Здравје

Мехмедовиќ: Без паника, не очекуваме повеќе случаи на конго-кримска хеморагична треска

Не треба да се крева паника во однос на новата состојба со конго-кримска хеморагична треска, изјави за МИА, портпаролот на Комисијата за заразни болести, Злате Мехмедовиќ.

Тој подвлече дека не очекуваат да има повеќе случаи на конго-кримска хеморагична треска во блиска иднина.

- Во однос на тоа каква е состојбата, какви се симптомите, кои се евентуалните компликации, што може да се направи во насока на тоа да се превенира болеста, мислам дека од Институтот за јавно здравје излегоа со информации за тоа. Комисијата за заразни болести апсолутно стои зад сето тоа што е направено од страна на Институтот за јавно здравје, мерките што се преземаат и препораките што се даваат, нагласи тој.

Од она што го виделе, како што додаде тој, првиот случај е случај на директно заразување, а вториот е веројатно на пренесување преку контаминирана крв.

- Не очекуваме да има повеќе случаи, меѓутоа ова не е првпат да се јавува во државава ваков тип на заболување, зборуваме конкретно за конго-кримска хеморагична треска. Дека го имало во минатото – го имало, дека се појавува во регионот – се појавува, дека ќе има вакви инцидентни појавувања – ќе има. Меѓутоа тоа не значи дека сме на раб на избивање на нова епидемија што ќе ги загрози сериозно животот и здравјето, истакна Мехмедовиќ.

Од Министерството за здравство вчера информираа дека по потврдување на случај на конго-кримска хеморагична треска кај жена на 27-годишна возраст, вработено лице на Клиниката за инфективни болести и фебрилни состојби (КИБФС), идентификувано како контакт со среден ризик, на деветтиот ден од надзорот, пројавило симптоми. Согласно добиените резултати од страна на ЕПИ Одделот на ИЈЗ, бил утврден позитивен случај на конго-кримска хеморагична треска.

Оттаму појаснија дека пациентот е хоспитализиран на Клиниката, а Одделот за епидемиологија на заразни болести при Институтот за јавно здравје Скопје, веднаш формирал екипа за теренски увид, „која ги спроведе потребните активности, односно изврши анкетирање на пациентот и ставање под надзор контакти од здравствен ризик со цел спречување од понатамошно ширење на болеста“.

- По потврдување на случај на конго-кримска хеморагична треска кај жена на 27-годишна возраст, надлежните здравствени институции постапија согласно препораките на СЗО. Стручен тим од Одделот за епидемиологија на заразни болести при Институтот за јавно здравје на Северна Македонија во соработка со надлежни епидемиолози од Центрите за јавно здравје на Штип и Скопје, направија теренско истражување во Клиничка болница Штип, Итна медицинска помош Штип и во семејството на сега почината жена. Стручен тим епидемиолози направија теренски увид и на КИБФС во Скопје, соопштија од Министерството.

Здравствениот надзор трае 14 дена од последниот контакт со пациентот. Контактите од првиот позитивен случај се под надзор до четврток.

Како што се потенцираше во соопштението, „должината на периодот од заразување до појава на симптоми зависи од начинот на стекнување на вирусот. По инфекцијата со каснување од крлеж, периодот е обично еден до три дена, со максимум од девет дена. Периодот по контакт со заразена крв или ткива е обично пет до шест дена, со документирани максимум 14 дена“.

- Почетокот на болеста е ненадеен, со главоболка, висока температура, болки во грбот, болки во зглобовите, болки во стомакот и повраќање. Црвени очи, зацрвенето лице, црвено грло, и црвени дамки на непцето, се исто така присутни. Може да се јави жолтица, а во потешки случаи, промени во расположението. Како што напредува болеста, на телото на заболениот се јавуваат големи делови со модрици, како и крварење од носот. Закрепнувањето е бавно, пишува во соопштението на Министерството за здравство.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

Како Шпанија станува лидер во паметното и одржливо производство на бакар

Иберискиот пиритски појас го привлекува вниманието на глобалната индустрија – комплексот „Sandfire MATSA“ во Шпанија користи напредна технологија за интеграција на три рудници во еден моќен преработувачки центар.

Рударскиот сектор во Европа доживува вистинска револуција, а во центарот на овие промени се наоѓа Шпанија. Познатиот Ибериски пиритски појас во југозападниот дел на земјата (провинцијата Уелва) е дом на еден од најмодерните и технолошки најнапредните рударски проекти на континентот – комплексот Sandfire MATSA.

Според анализата на стручниот меѓународен медиум Geomechanics.io, овој проект претставува учебнички пример и нуди клучни лекции за рударските инженери ширум светот за тоа како успешно да се интегрираат повеќе рудници во еден паметен, високопродуктивен и еколошки одговорен систем за производство на бакар и други полиметални суровини.

