Индиската држава Западен Бенгал е потресена од немири во последните неколку дена поради силувањето и убиството на 11-годишно девојче, злосторство кое предизвика лавина од насилни протести, линчување и убиство од страна на полицијата на еден од осомничените. Телото на детето беше извлечено од езерото во недела, еден ден откако нејзиното семејство пријави дека е исчезнато. Поради инцидентот во селото Сурџапур на периферијата на Калкута, уште тројца уапсени мажи се во притвор, пишува Би-Би-Си.

Семејството ја обвинува полицијата за неактивност

Членовите на семејството на девојчето рекоа дека последен пат ја виделе во сабота попладне, кога отишла да купи подарок за роденден за пријател. Кога не се вратила дома, околу 20:30 часот отишле во полициската станица за да побараат помош во потрагата.

Семејството и мештаните тврдат дека полицијата не ги сфатила сериозно нивните молби и им рекла дека ќе го истражат случајот следниот ден. Очајни, тие самите ги провериле снимките од безбедносните камери од блиските продавници и ја забележале девојката како шета со Прабхаш Мондал, локален човек кој подоцна бил застрелан од полицијата.

Рано наутро во недела, толпа луѓе отишла во куќата на Мондал, го фатила и го предала на полицијата. Неколку часа подоцна, од езерото била пронајдена торба со телото на девојчето, а медиумите објавија дека Мондал ја одвел полицијата на локацијата. Според извештајот од обдукцијата, причината за смртта била давење, што сугерира дека таа била жива кога била фрлена во езерото.

Насилство на улиците

„Доколку полицијата реагирала порано, можела да биде спасена“, рекле нејзините роднини. Полицискиот извештај оттогаш е изменет за да вклучи обвиненија според строгиот закон за сексуална злоупотреба на деца во Индија. Владата формирала специјален истражен тим за да го истражи случајот, додека полицијата сè уште не одржала прес-конференција ниту одговорила на обвинувањата.

Откривањето на телото предизвикало излив на гнев на улиците. Толпата ги вандализирала патиштата, продавниците и локалната железничка станица. Еден млад човек бил претепан до смрт, а премиерот Сувенду Адикари подоцна изјавил дека станува збор за невино лице.

Неколку полицајци биле повредени, а возилата биле оштетени додека се обидувале да ги спречат демонстрантите. Досега, полицијата евидентираше три случаи и приведе 40 лица. Областа останува напната, на сила е забрана за јавни собири, а редот го одржуваат силни полициски и паравоени сили.

Политички борби и религиозни тензии

Силувањето и убиството на дете се претворија во голем политички спор. Опозициските партии ја обвинуваат новоизбраната влада на Партијата Бхаратија Џаната (БЏП) дека не ги заштитила жените. БЏП, која првпат ја презеде власта во Западен Бенгал во мај, ги негираше обвинувањата.

Сепак, злосторството се случило во најлошиот можен момент за партијата, која ја базираше својата кампања токму на ветувањето за поголема безбедност за жените. Аналитичарите велат дека една од главните причини за поразот на поранешниот премиер Мамата Банерџи била токму растечката загриженост за безбедноста на жените.

Случајот доби и религиозни призвуци бидејќи жртвата била муслиманка, додека уапсените мажи биле хиндуси. Домот на локалниот лидер на БЏП, Сушант Мондал, бил нападнат и ограбен од толпа која го обвинила дека им помага на осомничените. Тој ги негираше обвинувањата, велејќи дека се „лажни“ и дека всушност „помогнал во фаќањето на сторителите“.

Полицијата го уби главниот осомничен

За да го смири гневот на јавноста, премиерот Сувенду Адикари го посети селото во вторник и се сретна со семејството на жртвата. „Нашата влада е посветена на сузбивање на ваквите инциденти. Полицијата си ја врши работата. Разговарав со семејството, тие ја загубија својата сакана ќерка. Верувам дека се задоволни од нашиот разговор“, рече тој.

Помалку од 24 часа подоцна, Прабхаш Мондал беше убиен во „пресметка со полицијата“. Полицијата во среда наутро објави дека Мондал бил однесен на реконструкција на злосторството, но за време на тоа се обидел да го украде оружјето на полицаецот и пукал кон нив. Полицијата возвратила на оган и го погодила. Тој бил однесен во болница, каде што бил прогласен за мртов.

Сомнежи за официјалната верзија

Иако не беа докажани обвиненија против Мондал, неговата мајка се откажа од него и одби да го побара телото. „Двајца полицајци дојдоа на мојата врата. Ми кажаа дека мојот син починал и ме прашаа дали сакам да одам во болница. Им реков дека не можам бидејќи мојот сопруг е болен“, изјави таа за новинската агенција АНИ.

„Им реков, правете што сакате. Немам ништо против. Мојот син беше казнет за она што го стори. Нема да го земам неговото тело“, додаде таа. Сепак, опозициските политичари и активистите за човекови права го доведуваат во прашање легалноста на убиството.

Ранџит Сур од Здружението за заштита на демократските права го нарече случајот „сомнителен“, истакнувајќи дека приказната за полициските конфронтации во Индија е речиси идентична: обвинетиот се обидува да избега со грабнување на оружјето на полицијата, а потоа е убиен. Во 2019 година, во сличен инцидент, четворица мажи обвинети за групно силување и убиство на жена во Хајдерабад беа убиени во полициска пресметка.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.