Историскиот лет во понеделникот траеше 39 секунди, а Ingenuity, тежок околу 1,8 килограми, полета на висина од околу три метри, остана на едно место 30 секунди, а потоа се врати на површината на Црвената планета.
Денеска, хеликоптерот леташе цели 52 секунди и имаше покомплексен план за летање, пишува Space.com.
"Хеликоптерот на Марс успешно го заврши својот втор лет додека правеше црно-бела фотографија со својата навигациска камера. Се искачи на поголема височина, леташе подолго и изведуваше страничен лет", напишаа на Твитер вработените во лабораторијата за реактивен погон на НАСА.
За време на денешниот план за летање, Ingenuity требало да се искачи на висина од 5 метри, да лебди во место некое време, а потоа да се движи странично 2 метри. После тоа, морал повторно да лета во место, да ја сними околината со камера во боја, а потоа да слета.
Роверот „ Perseverance “ на НАСА ја гледаше и снимаше целата оваа акција од растојание од 64 метри. Неговите снимки започнале да пристигнуваат на Земјата во 3:20 часот по полноќ.
Марс има една третина од гравитацијата што ја имаме на Земјата, а атмосферата е исклучително ретка, само 1% од густината на онаа на Земјата. Овие фактори го отежнуваат контролирањето на летот на Марс, пишува Си-Ен-Ен.
Хеликоптерот веќе испрати црно-бела фотографија од овој втор лет што ја покажува сенката на хеликоптерот над површината на Марс.
НАСА ќе се обиде да изврши уште три контролирани летови во текот на следната недела.