Забава

Мајка ги оставила своите 4 сина на улица, јаделе туѓи остатоци од контејнер и проселе

Hабргу нивниот живот добил поинаков пресврт...

Браќата Леандро, Кристијано, Енцо и Вилијам живееле во нечовечки услови сосема несвесни за светот во кој живеат.

Леандро, Кристијано, Енцо и Вилијам се родени во сиромашниот дел на Бразил. Бидејќи повеќе не можела да ги храни, мајката ги исфрлила на улица сами да се снаоѓаат најдобро што знаат. Најстариот, Леандро, тогаш имал само шест години, а најмладиот, Вилијам, нешто помалку од две години. Но, Леандро решил да ги заштити своите браќа и тие не се разделувале ни за момент. Станале питачи на улица, а храна наоѓале во контејнер.

По некое време, тие завршиле во сиропиталиште во бразилскиот град Паулиста. Ни во домот немале доволно храна, но барем имале каде да преспијат во текот на ноќта. Во текот на денот, и понатаму проселе на улица, претурајќи по контејнерите во потрага по храна што другите ја фрлале.

Токму таму, додека проселе на улица, Брендон и Џенифер Прат, пар од Ајова кои биле на патување низ Бразил, ги виделе за прв пат. Четирите црномурести и слатки момчиња ги освоиле на прв поглед, па не можеле да ги остават тукутака.

- На прв поглед и Џенифер и јас расплакавме. Веднаш, без никаков сомнеж, знаевме дека тоа се нашите момчиња – изјавил Брендон неколку години подоцна.

Секој ден ги посетувале, им носеле храна и облека и некако успевале да се разберат. Момчињата ги однеле во сиропиталиштето кое било нивен дом, и каде Брендон и Џенифер дознале што се случило со момчињата. Длабоко трогнати од судбината, решиле да ги посвојат, сите четворица, бидејќи браќата не се согласувале да бидат разделени по никоја цена.

Најголем проблем била јазичната бариера. Момчињата не знаеле ни збор англиски, а парот од Америка не знаел да зборува португалски. Сепак, некако се разбирале со момчињата. Иако биле сираци, строгите бирократски правила го отежнале посвојувањето, па Џенифер побарала помош од својот зет адвокат, кој исто така знаел португалски. Момчињата морале да поминат и здравствени контроли, и за чудо биле исклучително здрави, иако практично живееле на улица.

Откако конечно и легално им станале родители, Бредон и Џенифер ги одвеле со себе во Америка. Пред тоа, со нив го посетиле Рио де Жанеиро и сфатиле дека момчињата немаат поим во каков свет живеат. Беа исплашени и воодушевени од подвижните врати кои дотогаш не ги виделе. Исто така, обичните работи, како возењето со автобус, за нив било прекрасно искуство, а кога стигнале на аеродром, децата подзинато гледале во авионот, пишува на веб-страницата Bright Side. Тоа, како што открила Џенифер, за нив било шокантно и застрашувачко.

Пристигнувањето во Ајова за децата од Бразил подразбирало сосема поинаков живот. Нивната радост кога за прв пат виделе снег била неопислива. Набргу тргнале на училиште, а потоа сите четворица почнале да се занимаваат со фудбал. Како што минувало времето, веќе ни јазикот не им претставувал проблем.

- По шест месеци живот во Америка почнаа да зборуваат само англиски. Тоа се случи одеднаш, во еден момент тие престанаа да зборуваат португалски, дури и еден со друг, и зборуваа на англиски. Сега дури и кога ќе ги прашам нешто на португалски, тие одговараат на англиски. „Мислам дека тие одлучија дека е подобро да знаат англиски кога нивниот живот е овде“, изјавил Брендон.

Четири години подоцна, Леандро, Кристијано, Енцо и Вилијам пораснале, а судејќи по фотографиите што ги објавил нивниот татко Брендон, тие се среќни и задоволни од животот во Америка. Сепак, Џенифер открива дека со нив често зборува за Бразил, бидејќи не сака да ги изгубат корените.

- Би сакала еден ден да го посетиме Бразил. Впрочем, тоа е земјата во која се родени и важно е да знаат кои се и од каде доаѓаат – заклучила таа.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

Средба Костадиновски-Шасивари: Институционалниот дијалог е клучен за унапредување на владеењето на правото

Претседателот на Уставниот суд, д-р Дарко Костадиновски и судијата проф. д-р Ана Павловска-Данева остварија средба со министерот за правда проф. д-р Јетон Шасивари.

Во фокусот на средбата беа повеќе актуелни прашања од областа на уставноста, законитоста и функционирањето на уставно- правниот систем.

На средбата беше истакнато значењето на отворениот и континуиран институционален дијалог, особено за прашања кои се од заеднички интерес и кои се однесуваат на унапредувањето на владеењето на правото и правната сигурност.

