Доктор Иво Бошкоски, Македонец од Тетово, кој е професор по гастроентерологија на Одделот за медицина и транслациона хирургија и високо специјализиран гастроентеролог во Фондацијата Поликлинико на Универзитетот Агостино Џемели IRCCS во Рим, е дел од научниот тим што го освои престижниот истражувачки натпревар ERC Synergy Grant 2025 на Европскиот истражувачки совет.

Тимот на Бошкоски учествуваше со проектот, наречен MULTIPROBE, а се однесува на дијагностицирање и лекување тумори во реално време за време на ендоскопија, со терагностика: туморот се идентификува и карактеризира со „оптичка биопсија“ со висока резолуција и, во исто време, се третира со „ладна плазма“ (што не вклучува топлинска енергија и затоа е многу побезбедно).

Главната цел на MULTIPROBE е развој на хибридни ендоскопи, минијатуризирани уреди кои комбинираат дијагностички и терапевтски функции што никогаш порано не се интегрирани, користејќи револуционерни технички иновации што ја зголемуваат резолуцијата на добиените слики и контрастот за многу моќна оптичка биопсија, а во исто време го зголемуваат и капацитетот за пенетрација на третманот.

- Дополнително, ги комбинира ендоскопските можности со интегрирана терапија со ладна плазма, создавајќи најсовремен терагностички пристап во онкологијата, објаснуваат супервизорите на проектот Стефан Вабниц од Универзитетот Сапиенца во Рим, Масимилијано Папи, вонреден професор по физика на Одделот за невронаука на Католичкиот универзитет Сакро Куоре во Рим, Иво Бошкоски, вонреден професор по гастроентерологија на Одделот за медицина и транслациона хирургија и високо специјализиран гастроентеролог во Фондацијата Поликлинико на Универзитетот Агостино Џемели IRCCS, и Винсент Кудерк од Универзитетот во Лимож. Овој значаен напредок првично ќе се примени во гастроинтестиналната (ГИ) ендоскопија, со цел да се прошири на сите други релевантни медицински дијагностички области.

Synergy Grant 2025 промовира значителен напредок во медицинатат и охрабрува нови истражувања, како и нови методи и техники. Проектот MULTIPROBE ќе трае четири години и ќе биде финансиран со над 6 милиони евра.

- Оваа иновација е поставена да ја револуционизира терапијата на ракот, елиминирајќи ја потребата од посебни процедури и овозможувајќи непречен премин од дијагноза до третман. Како што напредува истражувањето, нашата цел е да ја донесеме MULTIPROBE технологијата од пионерски концепт во клиничката пракса, воведувајќи нова ера во третманот на ракот. Преку ригорозно тестирање, имаме за цел да го воспоставиме овој интегриран пристап како стандард во гастроинтестиналната онкологија, особено за гастроинтестинална дисплазија со низок и висок степен и гастроинтестинални карциноми во рана фаза. Ова сеопфатно, ефикасно и високо ефективно решение ќе им обезбеди на лекарите и пациентите моќна алатка. во нивната борба против ракот, објаснуваат професорите Бошкоски и Папи.

Во истражувачкиот проект MULTIPROBE, покрај „Џемели“, учествуваат и научници од Католичкиот универзитет „Сакро Куоре“, кампусот во Рим и Универзитетот во Лимож.

Македонецот Иво Бошкоски, кој со години има успешна кариера во Италија, е првиот лекар во светот кој воведе иновативен метод со специјална гастроскопија која го исфрла хормонот на глад. Методот дава исклучителни резултати во процесот на слабеење. Првпат во светот, во болницата „Џемели“ во сопственост на Ватикан, каде што се лекуваат папите, д-р Бошкоски користеше сонда од најновата генерација „Мовива“, која овозможува побрзо „горење“ на поголем дел од желудочната слузница.

[Многу подобро е помалку да јадете, ќе се чувствувате поздрави, отколку да се прејадете и да имате здравствени проблеми, вели во интервју за МИА, светскиот доктор, Македонецот од Тетово др Иво]

Неговиот пат до „Џемели“, како што посочи неодамна во интервју за МИА, бил доста долг и тежок. Морал и да работи и да учи во исто време, и кога сите оделе на други универзитети бидејќи им било страв да се обидат на „Џемели“, како најпрестижна клиника и католички универзитет во Италија, тој одлучил да се спротивстави и да се обиде.

- Само кога сакате да успеете некаде, секаде ќе успеете кога имате повод. Има толку многу можности, светот дава за секој да стане некој и нешто, истакнува нашиот светски доктор, кој стана револуционер во откривање метода за намалување на дебелината кај луѓето.

Специјализирал ендоскопија, гастроентрологија, и за себе скромно вели дека е меѓу петте први, број еден, ендоскописти во светски рамки.

Во „Џемели“ клиниката, која е центар за тренинг на глобално ниво, доаѓаат специјалисти од цел свет за да научат нови методи. Особено му е драго, како што вели во интервјуто за МИА, кога доаѓаат од Македонија, а тој на сите се обидува да им помогне за едукација.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.