Војаџер 1 на НАСА беше лансиран на 5 септември 1977 година од Кејп Канаверал, Флорида со ракетата Титан-Кентаур само неколку недели по нејзината двојничка, Војаџер 2. Иако е дизајниран да трае пет години, повеќе од 43 години откако се лансирани, леталата сепак испраќаат податоци додека го истражуваат меѓуѕвездениот простор, пишува Си-Ен-Ен.

Инструментите на леталото „Војаџер 1“, кој ја премина границата на Сончевиот систем, а потоа влезе во меѓуѕвездениот простор познат како хелиопауза, откриле звуци на плазматски бранови, покажала студијата објавена во понеделникот во списанието „ Nature Astronomy “. Научниците од Универзитетот Корнел проучувале податоци од вселенско летало на 14 милијарди милји од Земјата и откриле емисии на меѓуѕвездени гасови.

"Звукот е многу слаб и монотон затоа што е во тесен фреквентен опсег. Забележуваме слаб и траен шум на меѓуѕвездени гасови", рече Стела Кох Окер, докторант по астрономија на Универзитетот Корнел.

Вселенското летало „Војаџер 1“ на НАСА помина покрај Јупитер во 1979 година, потоа кон Сатурн во 1980 година, пред да влезе во хелиопауза во август 2012 година. Откако влегол во меѓуѕвездениот простор, инструментите на Војаџер 1 откриле осцилации на гасот што го емитира нашето Сонце. Но, истражувачите, исто така, забележале дека постои стабилна и постојана шема меѓу овие ерупции.

"Меѓуѕвездениот медиум е како тивок или нежен дожд. Кога ќе се случат соларни ерупции, тоа е како да снимате молња во грмотевица и тогаш сè да се врати на слаб дожд", рече Џејмс Кордес, професор по астрономија на Корнел и главен автор на студијата.

Истражувачите веруваат дека има повеќе ниско ниво на активност во меѓуѕвездениот гас отколку што се сметало порано. Ова ќе им овозможи на истражувачите да ги следат просторните дистрибуции на плазмата. Податоците на Војаџер 1 исто така можат да им помогнат на научниците да ги разберат интеракциите помеѓу меѓуѕвездените медиуми и сончевиот ветер, постојан прилив на наелектризирани честички што ги емитува Сонцето.

"Никогаш не сме имале шанса да ја процениме таа струја. Сега знаеме дека не ни треба случаен настан поврзан со Сонцето за мерење на меѓуѕвездената плазма. Без оглед што прави Сонцето, Војаџер испраќа детали", додаде научникот од истражувачкиот тим на Корнел, Шами Чатерџи .

Војаџер 1 е најоддалечениот објект во вселената, создаден од човекот и продолжува да функционира, и покрај неговата возраст и растојание.

"Научно, тоа истражување е прилично голем подвиг. Доказ е за неверојатната издржливост на вселенското летало Војаџер. Тоа е долготраен инженерски дар на науката", заклучи Окер за Си-Ен-Ен.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.