Македонскиот тим сега останува со шест члена наспроти седумчлениот бугарски тим историчари. Од МНР засега нема одговор дали на местото на Ѓорѓиев ќе назначат нов член, на кое чека и Комисијата да одлучи дали и кој ќе го замени. Во меѓувреме, извори од Комисијата за Канал 5 велат дека немаат пречки за да се состанат со бугарските колеги.
-Најавената, засега усна оставка од Ванчо Ѓорѓиев не значи дека останатите членови и од македонска и бугарска страна не може да се состануваат. И порано се случувало некој да отсуствува поради некакви причини. Што се однесува до носењето на евентуални заклучоци, може да се носат и без еден член. За тоа е потребен само консензус, нешто на што цело време настојуваме. А кога некој не се согласувал со донесениот заклучок секогаш може да има свое издвоено мислење, брифираат од Комисијата.
Ѓорѓиев неодамна поднесе оставка, како што писмено образложи во јавност, поради обиди за политичко влијание и директно мешање од страна на висок функционер во МНР. Оттаму го демантираа, а останатите членови во Комисијата тврдеа дека немало надворешно влијание и се почитувале принципите.
Но дел од бугарската научна јавност упати и критики за обидите на двете страни да ги надминат спорните прашања. Функционирањето на Комисијата во сегашниот формат е излишно, смета Спас Ташев, член на Бугарската академија на науките –БАН.
-Може да се заклучи дека Комисијата не дава резултати, а причина за тоа е не добро осмислената идеја за нејзиното создавање, вели Ташев кој предлага дека треба да се фокусира на популаризација на неспорните факти прифатливи и за Бугарија и за Македонија.
Македонско – бугарската Комисија одржа четири состаноци, а петтиот и последен за годинава според најавите треба да се одржи во декември.