Македонија

Јаневска: Набргу ќе слушнеме уште една, многу покрупна неправилност од оваа, која ќе ја изненади целата македонска јавност

Многу бргу ќе слушнеме уште една, многу покрупна неправилност од оваа, која ќе ја изненади целата македонска јавност. Има многу неправилности во одредени институции, не во сите, и за нив ќе се постапува по закон.

Дали била виновна администрацијата или раководството, дали некои студенти учествувале во ваквите дејства, ќе утврдат соодветните органи - изјави денеска министерката за образование и наука Весна Јаневска коментирајќи ги случувањата на Филозофскиот факултет на УКИМ, каде што од 2019 година противзаконски се запишувале студенти на едногодишни магистерски и докторски студи иако додипломските им биле тригодишни стручни, а не академски.

Се работи за седуммина запишани на магистерски и четворица на докторски студии и нивните уписи, по решение на ДПИ, се поништени и им е прекинато студирањето. Досега не докторирал ниеден, а магистрирале осумина, за кои нема решение дали дипломите ќе им бидат важечки.

Јаневска рече дека Државниот просветен инспекторат (ДПИ), чиј извештај го добила доцна вчера, утврдил каде се пропустите и според тоа ги донел и одлуките како треба да се постапува. Како што рече, Инспекторатот постапувал по поплкаки и жалби на поединци.

- Во текот на викендот ќе го обработиме (извештајот) и в понеделник веќе ќе носиме решение. Министерството и Државниот просветен инспекторат немаат избор, тие мора да постапуваат по закон. Го разбирам, апсолутно, револтот на студентите, но постојат други институции каде што тие ќе си ги бараат своите права. Она што е во ингеренции на МОН од понеделник ќе биде завршено. Сè друго во соодветните институции за да биде и по закон и правадата задоволена. Она што јас како министер и оваа Влада се залагаме и многупати сме го рекле е дека ќе се работи по закон. Постои закон по кој студентите требало да бидат запишани на втор и трет циклус студии. Државниот просветен инспекторат вели дека тој закон е прекршен. Мене ми е многу жал за тоа што им се случува, но кога се запишувале на втор и трет циклус, некој требало да им каже и тие самите да проверат каде се запишуваат - изјави Јаневска одговарајќи на новинарски прашања при посетата на новата лабораторија на Стоматолошкиот факултет при УКИМ.

Посочи дека Агенцијата за квалитет во високото образование од формирањето до пред осум месеци не направила ниедна евалуација, а дека во изминатите осум месеци се направени голем број евалуации со кои се утврдуваат неправилности.

Ректорката на Универзитетот „Св. Кирил и Методиј“ и кандидатка за реизбор, Биљана Ангелова, изјави дека откога ќе заврши целиот процес, ќе објават официјален став за тоа „кој е исходот од целата оваа ситуација“ на Филозофскиот факултет на УКИМ.

- Оваа состојба е затекната за сите нас. Се случувало во периодот помеѓу 2019 и 2022 година во едно сосема друго опкружување и друго раководство. Останува да бидеме трпеливи и да го почекаме конечниот извештај на инспекцијата и да се постапи и тогаш ќе дадеме официјално известување за исходот од целата оваа состојба - рече Ангелова.

На новинарско прашање дека се засегнати и студенти, кои со завршени тригодишни стручни студии се запишале на едногодишни магистерски во изминатите две-три години, ректорката одговори дека мора да го види извештајот за, како што рече, да не се манипулира со податоци за одделни студенти.

- Повторно ќе се испита и нивната состојба и тие се дел од оваа анализа и ќе гледаме во иднина да го премостиме ова. Веројатно ќе се акредитираат и нови студиски програми, ќе се презапишат ако е потребно, меѓутоа законската регулатива мора да биде исполнета. Претходните биле стручни студии и не може да продолжат во понатамошна едукација на академски студии - рече ректорката.

Биљана Ангелова ќе учествува во трката за втор мандат за ректор на УКИМ. Изборите ќе се одржат во вторник, 28 април, нејзин противкандидат е проф. Дарко Данев од Машинскиот факултет. Таа вчера не учествуваше на претставувањето на двајцата кандидати за прв човек на УКИМ, кое го организира Независниот академски синдикат (НАкС).

- Тоа не беше во организација на Универзитетската изборна комисија, ниту на Универзитетот. Информацијата од НАкС ја добив во понеделникот и им најавив дека во текот на вчерашниот ден нема да бидам присутна затоа што веќе претходно имав закажано конференција, која беше во Охрид. Инаку, нашето претставување, на сите единици на Универзитетот и пред целата академската заедница, беше направено во текот на овој изборен период - рече Ангелова.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

Тимчо Муцунски утре во „Само Интервју“

Почитувани, утре во Само Интервју ќе гостува министерот за надворешни работи, Тимчо Муцунски.

Влегува ли Македонија во нова фаза на меѓусоседски политички премрежија?

Случаен или намерен е инцидентот со протекувањето информации за семејството на Премиерот од Софија? Кој и зошто сега одлучи да го крши меѓународното право?

Mоже ли да бидеме реални оптимисти или се подготвуваме за долг престој во чекалната?

