Холивудската ѕвезда, Мег Рајан ќе биде меѓу гостите на овогодинешниот Сараевски филмски фестивал (СФФ), кој се одржува од 16. до 23. август, а по тој повод ќе и биде врачена почесна награда за нејзиниот придонес во филмската уметност, „Срцето на Сараево“, соопштија организаторите во понеделникот.

Рајан на СФФ ќе им се придружи на Џон Туртуро и Александери Пејн, познати актери и режисери чие доаѓање беше најавено претходно. Таа, како и нив двајца, ќе одржи специјално предавање за младите филмски уметници. Нејзиниот час ќе го води наградуваниот босанско-херцеговски режисер Денис Тановиќ, и тоа ќе биде посебна прилика за увид во клучните аспекти на кариерата на Мег Рајан и нејзиниот нов филм „Што се случува подоцна“ (What happens later), кој исто така ќе биде прикажан на СФФ.

„Таа ги освои нашите срца“

Оваа романтична комедија ја режираше Рајан, таа го напиша сценариото и во него глуми заедно со Дејвид Духовни. Тоа е нејзино второ режисерско дело по независниот филм „Итака“ од 2015 година. Мег Рајан, исто така, на публиката на СФФ ќе ѝ претстави посебна проекција од нејзината хит романтична комедија од 1998 година, „Добивте порака“ (You Have a Message).

„Мег Рајан ги освои нашите срца на прв поглед. Не само што нè шармираше сите со своите незаборавни изведби, туку и ја докажа својата вештина зад камерата како режисер и сценарист. Чест ни е да ѝ го доделиме Срцето на Сараево“, изјавил по тој повод Јован Марјановиќ, директорoт на Сараевскиот филмски фестивал.

Има добиено бројни награди

Мег Рајан стекна широко признание за нејзината прва улога номинирана за Златен глобус како Сали Олбрајт во филмот „Кога Хари ја запозна Сали“, во режија на Роб Рајнер и сценарио на Нора Ефрон. Таа продолжи да глуми во хит романтичната комедија на Нора Ефрон, „Бессони во Сиетл“ заедно со Том Хенкс, што ѝ донесе втора номинација за Златен глобус.

Нејзината последна соработка со Ефрон и Хенкс беше романтичната комедија „Добивте порака“ (You Have a Message), која повторно ѝ донесе меѓународно признание на Рајан и трета номинација за Златен глобус.

Таа, исто така, има добиено признанија за нејзините уникатни драмски портрети, вклучувајќи ја и улогата на првата жена војник номинирана за Медал на честа во „Храброста на воинот“ на Ед Цвик каде игра покрај Дензел Вашингтон, како и за изведбата на улогата на жена со проблем со алкохолот во филмот на Луис Мандоки „Кога човек љуби жена“ ( When а Man Loves a Woman), во кој таа глуми со Енди Гарсија. Таа има освоено и номинација за „Independent Spirit Award“ за филмот „Ветена земја“ од Институтот Санденс.

Почесното „Срце на Сараево“ е основано во 2005 година со цел да им оддаде признание на поединци за нивниот исклучителен придонес во афирмацијата и развојот на филмската индустрија и поддршката и развојот на Сараевскиот филмски фестивал.