Овој чекор според премиерот Мицкоски е реформа која ќе даде резултати, за да се избере нов состав кој ќе врши мониторинг врз работата на судиите, без партиски влијанија. Сепак, потенцира дека собраниската процедура сама по себе не значи дека ќе им престане мандатот, туку доколку гласањето за интерпелациите е успешно, очекува самите да си поднесат оставки.
„ Тоа е едно мочуриште кое изобилува со многу контроверзии и скандали. Ние не можеме да направиме целосно распуштање, ниту пак можеме за така кратко време да ги деектираме аномалиите. Но, можеме да избереме судски совет којшто објективно, без партиски стеги.. Јас се надевам дека доколку парламентарнците изгласаат недоверба или инерпелација на членовите на судскиот совет, дека тие истите ќе бидат доблесни и ќе се повлечат. “-Христијан Мицкоски – претседател на Влада.
Оваа вест премиерот ја објави во моменти кога Судскиот совет одржуваше седница. Пред камерите не сакаа да ги коментираат најавите на власта, освен претседателот Александар Камбовски кој изјави дека разрешувања се можни само преку Законот за судски совет.
„ Единствено место кадешто тоа е предвидено е во Законот за судски совет. Иницијативи секој има право да поднесува до Собранието, но тоа е моето мислење. Очигледно постои некое незадоволство спрема одредени членови на судскиот совет. Како што кажав, во оваа држава сите власти мора да делуваме согласно закон и устав. “-Александар Камбовски – претседател на Судски совет.
За идејата на власта, од парламентарните партии засега се огласија од СДСМ. Лидерот Венко Филипче на фејсбук напиша дека ова не е правилниот начин за реформа на правосудството и вели доколку се искрени намерите на ВМРО-ДПМНЕ, решенија да се носат со консезус во Собрание. Опозициската партија бара да се формира заедничка работна група за спроведување на реформите.
„СДСМ како одговорна партија бара заедничка средба на сите политички партии во Собранието, притоа на таа средба да се изгради натпартиски, општ консензус, затоа што постои сериозна опасност доколку еднострано се постапи во делот на самата реформа и ризик од повторна партизација на правосудните органи,“-Мартин Костовски – организационен секретар на СДСМ.
Од 15те членови на Судскиот совет, во Собранието се избираат петмина, од кои двајца се на предлог на претседателот на државата. Во актуелниот состав тоа се Весна Дамева, Татјана Чачарова Илиевска, Павлина Црвенковска, Миљазим Мустафа и Селим Адеми.