Настанот претставуваше значаен момент за младите практиканти, но и за DRÄXLMAIER, која годинава одбележува 10 годишен јубилеј од имплементацијата на дуалниот образовен модел според германски стандарди во земјата. Програмата е дизајнирана да обезбеди ефективна синергија меѓу теоретската настава реализирана во партнерските средни технички училишта и практичната обука која се одвива во најсовремена специјализирана училница во рамки на производствените капацитети на DRÄXLMAIER Македонија. Практикантите се обучуваат од страна на сертифицирани тренери, а преку структуриран менторски пристап директно се вклучуваат во реални производствени и оперативни процеси, со што стекнуваат релевантни технички компетенции, професионални навики и подготвеност за работа во современа индустриска средина. Во знак на признание за постигнатите резултати и покажаниот потенцијал, на дел од најуспешните практиканти им се понудени договори за вработување во DRÄXLMAIER, со што им се овозможува континуитет во професионалниот развој и директна интеграција на пазарот на трудот.

Друг дел од завршените практиканти го продолжуваат своето образование на техничките факултети во земјава. На настанот за одбележување на 10 годишнината кадешто беа доделени и сертификатите за успешно завшена практична настава, присуствуваа дел од родителите, претставници на партнерските технички училишта како и членови на менаџментот на компанијата.

„Програмата за дуално образование претставува стратешка инвестиција во одржливиот развој на индустријата“, изјави Томаш Мацура, Генерален менаџер на DRÄXLMAIER Македонија.

„Веќе една деценија систематски работиме на развој на висококвалификувани млади професионалци кои се подготвени да дадат реален придонес уште од првиот работен ден. Преку практична обука на современа опрема и активно учество во работните процеси обезбедуваме нивните знаења и вештини целосно да одговараат на тековните и идните потреби на пазарот на трудот“.

Како пионер и лидер во имплементацијата на дуалното образование во земјата, DRÄXLMAIER доследно придонесува кон премостување на јазот меѓу образованието и индустријата. Долгорочната стратегија на компанијата е насочена кон создавање кадри со висока додадена вредност кои се целосно подготвени за динамичните барања на современиот индустриски сектор, со што се поддржуваат и одржливото вработување и економскиот раст.

„Драго ми е што имав можност да посетувам практична настава во DRÄXLMAIER и да ги изучувам тајните на мехатрониката, особено во време когa технологијата и дигитализацијата се развиваат со голема брзина, а тука ги има сите можности за учење и за професионален развој. Среќен сум што ќе почнам едно ново поглавје како дел од тимот на DRÄXLMAIER во Кавадарци“, рече практикантот Димитар Панов.

Програмата за дуално образование во DRÄXLMAIER останува еден од столбовите на корпоративната стратегија за развој на човечки потенцијали во компанијата, осигурувајќи дека преку структуриран менторски пристап, современа технологија и тесна соработка со образовниот сектор може успешно да се изградат стабилни, долгорочни и одржливи кариери во индустријата.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Во рамки на Неформалниот министерски совет на Енергетската заедница во Приштина, министерката за енергетика, рударство и минерални суровини Сања Божиновска оствари билатерална средба со министерката за економија на Косово Артане Ризваноли, на која беше потврдена заедничката определба за продлабочување на енергетската соработка меѓу двете земји.

Во фокусот на разговорите беа регионалното енергетско поврзување, сигурноста во снабдувањето, диверзификацијата на енергетските извори и забрзаната интеграција на регионот во единствениот европски енергетски пазар.

Министерката Божиновска истакна дека денешните предизвици бараат партнерства што ги надминуваат националните граници и дека Западен Балкан мора да настапува како поврзан и отпорен енергетски простор.

„Енергетската безбедност денес не се гради поединечно, туку заеднички. Колку повеќе сме поврзани како соседи, толку сме посигурни како држави. Македонија останува силно посветена на регионалната соработка, затоа што само преку заеднички инфраструктурни проекти, интегрирани пазари и координирани политики можеме да обезбедиме стабилно, сигурно и достапно снабдување со енергија за нашите граѓани и стопанството“, истакна Божиновска.

