Да потсетиме, српскиот тенисер не се вакцинираше против коронавирусот и јасно стави до знаење дека не планира да го направи тоа, поради што веќе пропушти голем број турнири.

Најпрестижен е Австралија Опен, од кој лани беше исфрлен, а годинава му беше дозволен влез во Австралија и ја освои 22. Грен слем титула. Според сегашните американски регулативи, странските патници во земјата мора да имаат доказ за вакцинација.

Организаторите на Индијана Велс минатиот викенд објавија дека Ѓоковиќ нема да учествува на турнирот, а се уште не е познато дали Србинот ќе игра на АТП Мајами, турнир кој започнува на 22 март.

Сегашните регулативи го спречуваат да го стори тоа, но Ѓоковиќ би можел да добие специјална дозвола за влез во САД, за што се залагаат бројни влијателни луѓе. Меѓу нив е и републиканскиот гувернер на Флорида, Рон Де Сантис, кого некои го гледаат дури и како можен кандидат на претседателските избори.

„Би организирал брод од Бахамите за да го донесам Ѓоковиќ во Мајами доколку е потребно, секако би го направил тоа. Мислам дека неговиот тим ја разгледува таа опција и не сум сигурен кој би бил најлесниот начин да се влезе во земјата. Мислам дека доаѓањето со брод би било одлично.

Единственото нешто што го спречува Ѓоковиќ да учествува на Мајами опен се ненаучните и неоправдани ставови и предлози на претседателот Бајден за статусот на вакцинација на странските патници. Претседателе, укинете ги забраните и пуштете го Ѓоковиќ да игра“, рече Де Сантис на прес-конференција.

Сегашните ограничувања за патување се за луѓето кои пристигнуваат во САД по воздушен пат, но Си-Ен-Ен вели дека тие треба да важат и за другите начини на транспорт.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.