Илон Маск повторно го одложува слетувањето на Месечината- откриени нови документи на НАСА - Канал 5

Технологија

Илон Маск повторно го одложува слетувањето на Месечината- откриени нови документи на НАСА

Американската вселенска агенција НАСА можеби нема друг избор освен да ја одложи својата мисија за слетување луѓе на Месечината за повеќе од една година, пишува порталот Политико.

Илон Маск повторно го одложува слетувањето на Месечината- откриени нови документи на НАСА

Причината за новото одложување, како што тврдат, е неможноста на SpaceX на Илон Маск, најбогатиот човек на светот, да ги исполни договорените рокови.

- SpaceX планира да ја извести НАСА дека нема да може да слетува луѓе на Месечината пред крајот на 2028 година, што е повеќе од една година подоцна од планираното од Белата куќа. Компанијата е под притисок да ја подготви својата мега-ракета Starship за слетување на Месечината откако американскиот претседател Доналд Трамп ја прогласи мисијата за политички приоритет за време на неговиот прв мандат. SpaceX ќе го одложи лансирањето планирано за средината на 2027 година за септември 2028 година, според интерен документ до кој дојде Политико - известува новинарката Одри Декер во статија на порталот.

Како што е објавено, компанијата на Илон Маск сè уште не ги потврдила овие датуми до вселенската агенција, но планира да го стори тоа во декември. Ова одложување не би било во согласност со договорот меѓу американската влада и SpaceX.

Во 2011 година, Маск вети дека ќе испрати луѓе на Месечината во рок од три години. Тоа, се разбира, никогаш не се случи. Потоа, во 2017 година, тој објави дека две лица платиле за туристичко патување во лунарната орбита и дека мисијата ќе биде извршена во 2018 година. Подоцна истата година, тој ја промени својата приказна и објави дека луѓето ќе бидат испратени на Месечината до 2022 година и на Марс до 2024 година. Како што знаеме, ниту едното од овие нешта не се случи.

Минатиот месец, вршителот на должноста администратор на НАСА, Шон Дафи, објави дека ќе покани други компании да се натпреваруваат за мисијата на Месечината - Артемис 3 - затоа што SpaceX доцнеше. Ова доведе до напад на Илон Маск врз него. Прво, тој го нарече „Шон Дами“ во твит на X, а потоа рече дека „лицето задолжено за вселенската програма на САД не треба да има двоцифрен коефициент на интелигенција“.

Програмата „Артемис“ беше официјално воспоставена во 2017 година, а првиот лет - мисијата „Артемис I“ - беше успешно лансиран на 16 ноември 2022 година. Првиот човечки лет до лунарната орбита - мисијата „Артемис II“ - беше одложуван неколку пати и моментално е закажан да започне следната година, додека првото човечко слетување на Месечината - мисијата „Артемис III“ - беше планирано (по неколку одложувања) за средината на 2027 година.

Програмата „Артемис“ е именувана по античката грчка божица Артемис, сестра близначка на богот Аполон. Со програмата „Аполо“, Америка стана првата и единствена земја што успешно испрати луѓе на Месечината, а исто така ја доби и првата вселенска трка.

Кога станува збор за вселенската трка, Советскиот Сојуз започна силно - во 1957 година тие беа првите што го лансираа сателитот Спутник во вселената, во 1959 година го испратија сателитот Луна 1 да прелета покрај Месечината, а истата година Луна 3 беше првата што ја фотографираше далечната страна на Месечината, во 1961 година Јуриј Гагарин стана првиот човек во вселената, а потоа во 1966 година го слетаа вселенското летало Луна 9 на Земјиниот сателит. Сепак, на крајот победи Америка со програмата Аполо. Таа го испрати првиот човечки екипаж во лунарната орбита во 1968 година, а потоа и првите луѓе на Месечината во 1969 година. Сепак, САД го прекинаа истражувањето на Месечината во 1972 година, додека СССР го стори тоа во 1976 година. Со децении потоа, немаше успешно слетување на Земјиниот сателит, но во 21 век Кина одлучи да го промени тоа, со што започна нова вселенска трка. Од 2007 година до денес, имало шест мисии на Чанг'е, вклучувајќи сателитски скенирања во 2007 година, слетувања во 2010 година и тестови на ровери... Дури во 2023 година Индија стана четвртата земја што испратила вселенско летало на Месечината, а една година подоцна и Јапонија го стори истото. Русија доживеа дебакл кога се обиде да ја испрати Луна-25 на Месечината во 2023 година, а Америка имаше делумен успех во 2024 и 2025 година - IM-1 Одисеја и Блу Гоуст М1 успешно слетаа на површината на Месечината, но IM-2 Атена и Перегрин не. И САД и Кина објавија планови за слетување луѓе на Месечината пред крајот на деценијата, а потоа изградба на лунарни бази, што во моментов изгледа како научна фантастика.

