливо се справија со КОВИД во Европа. 14 луѓе живи гореа, 14 луѓе во тешка мака го загубија својот живот во Тетово, а нив мува не ги лази. Еве неколку недели поминаа, а нема ниту еден од нив не успеа достоинствено да се одважи и да понесе одговорност. Да речат да виновни сме, а виновни се. Зошто се виновни? За тоа што пуштија во употреба објект, пуштија во употреба болница која што наместо да лечи, стана пекол за пациентите во нејзе. Виновни се од првиот до последниот. Но, затоа пак за Зоран Заев нема вина таму, вели дека тој што треба прв да одговара денеска Венко Филипче бил најспособниот министер за здравство кој што некогаш го имала Македонија", истакна Мицкоски.,

Мицкоски додаде дека Заев се вози во БМВ од 100.000 евра, додека народот го пикаат во болници кои горат за две минути.

Свет

Анкета: Дури 79 проценти од Германците се незадоволни од владата на Шолц

Две третини од Германците се незадоволни од политиката на ниво на Европската унија, а дури 79 отсто од нив се незадоволни од владата на канцеларот Олаф Шолц, покажува истражувањето на Deutschlandtrend објавено денеска.

Мнозинството критичари на ЕУ се меѓу гласачите на десничарската Алтернатива за Германија (AfD) и новата левичарска партија Алијанса Сара Вагенкнехт. 41 процент од Германците како најголем проблем го посочиле прашањето за имиграцијата, азилот и интеграцијата на имигрантите, пишува во анкетата на Deutschlandtrend.

51 отсто од нив сметаат дека решението за миграциското прашање би биле договори со Египет, Либан и Тунис, според кои овие земји би ги спречиле потенцијалните баратели на азил да патуваат во Европа, а за возврат би добиле финансиска помош од ЕУ.

79 отсто од граѓаните се незадоволни од владата, додека владејачките социјалдемократи уживаат поддршка од само 15 отсто од граѓаните (15 и 14 на ниво на ЕУ), а третата коалициона партија, Либералите, 5 отсто на домашно ниво ( 4 проценти на европско ниво), што ги става на границата на пописот.

Опозициските демохристијани имаат поддршка од 31 отсто од граѓаните (30 отсто на европските избори), пренесува Н-ТВ. АфД остана на 18 отсто (15 отсто за европските избори), а партијата на Сара Вагенкнехт сепак ќе биде во парламентот со пет отсто (седум на европските избори), додека нејзината поранешна партија Левица е под прагот.

Во истражувањето на Deutschlandtrend, над 70 отсто од граѓаните велат дека AfD треба да ги преиспита своите блиски односи со Русија и Кина и дека популарноста на партијата е намалена во последните месеци поради низата скандали, особено по апсењето на Максимилијан Крах, кој требаше да биде носител на листата на АфД на европските избори, поради сомневање за шпионажа во корист на Кина.

Сепак, три четвртини од поддржувачите на АфД сметаат дека медиумите и јавноста отишле предалеку кога станува збор за критикување на Крах. Истражувањето покажало дека 34 отсто од Германците сметаат дека меѓународните конфликти се голем проблем, 21 отсто се загрижени за заштитата на животната средина и климата, а точно една петтина го гледаат слабеењето на економијата како проблем.

Дојче веле наведува дека државниот буџет за следната година е клучен проблем. Либералите инсистираат буџетот да биде без нови долгови, додека СДП и Зелените инсистираат дека е неопходно ново задолжување.

Јавното мислење најмногу се залага за опцијата за штедење, односно 54 отсто од нив, додека 40 отсто сакаат да се реформира уставното правило за задолжување. Доколку не се смени политиката за сопирање на долгот, која го ограничува јавниот дефицит на 0,35 отсто од бруто домашниот производ, се проценува дека државата ќе заштеди околу 30 милијарди евра.

Дури 78 отсто од Германците сметаат дека не треба да се штеди на здравствената заштита и грижата за старите лица и тврдат дека треба да се зголемат расходите за овие потреби.

На листата приоритети на Германците, пензиите (58 отсто сакаат зголемување на трошоците), поддршката за семејството и децата (55), одбраната и армијата (50), а на дното се интеграцијата на бегалците (17) и социјалната помош (10).

