„Тој што ќе се оддели од коалицијата ќе го јаде волкот“. Со народна поговорка Биљал Касами му порача на Арбен Таравари дека смета оти подобро е да остане во „Вреди“. Во интервју за РСЕ, Касами оценува дека коалицијата и без Таравари ќе тежи исто колку и со него. Сепак е оптимист дека има реални шанси да продолжат заедно, а ДУИ според него може да биде поразен само со здружен напор, бидејќи, никој од нив поедничено не успеал во тоа. Касами негира дека има лично комуникација со Ахмети, а ги отфрла и информациите дека причина за несогласувањата со Таравари е распределбата на градоначалничките места и советничките листи за претстојните локални избори.
-Јас ценам дека ‘Вреди’ тежи, да не кажам повеќе, но толку без Таравари колку што вредеше и тежеше со него. Сепак, другите чинители се тука. Јас ценам дека најголем губитник ќе биде тој што ќе излезе во случајот со коалицијата ‘Вреди’. Народната поговорка вели – тој што ќе се оддели од групата, ќе го јаде волкот. Во случајот, мислам дека ‘Вреди’ ќе продолжи уште посилно, изјави Касами.
Таравари, пак, во изјава за Канал 5 му одговори на Касами дека последниот збор го имаат гласачите на изборниот ден.
-Секогаш на крај гласачите одлучуваат. Ние може да прогнозираме, на денот на изборите граѓанинот зборува преку дадена поддршка, изјави Таравари.
Факт е дека доколку „Вреди“ се раситни, па макар и со една партија, вкупниот резултат на коалицијата ќе се намали, смета аналитичарот Петар Арсовски. И покрај внатрешните превирања тој гледа можност за смирување на тензиите меѓу коалициските партнери, а поверојатно сценарио според него е Таравари или да ослучи да оди сам на избори или сепак да остане во „Вреди“, наместо да прави обид за соработка со ДУИ.
- Ние не можеме во моментот да кажеме колку тежи секоја од тие партии поеднично во коалицијата бидејќи не настапувале така, но растурањето на коалицијата ќе ја наруши нивната приказна за единство, па сите партии ќе имаат послаб резултат на изборите и таа што би се одвоила и тие кои би останале. Точните бројки е невозможно да се предвидат во моментот но јас гледам дека постои една тенденција за обид за смирување. Мислам дека е тоа притисок од целата владина коалиција на која не и требаат нови фронтови пред локалните избори. Арбен Таравари во моментот ако преговара со ДУИ ја ризикува својата гласачка база, смета Арсовски.
По штурите информации за состанокот кој лидерите на „Вреди“ го имаа пред два дена, а на кој требаше да ги „испеглаат“ коалициските разлики и проблеми, единствено познато е дека Таравари прифаќа преговорите за заеднички настап на локалните избори да продолжат. Како што изјави за Канал 5 работните тимови продолжуваат со работа и се надева на брз договор.