Трагедијата се случила во неделата на Првиот фестивал на балони во градот Закатекас, Мексико, потврди на социјалните мрежи Родриго Рејес Мугерза, генерален секретар на Закатекас.
Застрашувачко видео прикажува балон на топол воздух како лета со долната страна во пламен. Од балонот се крева чад, додека едно лице може да се види како виси на јаже високо во воздухот.
Мугерза изјави дека еден учесник „го загубил животот по несреќен инцидент“ додека бил во балонот, објави Дејли меил.
„Надлежните служби веднаш пристигнаа на местото на настанот за да му пружат помош и поддршка на повредениот“, изјави Мугерза, додавајќи дека истрагата е во тек.
Човекот починал од повредите, а локалниот медиум „Ривиера Маја њуз“ го идентификувал како 40-годишен маж по име Лусио Н.
Според извештаите, тој бил во балон со уште две лица кога избувнал пожарот, додека тие сè уште биле на земја.
Лусио наводно им помогнал на другите патници да избегаат, но се заплеткал во јажето додека балонот почнал да се крева. Тој бил кренат во воздух, обесен на јаже, а потоа паднал.
Шокантното видео стана вирално на социјалните мрежи, а многумина изразија ужас откако го видоа човекот како паѓа и умира.
Ве предупредуваме дека видеото е вознемирувачко!
„Овој човек е херој. Токму затоа не се занимавам со балони на топол воздух“, гласеше еден коментар.
„Срцекршачко. Неговиот последен чин беше храбар и несебичен. Нека почива во мир“, напиша друг корисник.
„Каква трагична и херојска приказна. Последниот чин на несебичност на Луси, обидувајќи се да ги спаси другите додека се соочуваше со сопствената смрт, зборува многу за силата на човечкиот дух. Почивај во мир. Неговата храброст нема да биде заборавена“, додаде трет.
„Дејли меил“ контактираше со канцеларијата на државниот обвинител на Закатекас за дополнителни информации за случајот, но до моментот на објавување не добиле одговор.
Иако балоните со топол воздух можат да бидат опасни, несреќите ретко се фатални. Студијата на Gitnux наведува дека стапката на смртност е помала од 0,01% по лет.
Податоците од Gitnux тврдат дека балоните на топол воздух се побезбедни од другите форми на воздушен сообраќај, со приближно 1-2 несреќи на 100.000 летови.