Свет

Иранците во Британија: Оваа војна само го зајакнува режимот во Техеран

Назанин Загари-Ратклиф и повеќе од 100 Иранци кои живеат во Велика Британија, вклучувајќи тројца поранешни политички затвореници, го повикаа британскиот премиер да не се вклучува во подлабок конфликт со Иран.

Во писмо до премиерот Кир Стармер, потписниците тврдат дека сегашниот начин на водење војна само го зајакнува режимот во Техеран, објавува „Гардијан“.

Војната го зајакнува авторитарното владеење

Писмото е противтежа на оние гласови во иранската дијаспора кои, како Реза Пахлави, протераниот син на прозападен ирански монарх, ги поддржуваат нападите врз Иран како претходница за промена на режимот.

Пахлави понуди да предводи демократска транзиција, но Трамп рече дека бара кандидат од земјата да го води Иран.

„Никој не сака Исламската Република да заврши повеќе од нас. Но, нападот врз земјата на овој начин ќе има спротивен ефект. Тоа ќе го зацврсти авторитарното владеење и ќе внесе живот во фикцијата што ги држеше на власт со децении: дека се борат против западниот империјализам“, се вели во писмото.

„Кога Нетанјаху - човек обвинет за меѓународни воени злосторства откако убил безброј цивили во Газа - го убива диктаторот на Иран, тој убива човек, но го овековечува мит. Иранците сакаа тој да биде суден и казнет за неговите злосторства, а не за мачеништвото по кое копнеел.“

Врховниот лидер, 86-годишниот Али Хамнеи, беше убиен со многу членови на неговото семејство во израелските воздушни напади на првиот ден од војната, а го наследи неговиот син, Моџтаба Хамнеи.

Список на потписници и предлози за мир

Во писмото, групата предлага низа мирни и практични чекори за да ѝ помогне на внатрешната опозиција, вклучително и на затворениците, како што е обезбедување пристап до Старлинк за да се пробие трајната блокада на комуникациите во Иран.

Загари-Ратклиф, британско-иранска државјанка, помина шест години, од 2016 година, во ирански затвор под обвинение за шпионажа. Други потписници се иранскиот политички затвореник Арас Амири, поранешен вработен во Британскиот совет кој поминал три години во затворот Евин во Техеран, и Насрин Парваз, која поминала осум години во иранските затвори од 1982 година.

Писмото го потпишале и истакнати уметници од иранската заедница, како и академици и писатели.

Поддршка на демократските сили

„Продемократската политика би ги заштитила политичките затвореници и би обезбедила Израел и САД да не бомбардираат затвори како Евин. Во овие ќелии се сместени идните демократски лидери на Иран. Продемократската политика би шверцувала интернет опрема - не оружје - преку границата и би ја пробила информациската блокада што е наметната врз земјата.

Продемократската политика би ја осудила израелската политика на атентати, дури и кога целите се лидери што ги презираме. Многу може да се направи во солидарност со Иранците. Но, приклучувањето кон бескрајните војни на Нетанјаху не е вистинскиот пат“, пишуваат потписниците.

Критика кон Израел и САД

Стармер, во меѓувреме, ја прилагоди својата политика на одбивање да соработува во нападите на САД врз Иран, велејќи дека станало неопходно да се спречат иранските напади врз земјите од Заливот. Иранската група во писмото наведува дека се „преплавени од тага“.

„Со децении се надевавме на денот кога иранската демократија конечно ќе процвета. Многумина од нас не можеа да го посетат Иран со години од страв од затвор или полошо“.

Тие исто така го критикуваат израелскиот лидер, тврдејќи дека расизмот е во коренот на неговите политики кога ги повика Иранците „да не седат со скрстени раце, туку да станат и да ја завршат работата“. Тие ја отфрлаат претпоставката зад неговите зборови дека „90 милиони луѓе со децении чекаат без работа неговите бомби“.

„Ова, се разбира, не е само војна на Нетанјаху; Трамп и САД се значаен дел од неа. Но, како што рече американскиот државен секретар Марко Рубио: „Претседателот донесе многу мудра одлука - знаевме дека ќе има израелска акција, знаевме дека тоа ќе предизвика напад врз американските сили и знаевме дека ако не ги нападневме превентивно пред да ги започнат тие напади, ќе претрпевме поголеми жртви“. Значи, САД го следеа Нетанјаху во оваа војна“, се заклучува во писмото.

