Прес конференцијата со премиерот Зоран Заев е најавена во 9.15 минути.. Неговата, како и посетата на Рикер утре, доаѓаат во екот на аферата Рекет, случувањата околу СЈО и Предлог Законот за обвинителството.

Реформите поврзани со евроинтеграцијата на земјата и очекувањата наесен на земајва да и биде одреден датум за почеток на пристапните преговори, ќе биде главна тема на средбите што ќе има денеска во Скопје еврокомесарот за проширување Јоханес Хан со претседателот Стево Пендаровски, со премиерот Зоран Заев и со лидерот на опозициската ВМРО – ДПМНЕ Христијан Мицкоски.

Комесарот за европска соседска политика и преговори за проширување на Европската Унија, Хан, со државниот врв и со лидерот на опозицијата се очекува да разговара и за новиот Закон за јавното обвинителство со кој треба да се регулира идниот статус на СЈО.

Во посета на земјава утре ќе престојува и помошникот државен секретар на САД за Европа и Евроазија, Филип Рикер. Тој доаѓа во Скопје од Атина каде што имаше средби со шефот на грчката дипломатија Никос Дендиас, со други владини претставници, како и со поранешниот премиер Алексис Ципрас.

Во Скопје, според најавата од Стејт департментот, Филип Рикер ќе се сретне со претседателот Стево Пендаровски, со премиерот Зоран Заев, министерот за надворешни работи Никола Димитров и други владини претставници. Централни теми ќе бидат билатералните прашања и патот на Северна Македонија кон членство во НАТО и ЕУ. Помошникот државен секретар на САД за Европа и Евроазија, ќе разговара и со пратеници и со претставници на опозицијата.