Еден централен капацитет, три рудници: Моќта на паметната интеграција

Срцето на овој комплекс е гигантската централна фабрика за преработка со капацитет од дури 4,7 милиони тони годишно. Оваа фабрика се напојува со руда од три посебни подземни рудници: Aguas Teñidas, Magdalena и Sotiel.

Она што го прави овој проект исклучителен е неговиот т.н. „hub-and-spoke“ (централизиран) модел. Инженерите на „Sandfire MATSA“ користат софистицирани дигитални алатки за контрола во реално време, кои овозможуваат рудата со различен состав од трите различни наоѓалишта совршено да се комбинира и да се прилагоди пред да влезе во процесот на флотација. Со ова се постигнува максимално искористување на бакарот, додека истовремено се минимизираат загубите на енергија и ресурси.

Технологија во служба на безбедноста и ефикасноста:

Зад високите бројки на производство стои имплементација на најсовремена технологија. Комплексот се потпира на дигитализација на подземните процеси, оптимизирано управување со отпадниот материјал (backfill) и напредни геотехнички софтвери. Овие иновации овозможуваат:

Поголема безбедност за рударите: Сите критични процеси под земја се следат преку софистицирани дигитални системи, со што ризиците се сведени на минимум.

Стабилност и контрола на теренот: Со оглед на тоа што се работи за три различни геолошки локации, инженерите применуваат усогласени геотехнички стратегии кои гарантираат стабилност на подземните копови.

Еколошки стандарди по највисоки европски правила:

Покрај економските придобивки, овој централизиран модел во Шпанија носи огромна предност и за заштитата на животната средина. Наместо три посебни преработувачки капацитети кои би влијаеле врз природата на три различни места, „Sandfire MATSA“ има само еден централен пункт за управување со водите и јаловината.

За шпанските регулатори и локалните власти во Уелва, ова овозможува исклучително строг, прецизен и лесен мониторинг на еколошките перформанси. Шпанија со ова покажува дека индустриското рударство на бакар – метал кој е клучен за зелената транзиција и електричните возила – може да се одвива со максимално почитување на најстрогите еколошки стандарди во Европа.

Со вакви проекти, Шпанија не само што ја зацврстува својата позиција на европската рударска мапа, туку и поставува нови глобални стандарди за тоа како треба да изгледа одржливото и паметно рударство во 21-виот век.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Свет

Бројот на жртви во Венецуела се искачи на повеќе од 4.550

Според официјалните податоци објавени од Родригез на „Телеграм“, повредени се 16.740 лица, а спасени се 6.462.

Бројот на загинати во разорните земјотреси што ја погодија Венецуела се искачи на 4.561, додека повеќе од 20.000 луѓе се сместени во привремени кампови, соопшти претседателот на Националното собрание на таа земја, Хорхе Родригез.

Според официјалните податоци објавени од Родригез на „Телеграм“, повредени се 16.740 лица, а спасени се 6.462. Државна помош добија 128.324 семејства, а во земјата беа формирани 107 привремени кампови во кои се сместени 20.231 лице.

Во соопштението се додава дека во земјотресите се оштетени 856 објекти, од кои 190 се целосно урнати.

На 24 јуни, Венецуела беше погодена од земјотреси со јачина од 7,2 и 7,5 степени според Рихтеровата скала, кои се случија во временски интервал помал од една минута.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

СДСМ: Дијаспората не сака Мицкоски да гласа наместо неа

ВМРО-ОКГ повторно лаже.

Тие свесно шират лажна приказна дека СДСМ е против гласањето на дијаспората. Ова е чиста манипулација.

Никој не е против гласањето на дијаспората.

Проблемот не е во правото на глас, туку во манипулацијата и кражбата на гласови која ВМРО-ОКГ сака да ја овозможи преку Изборниот законик.

Дијаспората не сака Христијан Мицкоски и неговата организирана криминална група да гласаат наместо неа.

Дијаспората сака самата да го каже својот глас, а не да дозволи членови на криминалната мрежа во Белата палата да одлучуваат наместо неа.

ВМРО-ОКГ сака да отвори пат за масовна злоупотреба преку неконтролирано гласање.

Токму затоа се спротивставуваме на нивните предлози. Не затоа што сме против дијаспората, туку затоа што сме против кражбата на нејзиниот глас.

Дијаспората гласаше и во минатото. Ќе гласа и во иднина. Но нема да дозволиме нејзиниот глас да го украде истата криминална структура која веќе две години ја држи Македонија во изолација и која ја доведе државата до економски колапс.

Лагите на ВМРО-ОКГ немаат граница. Но има граница на трпението на граѓаните.

Народот ќе победи. Европска и демократска Македонија ќе победи.

СДСМ

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.