Фудбал

Мата потпиша за австралиски Вестерн Сиднеј Вондерерс

Шпанскиот фудбалер Хуан Мата потпиша договор со Вестерн Сиднеј Вондерерс од Австралија.

Австралискиот клуб го потврди трансферот синоќа преку социјалните мрежи.

Прославениот Мата (36) им се приклучува на Вондерерс како слободен играч откако во јануари оваа година го раскина договорот со јапонскиот Висел Кобе.

„Се приклучувам на Вестерн Сиднеј Вондерерс, единствениот австралиски тим кој некогаш ја освоил азиската Лига на шампиони, и едвај чекам да стигнам таму и да почнам да тренирам со тимот за да се подготвам за претстојната сезона“, објави Мата на социјалните мрежи.

Мата ја освои јапонската лига минатата сезона со Висел Кобе, иако одигра само еден натпревар за клубот.

„Трансферот на Хуан во нашиот клуб и тим е бесценет. Хуан ќе му помогне на нашиот тим на теренот, но уште поважно е дека тој ќе биде важна фигура во забрзувањето на напредокот и развојот на нашиот млад тим“, изјави тренерот на Вондерерс, Ален Стајчиќ.

Во својата кариера Мата настапуваше за Реал Мадрид Б, Валенсија, Челзи, Манчестер Јунајтед, Галатасарај и Висел Кобе.

Со Челзи во 2012 година ја освои Лигата на шампиони, додека Светското првенство во 2010 година го освои со шпанската репрезентација, за која забележа 41 настапи и постигна 10 голови./МИА

Регион

Во Брисел продолжува дијалогот меѓу Белград и Приштина

Во Брисел денеска ќе се одржи нова рунда дијалог меѓу Белград и Приштина на ниво на главните преговарачи Петар Петковиќ и Бесник Бисљими.

На средбата во Брисел ќе се разговара за напредокот во имплементацијата на Охридскиот договор и други прашања кои влијаат на нормализацијата на односите меѓу Белград и Приштина, изјави портпаролот на Европската унија, Петер Стано.

Според информациите од дипломатски извори, меѓу темите што Белград ги предложи да се најдат на дневен ред е прашањето за мостот на Ибар, како и формирањето на Заедницата на српските општини./МИА

Македонија

Победа и реми за македонските селекции на шаховската Олимпијада, мажите на високото 25 место

Втора победа во низа забележа македонската машка репрезентација, а второ последователно реми одиграа дамите на Олимпијадата која се одржува во Будимпешта.

Во рамки на 6 коло македонските шахисти триумфираа со максимални 4-0 во дуелот против Хонг Конг и се искачија на високото 25 место на табелата со осум меч поени.

На женскиот олимписки турнир, македонските шахистки ремизираа 2-2 против Киргистан и со 6 меч поени се на 86 место.

Македонската машка шаховска репрезентација во 7 коло за противник ќе ја има Швајцарија, додека шахистките ќе играат против Тринидад и Тобаго.

На шаховската Олимпијада деенска е слободен ден, а 7 коло е на програмата в среда./МИА

Свет

Бројот на загинати од тајфунот „Јаги“ во Мјанмар е 226

Државната телевизија на Мјанмар објави дека жртви на тајфунот „Јаги“ во земјата се 226 лица, а 77 лица се водат за исчезнати, пренесоа француските медиуми.

Патиштата се отсечени, а мостовите се урнати, што го отежнува пристапот до погодените области.

Според Канцеларијата на Обединетите нации за координација на хуманитарни прашања, околу 631.000 луѓе се погодени од поплавите во земјата.

Според истиот извор, поплавите уништиле и речиси 260.000 хектари оризови полиња и други земјоделски култури во земјата./МИА

притисни ентер