-Јас едноставно не сакав повеќе да бидам жива.И тоа беше јасна, вистинска и застрашувачка постојана мисла, изјави Меган Маркл.
Размислувала за самоубиство, барала помош од кралската палата, но таму биле загрижени за бојата на кожата на нејзиното неродено бебе. Војвотката од Сасекс Меган Маркл пред милионската публика на познатата американска водителка Опра Винфри откри шокантни тајни од животот во кралското семејство, за кое јавноста ретко има можност да дознае детали директно од нив. Во двочасовниот исповед на СИ БИ ЕС, војвотката раскажува за односите со Кејт Мидлтон, со кралицата, чувствителните периоди од животот и суровото соочување со расизмот во нејзината околина.
-Муабетите дека тој нема да има сигурност, дека тој нема да добие титула. И, исто така, загриженост и разговори за тоа колку може да биде темна неговата кожа кога ќе се роди,-Меган Маркл – војвотка од Сасекс.
Гледачите кои со недели зборуваат за ова интервју и замерија на водителката Опра Винфри за директните прашања и моментите кога таа и упаѓа во збор на Меган. Од други пак добива поддршка бидејќи на тој начин војвотката споделила информации кои речиси е невозможно да се дознаат.
-Мислам тоа е тажната иронија на последните четири години. Јас толку многу се залагав за жените да го користат својот глас , а тогаш јас бев тивка.Беше тивка или замолчена ? Второто, одговорила Меган Маркл – војвотка од Сасекс.
За непознати факти од изминатите години, пред камерите зборува и принцот Хари, нејзиниот сопруг, со кој минатата година одлучија да го напуштат кралското семејство. Од денешен аспект, тој не жали за таквиот чекор.
-Татко ми и брат ми се во стапица. Тие не можат да заминат и јас сочувствувам со тоа, вели Принц Хари.
Споделените тајни од најпознатото семејство во Велика Британија се главна вест во сите светски медиуми. Влијателниот Тајмс пишува дека интервјуто излегло полошо и од очекуваното, според некои други со ваквите детали на Меган и Хари може да се наштети на британската монархија, додека пак ББС интервјуто го оцени како поразително.