Јужна Кореја по пукотницата: 20 војници од Северна ја минаа границата, изгледа дека заскитаа

Војската на Јужна Кореја испукала предупредувачки истрели откако околу 20 севернокорејски војници накратко ја преминале границата во текот на викендот, соопштија официјални лица.

Севернокорејските трупи во демилитаризираната зона што ги дели двете земји ја преминале демаркационата линија во неделата попладне, соопшти Сеул. Последниот инцидент се случува во време на неодамнешното зголемување на тензиите поради лансирањето на балони полни со ѓубре од страна на Северна Кореја кон југот, пишува Sky News.

Јужнокорејскиот полковник Ли Сунг-Џун рече дека тие не сметаат дека граничниот инцидент е намерен бидејќи областа е густо пошумена, што го отежнува гледањето на граничните ознаки. „Тие свртеа кон север веднаш по испукувањето на предупредувачките истрели на нашата армија. Немаше невообичаени движења“, рече тој.

Новинската агенција Јонхап, повикувајќи се на неименуван јужнокорејски функционер, извести дека севернокорејските војници претежно носеле алатки и се чини дека биле изгубени.

Војската на Јужна Кореја претходно испукала предупредувачки истрели кон севернокорејските војници кои ја минувале границата, но повеќето такви инциденти се случија околу морската граница која што Пјонгјанг ја оспорува. Во меѓувреме, Советот за национална безбедност на Јужна Кореја викендов објави дека ќе го рестартира емитувањето на анти-севернокорејската пропаганда преку звучниците на границата.

Сиљановска Давкова на Самитот за мир: Компромисите можат да го компромитираат европскиот мир

Компромисите со меѓународното право и принципи можат да го компромитираат европскиот и светскиот мир

Претседателката Гордана Сиљановска Давкова денеска се обрати на пленарната сесија на Самитот за мир во Украина, што викендов се одржува во Бургеншток на езерото Луцерн во Швајцарија.

Во обраќањето претседателката оцени дека тековната војна во Украина нè засега сите нас, земјата е изложена на огромно човечко страдање и уништување, безбедносната архитектура на Европа е под закана, а на глобално ниво животите на милиони луѓе се засегнати од тешките економски последици.

„На најсилен можен начин ја осудуваме неиспровоцираната и неоправдана агресивна војна на Русија и ја поддржуваме Украина на најдобар начин, дури и повеќе од она што го дозволуваат нашите ограничени капацитети, ресурси“, рече претседателката Сиљановска Давкова.

Нашата држава, посочи претседателката, се приклучи кон Кримската платформа и целосно се усогласи со Заедничката надворешна и безбедносна политика на ЕУ, а Украина беше главен приоритет за време на македонското претседавање со ОБСЕ во 2023 година.

На хуманитарен план, рече претседателката, се приклучивме на меѓународната коалиција за враќање на украинските деца и обезбедивме цивилна поддршка и итна помош за Украина и за украинските бегалци. Како поддршка на евроатлантските аспирации на Украина, посочи претседателката, испративме воена опрема преку Пакетот за сеопфатна помош на НАТО.

„Како суверена нација, само Украина може да одлучи за својата иднина. Од Украина зависи кога и како ќе ја ангажира Русија за евентуално усогласено решение. Праведниот мир мора да биде вкоренет во принципите на Повелбата на ОН за суверенитет и територијален интегритет. Обидот на Русија да стекне територија со сила е флагрантно кршење на овие основни начела. Кога опасните преседани остануваат неоспорени, тие можат да се претворат во толерирани практики. Компромисите со меѓународното право и принципи можат да го компромитираат европскиот, па дури и светскиот мир и безбедноста. Единствениот начин да се избегне ова е да се почитува Повелбата на ОН и принципите на меѓународното право, без исклучок“, рече претседателката Сиљановска Давкова, истакнувајќи дека воздржувањето од употреба на сила, почитувањето на суверенитетот, територијалниот интегритет и неповредливоста на границите, и заштитата на човековите права и основните слободи, се цврсти принципи за кои не може да се преговара.

Во обраќањето претседателката Сиљановска Давкова рече дека додека се развива рамката за иден мировен договор, ќе продолжиме да ја поддржуваме слободна, независна, демократска и суверена Украина.

Кулеба: Во нацрт-изјавата од самитот во Швајцарија беа земени предвид ставовите на Украина

Украинскиот министер за надворешни работи Дмитро Кулеба денеска изјави дека ставовите на Киев биле земени предвид во завршното соопштение од самитот за мирот во Украина, што се одржа вчера и денеска во Швајцарија.

Кулеба во Бургеншток им изјави на новинарите дека изјавата е „балансирана“, според британските медиуми.

Украинскиот министер додаде дека на овој дводневен настан не се разговарало за алтернативни планови за мир.

Повторно отворен аеродромот во Нова Каледонија

 Главниот аеродром на француската прекуморска територија Нова Каледонија повторно ќе биде отворен за сообраќај откако беше затворен еден месец поради големите судири меѓу полицијата и милитантните борци за независност.

Аеродромот Ла Тонтута, кој го поврзува главниот град на Нова Каледонија Нумеа со летови до Сиднеј, Токио, Сингапур и други места, повторно ќе биде отворен в понеделник, се вели во денешното соопштение на високиот комесар на територијата.

Донесена е и одлука полицискиот час да се скрати за околу два часа, поради „подобрување на ситуацијата и да се олесни постепеното враќање во нормален живот, се вели во соопштението на високиот комесар.

Насилството што избувна на 13 мај поради контроверзните реформи за гласачкото право остави девет мртви, вклучително и двајца жандарми, и голема материјална штета. Како што започна кампањата за предвремените парламентарни избори во Франција, францускиот претседател Емануел Макрон ги суспендираше реформите кои би ги промениле избирачките права во Нова Каледонија.

Туристите заробени поради затворањето на аеродромот беа евакуирани со воени авиони.

притисни ентер