Меѓу темите за кои се разговараше беа извршувањето на одлуките на Уставниот суд, законските механизми поврзани со нивното извршување, како и решенијата што се разгледуваат во рамки на подготовката на новиот закон за Судски совет и Кривичен законик.

Соговорниците разменија мислења и за актуелните правни и реформски процеси, при што беше нагласена потребата од јасни законски решенија, почитување на уставните надлежности и координирана институционална комуникација за прашања кои имаат пошироко значење за правниот поредок.

На средбата беше изразена подготвеност ваквиот институционален дијалог да продолжи и во иднина.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Свет

Аларм: Северна Кореја лансирала балистичка ракета?

Јапонската влада денес објави дека Северна Кореја лансирала проектил за кој се верува дека е балистичка ракета, објави „Кјодо“.

Јужнокорејските медиуми, исто така, објавија, повикувајќи се на војската на земјата, дека Северна Кореја лансирала неидентификуван проектил во морето источно од Корејскиот Полуостров.

Јужнокорејската војска пред една недела соопшти дека детектирала лансирање балистичка ракета од областа на градот Вонсан на источниот брег на Северна Кореја.

Ракетата прелетала повеќе од 700 километри, а Здружениот штаб на јужнокорејската армија соопшти дека анализата на нејзините карактеристики сè уште е во тек.

North Korea fires possible ballistic missile over Sea of Japan https://t.co/LcpQDo0bxD
— The Right News, Right Now. (@BradPorcellato) August 20, 2026

Тагови: ракета Северна Кореја

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Други спортови

Македонија со седум медали од првата меѓународна завршница на Плазма Спортските игри за млади

Македонија во својата прва сезона на меѓународната завршница на Плазма Спортските игри за млади, која се одржува во Сплит, освои седум медали – три сребрени и четири бронзени.

Нашата земја оваа година за првпат се приклучи кон големото семејство на Плазма Спортските игри за млади, заедно со Хрватска, Србија, Словенија и Босна и Херцеговина.

Оваа година СИМ одбележува голем јубилеј – 30 години од своето постоење, а Сплит деновиве е во знакот на спортот, дружењето и фер-плејот. На големиот спортски настан пристигнаа и бројни познати спортски имиња и легенди од фудбалот, кошарката, тенисот, ракометот и останатите спортови.

Плазма Спортските игри за млади, покрај тоа што обезбедуваат бесплатен спорт за секое дете, ги промовираат вистинските спортски и животни вредности. Најмладите преку спортот учат да го почитуваат противникот, да се борат до последниот момент, но и достоинствено да победуваат и губат. Во центарот на сите натпревари е фер-плејот.

Првиот медал за Македонија во Сплит го освои Наум Насковски од Куманово, кој се закити со бронзен медал во трката на 60 метри во категоријата 2015 година. Во силна конкуренција, младиот македонски атлетичар стигна до одличен резултат и уште еднаш покажа дека Македонија има голем спортски потенцијал.

Медал освои и екипата на „Ролинг“ од Струмица, која го освои третото место во баскет 3х3. Струмичани покажаа одлични кошаркарски вештини и со своите настапи потврдија дека се одлични „баскетџии“. На теренот беше исклучително возбудливо, а младите кошаркари покажаа и атрактивни потези кои потсетуваа на најдобрите баскет сцени. И во оваа дисциплина, во преден план беше спортскиот дух и фер-плејот.

Уште пред заминувањето за Сплит беше јасно дека Македонија има сериозни адути во шахот, а тоа се потврди и на меѓународната завршница.

Во женска конкуренција, Илијана Велева од Свети Николе освои сребрен медал, додека во машка конкуренција Давид Атанасовски од Гази Баба исто така се закити со сребро.

Секој потег беше внимателно осмислен, секоја партија носеше нова неизвесност, а секоја победа беше заслужена со знаење, смиреност и спортски дух. Младите натпреварувачи уште еднаш докажаа дека шахот создава шампиони не само на таблата, туку и во животот.

Македонските „симовци“ продолжија со одличните настапи и во пинг-понг. Јован Пармачки од Берово го освои второто место во машка конкуренција и заслужено се закити со сребрен медал.

Бронзени медали освоија Мартин Ристевски од Прилеп, кој заврши на третото место во машка конкуренција, и Бојана Јовевска од Пехчево, која го освои третото место во женска конкуренција.

Вредно е да се напомене дека Томи Јакимовски доби признание за фер-плеј на тенискиот турнир.

Со седум освоени медали (три сребрени и четири бронзени), Македонија ја завршува својата прва меѓународна сезона на Плазма Спортските игри за млади со одличен резултат и уште една потврда дека младите македонски спортисти имаат што да покажат на меѓународната сцена.

Големото финале на Плазма Спортските игри за млади е предвидено за вечерва во Сплит, а се очекува на теренот да се појават и бројните најавени спортски ѕвезди и гости, со што ќе биде ставена завршната точка на големиот спортски спектакл.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.