Тагови: Илон Маск месечината

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Свет

Голема акција во Турција: 350 кг кокаин пристигнале со брод од Бразил

Турската полиција заплени 350 кг кокаин скриен на брод што пристигна во пристаништето Мерсин, прекинувајќи го синџирот на шверц со дрога од Јужна Америка, објавија денес медиумите во земјата.

Голема акција во Турција: 350 кг кокаин пристигнале со брод од Бразил

Министерот за правда Акин Гурлек по повод ова изјави дека турските власти ќе продолжат решително да се борат против злосторствата поврзани со дрога, од изворот до мрежата за дистрибуција, од финансиерите до нарко-босовите.

„Нема да има толеранција за трговците со дрога и нема да има дупки во законот за нарко-босовите“, рече тој, според Хабертурк. Дрогата, вредна приближно 1,5 милијарди турски лири (околу 26,6 милиони евра), беше запленета, а девет осомничени идентификувани преку технички и физички надзор беа уапсени.

Против осомничените е покрената судска постапка за кривично дело производство и трговија со наркотични или стимулативни супстанции.

„Операцијата против трговците со дрога беше спроведена како резултат на работата на Одделот за наркотици на Полициската управа во Истанбул и Одделот за наркотици и разузнавање на Полициската управа во Мерсин“, се вели во соопштението на полицијата.

По информациите дека на брод кој отпловил од Јужна Америка и пристигнал во пристаништето Мерсин има голема количина наркотици, беше утврдено дека товарен брод од Бразил се закотвил во пристаништето. За време на претресот на бродот, запленети се приближно 350 килограми кокаин во 12 големи пакети, заедно со опрема за нуркање и подводен скутер.

Министерот Гурлек во објава на својот профил на социјалните мрежи изјави дека турските власти се борат против нарко-босовите и меѓународните криминални мрежи што ги воспоставиле.

Потсетувајќи дека Ислам Јакут, водачот на меѓународна организација за трговија со дрога, кој беше во бегство од 2017 година, беше уапсен во Истанбул пред два дена, Гурлек објави дека денес нанеле удар врз мрежа за трговија со дрога во Мерсин, која планирала да транспортира кокаин испратен по море од Јужна Америка.

Гурлек изјави дека, како дел од истрагата предводена од Канцеларијата на главниот јавен обвинител на Мерсин, Полициската управа открила план за криење на дрогата во трупот на брод под површината на водата, нејзино извлекување со помош на нуркачи и нејзино транспортирање во западните провинции.

Извор: Б92

Тагови: дрога турција

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

Битола денес беше град на трчањето

Над 1.500 тркачи од 18 земји денес беа дел од 8-мото издание на ТРЧАЈ БЕ 2026, спортска манифестација која од година во година расте и ја зацврстува позицијата на Битола како значајна дестинација за спортски туризам во регионот.

Битола денес беше град на трчањето

Свежото утро создаде одлични услови за трчање, а годинешното издание донесе и исклучителни спортски резултати. На битолската патека беа постигнати најбрзите времиња досега и соборени рекордите на ТРЧАЈ БЕ. Низ улиците на Битола денес трчаа натпреварувачи од различни земји, бодрени од бројна публика, волонтери и сите оние кои беа дел од организацијата и реализацијата на трката.

ТРЧАЈ БЕ е спортски настан, но и приказна за Битола како отворен и активен град кој преку спортот привлекува гости, создава дополнителна вредност за локалната економија и се промовира надвор од границите на државата.

Општина Битола упатува честитки до организаторите на ТРЧАЈ БЕ, до сите институции, партнери, волонтери и служби вклучени во реализацијата, како и до граѓаните кои со својата поддршка придонесоа за атмосферата долж патеката.

Посебни честитки до победниците и до сите над 1.500 учесници кои денес ја истрчаа Битола.

Уште едно успешно издание на ТРЧАЈ БЕ, уште еден голем спортски ден за Битола.

Општина Битола

Тагови: битола

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Метео

Утре сончево со мала до умерена облачност

Времето утре ќе биде сончево со мала до умерена локална облачност. Ќе дува слаб до умерен ветер од северен правец.

Утре сончево со мала до умерена облачност

Минималната температура ќе биде во интервал од 7 до 16, а максималната ќе достигне од 23 до 30 степени.

Во Скопје, претежно сончево. Ќе дува слаб до умерен ветер од северен правец. Минималната температура ќе се спушти до 11, а максималната ќе достигне до 28 степени.

До крајот на новата работна седмица ќе се задржи посвежо и претежно сончево време со мала до умерена облачност во текот на денот. Во вторник наместа во северните делови ќе има услови за повремен дожд. До среда ќе дува слаб до умерен ветер од северозападен правец, а потоа ветерот ќе го смени правецот во југоисточен.

Тагови: сончево

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

притисни ентер