Македонија

Мицкоски: Време е за промени, потребна е ефикасна и посветена администрација

Јавната администрација не е само механизам за спроведување на законите и политиките, таа е лицето на државата, одраз на нејзината ефикасност и посветеност кон граѓаните.

Колку е подобро организирана, толку побрзо и поквалитетно ќе ги испорачува услугите. За жал, во изминатите години сведочевме на слабости, партизираност, неефикасност, недоволна компетентност на одредени кадри. Сега е време за промени, соопшти денеска премиерот Христијан Мицкоски на втората седница на Советот за реформа на јавната администрација.

Како што информира владината прес-служба, Мицкоски истакнал дека нема веќе седење дома и земање плати и најавил дека Владата ќе се фокусира на одредени елементи во јавната администрација да ја направи поефикасна.

- Можам да соопштам дека нема повеќе луѓе кои седат дома и земаат плата. Се бориме за систем на заслуги наместо партиски влијанија. Професионалната администрација подразбира дека вработувањата и унапредувањата се засноваат на знаење, вештини и резултати, а не на политички или лични врски. Воведување транспарентни критериуми за селекција, тестирање и континуирана евалуација ќе гарантира дека само најдобрите ќе бидат дел од институциите. Континуирана обука и развој, светот се менува брзо, а со него и предизвиците во јавниот сектор. Затоа, нашите службеници мора постојано да се усовршуваат. Ќе обезбедиме програми за обука, размена на искуства со напредни администрации и воведување на најдобрите меѓународни практики, нагласи Мицкоски.

Премиерот најави зајакнување на етичката свест и механизмите за отчетност на администрацијата кон граѓаните.

- Дигитализација за поголема ефикасност е многу значајна. Современата јавна администрација мора да биде технолошки напредна. Ќе инвестираме во дигитални алатки кои ќе го намалат времето на обработка на барањата, ќе ги елиминираат непотребните чекори и ќе ја зголемат ефикасноста. Квалитетната администрација бара мотивирани и задоволни службеници. Тоа значи подобри работни услови, фер плати и можности за напредување врз основа на реални заслуги, рече Мицкоски.

Премиерот Мицкоски нагласи дека јавната администрација е сервис за граѓаните и дека реформата мора да се спроведе ако сакаме европска држава.

- Ова не е промена што се случува преку ноќ, но е реформа што мора да ја спроведеме доколку сакаме модерна, европска држава. Јавната администрација мора да биде сервис за граѓаните, а не институција што ја кочи државата. Време е да создадеме систем во кој професионалците ќе ја движат администрацијата напред, порача Мицкоски.

Како што информира кабинетот на министерот за јавна администрација, анализата на спроведувањето на Стратегијата за реформа на јавната администрација 2023-2030, усвојувањето на годишните извештаи за 2023 и 2024 година и презентацијата на наодите од оценската мисија на СИГМА за напредокот на Република Македонија во областа на јавната администрација беа во фокусот на втората седница на Советот за реформа на јавната администрација.

Тагови: Христијан Мицкоски

Живот

Уживала во дворот, кога наеднаш дувнал силен ветер и покривот полетал кон неа (ВИДЕО)

Бил сосема обичен ден. Постара госпоѓа седела пред куќата, пиела кафе и се подготвувала за работа.

Имало многу за чистење во дворот, но прво таа се одморила. Сепак, нејзиното уживање кратко траело, бидејќи наеднаш започнала бура, објави Итемфикс.

Сè полета!

Сè во дворот одлетало и настанал хаос! А потоа ветрот го подигнал лимениот покрив кој паднал токму пред нозете на несреќната жена.

Имала неверојатна среќа и не била сериозно повредена. Единствено што таа морала да го среди настанатиот хаос.

Како изгледаше драматичниот настан, погледнете во продолжение:

Тагови: дворот покрив

Свет

Кина ги отфрли обвинувањата на Украина дека ја вооружува Русија: Политичка манипулација

Министерството за надворешни работи на Кина ги отфрли обвинувањата на Украина за вмешаност на кинески компании во производството на воена опрема за Русија, нарекувајќи ги „неосновани“.

Оваа изјава ја даде портпаролот на кинеското Министерство за надворешни работи Гуо Џиакун како одговор на повикувањето на кинескиот амбасадор од страна на украинското МНР, пишува Укринформ, повикувајќи се на Глобал Тајмс.

„Веќе јасно ја кажавме позицијата на Кина за релевантните прашања. Кина цврсто се противи на неоснованите обвинувања и политичките манипулации“, рече портпаролот.

„Кинеските компании произведуваат оружје на руска територија“

Како што објави Укринформ, на 22 април, кинескиот амбасадор Ма Шенгкун беше повикан во украинското Министерство за надворешни работи поради наводи дека кинески државјани учествувале во борбите на страната на Русија и дека кинеските компании произведуваат оружје на руска територија.

Заменик министерот за надворешни работи Јевхен Перебинис за време на средбата истакна дека доказите за учеството на кинеските граѓани во војната против Украина, како и вмешаноста на кинески компании во военото производство во Русија, предизвикуваат сериозна загриженост и се во спротивност со духот на партнерството меѓу Украина и Кина.

Украинскиот претседател Володимир Зеленски претходно на 7 април изјави дека Украина добила информации дека Кина и доставува оружје на Русија - конкретно барут и артилерија. Кина на 18 април одговори дека не испорачала смртоносно оружје на ниту една страна во војната.

Кинеското Министерство за надворешни работи уште еднаш ги отфрли сите обвинувања, нагласувајќи дека тие се политички мотивирани и неосновани.

Тагови: русија украина

Шоу биз

Семејството на Фреди Меркјури во кавга со екс девојката- му ги продала работите (ВИДЕО)

Кашмира Булсара (73), сестра на легендарниот Фреди Меркјури (вистинско име Фарук Булсара), наводно е бесна на неговата поранешна девојка Мери Остин поради продажбата на личните работи на Фреди.

„Кашмира беше лута и вознемирена што виде толку многу предмети на нејзиниот сакан брат ставени на продажба од неговата поранешна девојка“, рекол извор близок до сестрата на Меркјури. Затоа Кашмира заедно со синот Џамал Зук и личната асистентка тајно учествувале на аукцијата во Сотби, каде на крајот потрошила 3 милиони фунти за некои од предметите, пишува The Sun.

„Одвоија огромен буџет“

„Одвоија огромен буџет, па всушност беа многу задоволни со конечната бројка, и покрај тоа што платија значително повеќе од проценетата цена за секој артикл. Се разбира, Кашмира цени колку Фреди беше обожаван ширум светот, но беше тажна од помислата дека некои од неговите сентиментални предмети нема да бидат со неговите најблиски“, рече изворот.

Меѓу предметите што наводно ги купила Кашмира се џубокс, елек со мачките на Фреди што музичарот го носел на снимањето на спотот за песната These Are The Days Of Our Lives и осум страници работни верзии на текстот на песната Killer Queen.

Врската на Фреди и Мери

Да се потсетиме дека Мери и Фреди се запознале во 1970 година кога тој се преселил од родниот Занзибар во Лондон. Три години подоцна почнале да живеат заедно, но во 1976 година Фреди ѝ признал дека е геј, по што раскинале. Иако никогаш не се венчале и покрај неговата сексуална ориентација, Фреди во неколку наврати ја нарекувал Мери како негова сопруга. Тие останаа во добри односи до неговата смрт во 1991 година.

Тагови: девојка Фреди