Веста за свршувачката, која дојде по помалку од две години врска, добива дополнителна тежина ако се земе предвид бурното минато на Белорусинката пред да станат пар.

Врската помеѓу Арина Сабаленка и милионерот Јоргос Франгулис стана јавна во април 2024 година, кога за прв пат беа видени заедно на турнир во Мадрид. Оттогаш, тие изгледаа неразделни, а веќе тоа лето, по исклучително тежок период, се чини дека Сабаленка пронајде мир и среќа покрај својот нов партнер.

Таа 2024 година беше обележана со болна загуба за светската тенисерка. Во март истата година, нејзиното тогашно момче и познат поранешен хокеар на НХЛ, Константин Колцов, почина во Мајами. Иако белоруските медиуми првично објавија дека причина за смртта е белодробна емболија, полицијата официјално потврди дека станува збор за самоубиство. Врската со Колцов наводно била прекината непосредно пред неговата смрт, што бил исклучително тежок период за Сабаленка.

Константин Колцов, роден на 17 април 1981 година во Минск, бил истакнат белоруски хокеар и двократен учесник на Зимските олимписки игри (2002 и 2010 година). Неговата кариера била обележана со настапи во бројни лиги, вклучувајќи ја НХЛ, каде што играл за Питсбург Пингвинс, како и КХЛ. Поради неговиот стил на игра и брзина, го добил прекарот „Руска ракета II“. По завршувањето на играчката кариера, работел и како тренер.

Колцов се нашол во врска со Арина Сабаленка во 2021 година, откако претходно се развел од поранешната сопруга, со која има три деца. Неговата смрт, која беше прогласена за самоубиство, остави неизбришлив белег и на белоруската спортска сцена и на Арина Сабаленка, која го загуби својот татко Сергеј само пет години претходно, во 2019 година.

„Поминав низ многу тежок период и ми беше многу важно што Јоргос беше тука за мене - тој секогаш ме развеселуваше, секогаш се обидуваше да направи нешто забавно“, изјави Сабаленка за списанието People, зборувајќи за поддршката што Франгулис ѝ ја даваше во текот на тие месеци.

Арина и Јоргос се запознаа во јануари 2024 година, кога Сабаленка стана глобален амбасадор на брендот за здрава храна на Франгулис „Оукбери“.

Тие прво се сретнаа на деловни состаноци за да потпишат договор. Арина подоцна рече: „Го потпишавме договорот, а потоа се запознавме и некако завршивме заедно“.

Нивната врска, како што рековме, се продлабочи во пролетта 2024 година, откако Арина доживеа лична трагедија со загубата на својот поранешен партнер. Франгулис беше нејзината најголема поддршка и „рамо за плачење“ во тој период.

Кој е Јоргос Франгулис?

Роден во Сао Паоло, Јоргос Франгулис потекнува од семејство со грчко потекло. Тој е најпознат како основач и извршен директор на глобалниот бренд за здрава храна „Oakberry“, кој е специјализиран за производи од асаи бобинки. Основан во 2016 година, брендот се прошири во над 40 земји и има повеќе од 700 продажни места низ целиот свет, а неговото богатство се проценува помеѓу 75 и 100 милиони долари во периодот 2025/2026 година.

Иако студирал право на престижниот универзитет „Fundação Armando Álvares Penteado (FAAP)“, Франгулис отсекогаш знаел дека неговата амбиција е претприемништвото. По дипломирањето, се преселил во Мајами, а потоа во Калифорнија, каде што продолжил да ја развива својата бизнис империја. Покрај деловниот успех, Франгулис има страст за мотоспортот и активно учествува во шампионатите „Porsche GT3 Cup Challenge“.

Интересно е што Франгулис има долгогодишно пријателство со српскиот тенисер Новак Ѓоковиќ, со кого дели интереси за здрав начин на живот и бизнис. Ѓоковиќ беше еден од првите што им честиташе на двојката за нивната свршувачка.

Приватниот живот на Франгулис е обележан и со интересни детали. Во 2016 година, тој го победи ракот на тироидната жлезда, истата година кога ја отвори својата прва продавница „Оукбери“. Неговиот духовен карактер се одразува во фактот дека често оди во црква, нагласувајќи дека разговорот со Бога е добар за него, што, како што вели, го наследил од двете страни на неговото семејство.

За него, тенисот е само еден дел од нејзината личност

- За мене, најважниот дел е по натпреварот, да се осигурам дека таа се чувствува добро воопшто, без оглед на резултатот.

Кога го прашаа за неговата новостекната слава во тениските кругови, тој одговори кратко и јасно:

- Дефинитивно, Арина е она што најмногу го сакам во сето ова! Она што не ми се допаѓа е седењето во ложата.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.