На средбата беше оценето дека регионалната инфраструктурна поврзаност и развојот на нови енергетски коридори претставуваат клучен предуслов за поголема енергетска независност, подобра отпорност на идни кризи и привлекување нови инвестиции во регионот.

Двете министерки ја потврдија подготвеноста за интензивирање на институционалната соработка и за координиран пристап во реализацијата на заедничките енергетски приоритети, во согласност со европските политики и целите на Енергетската заедница.

Божиновска нагласи дека Македонија останува активен и кредибилен партнер во сите регионални иницијативи што придонесуваат за поголема енергетска сигурност, забрзана зелена транзиција и побрза интеграција на Западен Балкан во европскиот енергетски систем.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Денеска (3 јули) во касарната „Илинден“ во Скопје, во присуство на претседателот на Владата, Христијан Мицкоски, министерот за одбрана Владо Мисајловски, началникот на Генералштабот, генерал-мајор Сашко Лафчиски и амбасадорот на Европската Унија, Михалис Рокас, беше реализирана методско показна вежба и беше извршен приказ на тактичко-техничките средства и опрема, набавени преку Европскиот мировен фонд.

На настанот премиерот Мицкоски порача дека приоритет на Владата е да продолжи да инвестира во македонска Армија, со цел таа да остане конкурентна. Тој се заблагодари на Европската Унија затоа што во македонската Армија препозна квалитет, како и на амбасадорот Рокас, за неговата лична посветеност во реализација на процесите за набавка и испорака на опремата.

„Ми останува само да се заблагодарам на амбасадорот за неговата лична посветеност, на Европската унија, што еве донира и препознава во македонската Армија квалитет, посветеност како армија којашто е составен дел на НАТО алијансата. Исто така би сакал да се заблагодарам на мојот колега од Владата, министерот за одбрана, на заменикот, на луѓето од Министерството за посветената работа. Се разбира сакам да ја искористам оваа прилика да ја истакнам работата на началникот на Генералштабот и да се заблагодарам на неговата неуморна работа и посветеност за да може нашата Армија да изгледа вака како што изгледа, да биде конкурентна, да биде подготвена“, рече Мицкоски и истовремено се заблагодари на сите припадници на македонската Армија.

Министерот Мисајловски ја истакна исклучителната соработка со Европската Унија и Делегацијата на ЕУ во нашава земја кои придонесоа оваа набавка да стане реалност за македонската Армија, што е од особена важност за јакнење на одбранбените капацитети.

„Зад мене може да го видите првиот пакет на опрема што стигна [за што] работиме постојано. Се надевам дека во наредниот период ќе најавиме дополнителни пакети каде што ќе опфатат дополнителна опрема“, рече министерот.

Министерот појасни дека станува збор за целосен грант – директни средства од Европската Унија и додаде дека тоа е резултат на нашата Заедничка европска безбедносна политика, нашиот однос, учеството во операциите на ЕУ и постојаната комуникација.

Амбасадорот на Европската Унија во државава, Михалис Рокас истакна дека безбедноста е суштински дел од европското партнерство, особено имајќи предвид дека во 2024 година потпишавме партнерство за безбедност и одбрана. „Ги гледаме резултатите и гледаме како ова партнерство не само што со себе носи нова опрема, туку вклучува и обука. Гледаме извонредни симулирани вежби од страна на силите“, подвлече тој.

Со поддршка на Европскиот мировен фонд набавена е опрема во вредност од над 40 милиони евра, сегментирана во три пакети од кои опремата од првиот пакет и дел од опремата од вториот пакет се пристигнати во земјава. Станува збор за опрема од различен вид – радари, термални камери, транспортни возила, симулатори, 3Д радар и преносни сензори, додека во рамките на третиот пакет ќе пристигне опрема за логистика и комуникациски и пешадиски единици.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.