На повидок ли е решение за редиците на граничните премини?

Кој ќе ја „преживее“ владината реконструкција, а кои ресори ќе се ротираат?

Кој посакува предвремени избори, а кој има ноќна мора?

Утре кај Гоце Михајлоски во Само Интервју, гостува министерот за надворешни, Тимчо Муцунски.

Европа

Во Франција е потврден прв случај на ебола

Франција го потврди својот прв случај на ебола.

Станува збор за лекар кој се вратил од хуманитарна мисија во Демократска Република Конго. Лекарот бил „веднаш примен во специјализирана установа“ и е во стабилна состојба, објави денес француското Министерство за здравство, пишува Би-Би-Си.

Епидемија во Африка

Демократска Република Конго прогласи епидемија на ебола минатиот месец, но експертите веруваат дека вирусот циркулирал со недели пред официјалното соопштение. Во таа централноафриканска земја, повеќе од 260 луѓе починале од вирусот, а регистрирани се илјада случаи на инфекција.

Ова е првиот потврден случај на ебола во Европа, иако американски лекар кој бил позитивен на тестот во ДР Конго минатиот месец бил лекуван во болница во Германија. Случаи на инфекција се потврдени и во соседна Уганда, каде што Светската здравствена организација (СЗО) наведува дека се заразени 20 лица, од кои две починале.

Француските власти: Ризикот е низок

Министерството за здравство на Франција денеска нагласи дека ризикот за населението е „многу низок“ и дека надлежните служби работат на пронаоѓање луѓе кои можеби биле во контакт со заразениот лекар. Здравствените работници се особено изложени на ризик од ебола, која се шири преку телесни течности. Минатата недела, СЗО објави дека 17 од 75 здравствени работници кои се заразиле со ебола во ДР Конго починале.

Вирус без вакцина и посебни мерки

Актуелната епидемија е предизвикана од сој на вирусот Бундибугио, за кој во моментов нема вакцина. Франција воспостави „специјален систем за надзор“ за хуманитарните работници кои се враќаат од ДР Конго, објави Министерството за здравство.

Ситуацијата во ДР Конго

Според Африканските центри за контрола и превенција на болести (Африка ЦДЦ) и американските власти за јавно здравје, тековната епидемија на ебола има потенцијал да стане една од најголемите досега регистрирани. Случаите се претежно концентрирани во источните провинции Итури, Јужен Киву и Северен Киву.

Итури е главен епицентар на пренос, сочинува повеќе од 90 проценти од потврдените инфекции. Светската здравствена организација предупреди дека конфликтот во источен ДР Конго го отежнува справувањето со епидемијата, бидејќи бунтовничката група М23 контролира големи делови од Северен и Јужен Киву.

Тагови: ебола Франција

Технологија

Мини робот ги средува забите наместо стоматолог- грешката во позиционирањето е помала од 0,2 милиметри (ВИДЕО)

Истражувачи на Универзитетот во Базел развија минијатурен стоматолошки робот кој еден ден би можел автоматски да ги подготвува забите за коронки.

Технологијата би можела да помогне во намалувањето на бројот на закажани прегледи потребни за стоматолошки третман, пишува EurekAlert!

Роботот е развиен од истражувачи на Одделот за биомедицинско инженерство на Универзитетот во Базел. Прототипот е со големина на плута од вино, со димензии само 43 на 26 на 28 милиметри. Неговите мотори и контролен систем се наоѓаат надвор од роботот и се поврзани со него преку флексибилни погонски вратила, кабли и цевки.

„Дизајниран е да биде доволно мал за удобно да се смести во отворена уста“, вели д-р Јукико Томока, прв автор на труд во списанието IEEE Transactions on Medical Robotics and Bionics, во кој истражувачкиот тим го претставува роботот.

Прототипот, наречен „MIR“ - кратенка од „Miniature Intraoral Robot“ - е дизајниран прецизно да ги подготвува забите според дигитален план. Идејата е дека, по скенирањето за време на првиот преглед, стоматолозите можат точно да испланираат како роботот треба да го отстрани забниот материјал и веднаш да ја нарачаат коронката, наместо да чекаат до втор преглед.

Скенирањето се користи не само за планирање на круната, туку и за креирање на прилагодена забна шина на која е прикачен мини-роботот.

„Дури и ако пациентот ја сврти главата, MIR се движи со него“, вели д-р Томока.

Истражувачите го тестирале својот стоматолошки робот на модели на заби од синтетичка смола и на керамички материјал чија тврдост е слична на забната глеѓ. Роботот го подготвува забот во два чекора: прво, користи широка дупчалка за да ја намали површината на забот, отстранувајќи материјал одозгора. Во вториот чекор, подолга, потенка дупчалка ги обработува страните на забот.

Она што е впечатливо е колку прецизно веќе работи стоматолошкиот робот, иако сè уште нема сензори за мерење или директно корегирање на неговата положба. Во тестовите, грешката во позиционирањето била помала од 0,2 милиметри, што дополнително ќе се намали откако сензорите ќе бидат интегрирани во системот.

Тагови: Заби Робот