На играчите на Манчестер Јунајтед им треба повеќе време за да го усовршат системот 3-4-3 на новоименуваниот менаџер Рубен Аморим, изјави напаѓачот Расмус Хојлунд откако излезе од клупата и ги постигна двата гола во победата на тимот од 2:1 на гостувањето кај чешката Викторија Плзен во Лигата на Европа.
Данскиот репрезентативец, кој претходно изјави дека формацијата на Рубен одговара на неговиот стил на игра, има постигнато вкупно пет гола на шест натпревари во Лига Европа од почетокот на сезоната.
-Ни треба повеќе време. Сè уште е многу рано. Се работи за адаптација и мислам дека почнува да ни влегува под кожа, но очигледно ни треба уште многу вежбање и време. Немаме многу тренинзи, па мораме да тренираме за време на натпреварите. Знам дека звучи малку чудно, но тоа е најдобриот начин за учење, прокоментира Хојлунд за „ТНТ Спортс“.
Данецот (21), исто така, рече дека Јунајтед се борел со временските услови во Плзен на почетокот на натпреварот пред да се врати во второто полувреме.
-Беше малку тешко. Беше многу студено, условите беа тешки, а теренот беше со кал. Моравме да се справиме со тоа и го направивме во вториот дел, заклучи Хојлунд.