Свет

Берлин бесплатно ја нуди вилата на нацистичкиот министер Гебелс

Властите на Берлин бесплатно нудат вила, некогаш во сопственост на министерот за пропаганда на Хитлер, Џозеф Гебелс.

Тие се надеваат дека ова ќе стави крај на децениската дебата за тоа дали зградата треба да се пренамени или срамни со булдожери и да им се даде пространото место на селата северно од германската престолнина.

„Ние нудиме секој што сака да го преземе седиштето да го земе како подарок од покраината Берлин“, изјави вчера во државниот парламент берлинскиот министер за финансии Стефан Еверс. Берлин постојано се обидуваше да им го отстапи местото на федералните власти или на покраината Бранденбург, каде што се наоѓа вилата, наместо да продолжи да плаќа за одржување на комплексот, кој стана обраснат и занемарен.

Еверс не прецизира дали приватни лица ќе можат да ја преземат вилата. „Ако повторно не успееме, како во изминатите децении, тогаш Берлин нема друга опција освен да го изврши уривањето за кое веќе се подготвивме“, посочи тој.

Гебелс, еден од најблиските сојузници на Хитлер, ја изградил луксузната вила во 1939 година на шумско место со поглед на езерото Богензе во близина на градот Вандлиц, околу 40 километри северно од Берлин.

Шефот на пропагандата живеел во Берлин со сопругата и шесте деца, а вилата ја користел за забави на нацистичките лидери, уметници и актери, но наводно и како љубовно гнездо за тајни афери, пишува Асошиетед прес. По војната, локацијата накратко била користена како болница, а потоа преземена од младинското крило на Источногерманската Комунистичка партија.

По обединувањето на Германија во 1990 година, сопственоста на локацијата е вратена на сојузната држава Берлин. Оттогаш, местото стана атракција за патниците. Гебелс се вратил во Берлин во последната фаза од Втората светска војна. Тој и неговата сопруга се убиле себеси и нивните деца со капсули со цијанид во бункерот на Хитлер додека советските трупи се приближувале.

Свет

Орбан со чудна порака по повод 20 години во ЕУ: Ние сме на граница меѓу војна и мир

По повод 20-годишнината од влезот на неговата земја во Европската унија, унгарскиот премиер Виктор Орбан даде интервју во кое донекаде ги нападна креаторите на актуелната политика во Брисел.

Како што пренесува порталот „Унгарија денес“, Орбан дал интервју за Радио Кошут и емисијата „Добро утро, Унгарија“.

„Кога Унгарија стана членка на Европската унија пред 20 години, не очекуваше дека ќе има некои радикални промени во овој блок“, започна премиерот и продолжи:

„Високиот претставник на Европската унија за надворешна политика и безбедност тврди дека војната од големи размери не е фантазија, додека Полска веќе наведува дека војната нема дипломатско решение. Европа си игра со оган, ние сме на граница меѓу мирот и војната“.

Унгарија со големо мнозинство го поддржа пристапувањето во ЕУ во 2003 година, а пристапните преговори беа финализирани на 1 мај следната година. Во тоа време Орбан беше голем противник за влез на Унгарија во Унијата. Сега премиерот тврди дека повеќе не е во национален интерес на земјата да биде дел од Европската унија.

„Кога се приклучивме, не очекувавме дека ќе бидеме принудени да примаме мигранти од други делови на светот или дека ќе ни вршат притисок затоа што ги заштитивме семејните вредности и дека бракот е дефиниран како врска меѓу маж и жена. Не очекувавме дека европските лидери ќе го водат континентот кон војна наместо кон мир“, рече Орбан.

Тој ги повика Европејците да гласаат на претстојните избори за Европскиот парламент за партиите кои поддржуваат мирно решение на војната во Украина, вклучувајќи ја и владејачката партија Фидес.

„Ако значителен број членови на Европскиот парламент се за мир, тогаш можеме да ја вратиме Европа од работ на бездната“, смета тој.

Пред да влезе во ЕУ, Унгарија стана членка на НАТО во 1999 година. Во март оваа година, американскиот амбасадор во Будимпешта го обвини Орбан дека ја поткопува поддршката на Алијансата за Украина и дека е на страната на Русија.

притисни ентер