Тагови: режимот Техеран

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

НБРМ: Компаниите што редовно исплаќале плати преку „АЛТА банка“ АД Битола ќе можат да вршат исплата на плати и придонеси

Народната банка продолжува со постепено олеснување на условите за клиентите на „АЛТА банка“ АД Битола.

Со најновата измена на Решението за администрација се овозможува исплата на плати, заедно со уплата на соодветните даноци и придонеси, за компаниите што во последните три месеци редовно исплаќале плати преку платежните сметки во Банката.

Оваа можност се однесува на компаниите за кои исплатата на плати преку „АЛТА банка“ АД Битола претставува воспоставена практика, односно кои континуирано ја користеле Банката за оваа намена и во трите месеци пред донесувањето на одлуката. Исто така, износот на средствата кои може да се користат од платежната сметка на фирмата во „АЛТА банка“ за исплата на платите може да биде повисок до 5% во однос на вкупниот износ на платите исплатени во октомври. На овој начин се овозможува продолжување на постојните текови на исплата и исполнување на обврските кон вработените и државата, а истовремено се задржува контролата врз одливите на средства од Банката.

Со измената се овозможува и физичките лица во целост да располагаат со новите приливи на своите сметки во „АЛТА банка“ АД Битола, доколку средствата доаѓаат од платежни сметки отворени кај други банки и даватели на платежни услуги. Тоа значи дека граѓаните можат без ограничување на износот да ги користат средствата коишто дополнително ќе им бидат уплатени врз оваа основа.

Народната банка внимателно ја следи состојбата во „АЛТА банка“ АД Битола и продолжува со приспособување на мерките, имајќи ги предвид условите за работење на Банката и потребите на нејзините клиенти. Притоа, приоритет остануваат заштитата на интересите на клиентите и постепеното олеснување на ограничувањата, со задржување на соодветната контрола врз одливите на средства.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Свет

Републиканците го блокираа импичментот на Пит Хегсет, демократите најавуваат нов

Републиканците во Претставничкиот дом на САД го блокираа обидот за импичмент на министерот за Одбрана Пит Хегсет.

Со 211 гласа „за“ и 204 „против“ беше усвоен предлогот за упатување на осумте точки за импичмент до правосудниот комитет.Иницијативата ја поднесе републиканскиот конгресмен Томас Маси, но не доби поддршка од ниту еден друг републиканец.

Демократите го обвинуваат Хегсет за злоупотреба на функцијата и незаконско наредување воени операции во Иран и Јемен.Во обвиненијата се споменуваат и американските напади врз бродови на Карибите, како и заробувањето на венецуелскиот претседател Николас Мадуро. Хегсет ги отфрли обвинувањата, оценувајќи дека обидот за негов импичмент е политичка фарса.Тој ја бранеше воената политика на администрацијата на Доналд Трамп и тврдеше дека неговите наредби биле законски.

Трамп и потпретседателот Џ.Д. Венс јавно застанаа во одбрана на министерот.Демократите, кои по среднорочните избори ќе ја преземат контролата врз Конгресот, најавуваат дека ќе разговараат за нова иницијатива.

Незадоволството од војната во Иран беше и еден од факторите што влијаеја врз изборните резултати.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

Продолжува судењето за „Државна Лотарија“ каде обвинети се Артан Груби и Перпарим Бајрами

Денеска продолжува рочиштето за предметот „Државна Лотарија“. Меѓу обвинетите се поранешниот прв вицепремиер Артан Груби и поранешниот директор на Државна Лотарија, Перпарим Бајрами, како и уште шест лица.

Тие се товарат за злоупотреба на службената положба и овластувања при набавка на видеолотариски терминали.

Според обвинението, со незаконско постапување на државната компанија ѝ била нанесена штета од околу 596 милиони денари, односно 9,7 милиони евра.

Сите обвинети досега се изјаснија дека не се чувствуваат виновни.Бајрами на судењето се појави откако претходно беше во бегство, а притворот му беше заменет со гаранција во недвижен имот вредна над 1,1 милион евра.

На Груби кој исто така беше во бегство пред судењето, му беше укинат домашниот притвор, но останува без пасош и со други мерки на претпазливост.

Тагови: Државна лотарија Артан Груби Основен кривичен суд Скопје

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.