Маск: Мојата компанија за шест месеци ќе ги вградува првите чипови во човечки мозоци (ВИДЕО)

Милијардерот Илон Маск вчера изјави дека очекува клиничките испитувања на безжичниот мозочен чип развиен од неговата компанија Neuralink да започнат за шест месеци кај луѓето, откако компанијата ги пропушти претходните рокови што ги постави.

Компанијата развива интерфејси за мозочни чипови за кои вели дека би можеле да им овозможат на пациентите со посебни потреби повторно да се движат и да комуницираат, а Маск вчера додаде дека ќе има за цел да им го врати видот.

Неуралинк, со седиште во заливот Сан Франциско и Остин, Тексас, спроведува тестови на животни во последниве години додека истовремено бара одобрение од Управата за храна и лекови на САД (ФДА) за да започне клинички испитувања на луѓе.

„Сакаме да бидеме исклучително внимателни и да се погрижиме да работи добро пред да го ставиме уредот во човек“, рече Маск во долгоочекуваната изјава за уредот.

Говорејќи пред толпата одбрани гости на презентацијата во седиштето на Neuralink, која траеше речиси три часа, Маск ја нагласи брзината со која компанијата го развива својот уред.

„На почетокот, напредокот, особено што се однесува до луѓето, може да изгледа ужасно бавен, но правиме сè за целосно да го развиеме“, додаде тој. „Значи, теоретски напредокот треба да биде експоненцијален.“

ФДА не одговори веднаш на барањето за коментар.

Првите две човечки апликации на уредот Neuralink кон кои се насочени ќе бидат враќање на видот и овозможување на движење на мускулите кај луѓето кои не можат да го направат тоа, рече Маск.

„Дури и ако некој никогаш немал вид, ако е роден слеп, веруваме дека сепак можеме да му го вратиме видот“, рече тој.

Настанот првично беше планиран за 31-ви октомври, но Маск го одложил само неколку дена претходно без да наведе причина. Последната јавна презентација на Neuralink, пред повеќе од една година, вклучувала мајмун со мозочен чип кој играл компјутерска игра додека самостојно размислувал.

Маск, кој раководи и со производителот на електрични возила Тесла, ракетната компанија SpaceX и платформата за социјални медиуми Твитер, е познат по цели како колонизација на Марс и спас на човештвото.

Неговите амбиции за Neuralink, кој го лансира во 2016 година, се подеднакво големи. Тој сака да развие чип што ќе му овозможи на мозокот да контролира сложени електронски уреди и на крајот да им овозможи на парализираните луѓе да ги вратат моторните функции и да се лекуваат болести како Паркинсоновата, деменција и Алцхајмеровата болест.

Тој зборува и за зајакнување на мозокот со вештачка интелигенција.

Неуралинк, сепак, доцни. Маск во презентација во 2019 година рече дека има намера да добие регулаторно одобрение до крајот на 2020 година. Потоа, на конференцијата кон крајот на 2021 година, тој рече дека се надева дека ќе започне со испитувања на луѓе оваа година.

Neuralink постојано ги пропушта внатрешните рокови за да добие одобрение од FDA за да започне испитувања на луѓе, велат сегашните и поранешните вработени.

Маск се обратил до конкурентот Synchron за потенцијална инвестиција претходно оваа година, откако изразил фрустрација од експертите на Neuralink поради нивниот бавен напредок.

Во јули, Synchron поминал голема пресвртница со првиот имплант на својот уред кај пациент во САД. Доби регулаторно одобрение од САД за испитувања на луѓе во 2021 година и заврши студии кај четири лица во Австралија.

Русите го гранатираа Херсон, три лица загинаа

Три лица загинаа денеска во руското гранатирање на Херсон на југот на Украина, соопштија регионалните власти, додавајќи дека во нападот биле оштетени болницата и училиштето во градот.

„Во денешното руско гранатирање имаме тројца загинати и шестмина повредени – двајца мажи и една жена“, соопштија властите.

Оштетени се голем број инфраструктурни објекти, меѓу кои регионална клиничка болница, училиште, автобуска станица, пошта, банка и станбени згради. Херсон беше под руска окупација од почетокот на инвазијата до ноември, кога се врати под контрола на украинските сили. Оттогаш е редовна цел на руските сили, чии позиции се наоѓаат од другата страна на реката Днепар.

Милков: Скопје има одговорност да ја осигура безбедноста на сите присутни на 4-ти февруари

Освен министерот за внатрешни Демерџиев, во Скопје ќе дојде и првиот бугарски разузнавач, Пламен Тончев, најави вечерва шефот на бугарската дипломатија Милков.

Во интервју за БТВ, тој ја повика Македонија да обезбеди мирно чествување на 4-ти февруари.

-Во Скопје заминуваат министерот за внатрешни Иван Демерџиев и директорот на ДАНС, Пламен Тончев, кои ќе зборуваат за практичните чекори кои треба да се преземат, пред се, за чествувањето на 4-ти февруари. Македонија има одговорност да ги организира тие чествувања, на начин, да бидат зачувани мирот и безбедноста на сите учесници, вели Милков.

- Ние би биле задоволни доколку тие ни дадат информации, кои ние ги немаме, а се однесуваат на поврзаност на бугарски политичари со тајни служби, додава тој.

Санкционирани 109 возачи на територијата на СВР Тетово

Санкционирани се 109 возачи на територијата на СВР Тетово при денешната акциска контрола, информираат од Министерството за внатрешни работи.

– Во периодот од 11 до 17 часот, Секторот за сообраќајни работи и Мобилната единица за безбедност на сообраќајот на патиштата, спроведоа акциска контрола на територијата на СВР Тетово за санкционирање на возачи кои не ги почитуваат сообраќајните правила и прописи. При контролата санкционирани се 109 возачи. Од нив, 22 за возење без возачка дозвола, 44 за непрописно вградени фолии – затемнети стакла, шест за истечена важност на регистрација и осум мерки кон возачи кои вршат јавен превоз на патници. На сите прекршители изготвени им се соодветни поднесоци, се појаснува во соопштението на МВР.

Оттаму наведуваат дека сообраќајните контроли продолжуваат и во наредните денови.

Во соопштението се апелира до сите учесници во сообраќајот да ги почитуваат сообраќајните правила и прописи и заеднички да се придонесе за побезбедни патишта.

притисни ентер