Кина денеска ги предупреди Филипините за заканите по „регионалниот мир“, откако САД одобри продажба на 20 ловци Еф-16 на Манила.
„Соработката меѓу Филипините и другите земји во областа на одбраната и безбедноста не треба да биде насочена против трета страна или на штета на интересите на третата страна. Ниту да го загрози регионалниот мир или да ги влоши регионалните тензии“, изјави портпаролот на кинеското Министерство за надворешни работи Гуо Зиакун.
Вашингтон вчера објави дека одобрил продажба на 20 ловци Еф-16 на Филипините во рамки на договор вреден 5,58 милијарди долари – продажбата, која треба да ја поддржи „безбедноста на стратешкиот партнер“, се вели во соопштението на американскиот Стејт департмент.
Американскиот секретар за одбрана Пит Хегсет, кој беше во посета на Филипините минатата недела, рече дека САД и нивните филипински сојузници треба да „стојат рамо до рамо“ против Кина, во услови на зголемен притисок на Пекинг во азиско-пацифичкиот регион.
Манила и Вашингтон ја зајакнуваат соработката на полето на одбраната по инаугурацијата на филипинскиот претседател Фердинанд Маркос Јуниор во 2022 година и се противат на амбициите на Пекинг во Јужното Кинеско Море.
Кина тврди дека има голем дел од островите и гребените во ова море, вклучувајќи ги и водите и островите блиску до неколку од нејзините соседни земји.
Пекинг денеска спроведува големи воени вежби во близина на Тајван, над кој исто така тврди дека има суверенитет.