Култура

Гудачкиот квартет на Пламенка Трајковска на концерт во Бугарија

Во рамките на претставувањето на музичкиот проект „Балканско патување“, гудачкиот квартет на Пламенка Трајковска, на 27 март, со почеток во 18.30 часот, ќе одржи концерт во галеријата на Културно-информативниот центар на РМ во Софија, Бугарија.

На концертот ќе настапат: Пламенка Трајковска - виолина, Милена Гиевска-Андоновска - виолина, Љубица Бошкоска - виола и Александра Јаневска на виолончело. Аранжманите се на Пламенка Трајковска. Концертот е со поддршка на Министерството за култура на Македонија.

„Балканско патување“ претставува музичко-истражувачки проект, во кој се откриваат заедничките музички корени на балканските простори, богатата балканска музичка ризница и одделните мелодиски и ритмички елементи, кои се блиски на регионот, а за кои одделните народи сметаат дека се нивни автентични. Овие заеднички елементи се користени како основа за создавање нови композиции со гудачки квартет.

Во новите композиции струјат неколку доминанти елементи и тоа: влијанијата на класичната музика и сосема класичниот инструментариум на гудачкиот квартет – виолина, виола и виолончело, заедничките мелодиски и ритмички линии од сите региони на Балканот, како и аранжмански пристап кој има за цел да ги отслика музичките прелевања од регион во регион. Сите овие елементи се вткаени во нови музички слики со гудачки квартет и балканска музика, кои имаат само еден наслов: Балканска композиција“, вели Пламенка Трајковска.

Концертот „Балканско патување“ е покана и предизвик за слушателот преку интерпретација на балканските музички слики со гудачки квартет да се нурне во музичката ризница наречена Балканска музика за и преку неа да ја доживее историјата, културата и емоцијата на балканските народи.

х х х

ПЛАМЕНКА ТРАЈКОВСКА – наша еминентна виолинистка и композитор, е постојана членка на државната Филхармонија, како и на музичката организација „Пламенка Трајковска -мали камерни состави“. Има дипломирано на ФМУ, во класата на Проф. М. Куфојанакис и магистрирано на Економскиот факултет, при универзитетот ,,Кирил и Методиј“.

Трајковска гради и негува особен, богат, препознатлив музички израз, постојано проширувајќи ја жанровската и естетската рамка на своите оригинални, воглавно и мултимедијални музички програми. Развојот на камерната музика и доближувањето на класичната музика до најшироката публика, претставуваат повод за создавање и реализација на бројни музички проекти: автор е на албумот „Апасионато“, на единствениот македонски музички албум со кросовер на класичната и модерна музика, на сингловите „Светулки„, создадени во поп романтичен стил, а за најмладите – идните вљубеници во класичната музика, создаден е албумот „Карневал на животните“, од Камиј Сен Санс, адаптиран за виолина и пијано.

Посебен опус на Трајковска е создавањето врз основа на традиционалните фолклорни теми за кои креира аранжмани за гудачки квартет, во класичен стил и аранжмани на традиционални фолклорни теми, во кросовер стил, за гудачки квартет. Од овој опус се композициите: Мајка на Марика, Македонско Девојче, Јовано, Кољо, Слушам кај шумат шумите и Ој девојче .

Пламенка Трајковска има реализирано голем број концерти на најзначајните културни манифестации во Македонија, како и бројни настапи на концертните сцени во Хрватска, Србија, Бугарија, Грција, Франција, Танзанија и Турција.

Национален координатор е на меѓународниот Лајонс музички натпревар Томас Кути. Ја има добиено титулата ,,Витез на хуманоста, за особена помош во заедницата и орден за посебни заслуги на Европскиот музички натпревар, од меѓународниот директор Брајан Шеран. Пламенка Трајковска е и добитник е на наградата ,,Жена со најголеми достигнувања во културата“, за 2022 година.

ххх

МИЛЕНА ГИЕВСКА АНДОНОВСКА е музичар изведувач- виолинист со педагошко- методолошка доквалификација.

Дипломира и магистрира на ФМУ во класата на професор Љубиша Кировски. По завршувањето на школувањето се приклучува на бројни музички проекти, како што е Коштана со Влатко Плевнеш и Кросовер со Пламенка Трајковска, а настапува и со преработки на ирски народни мелодии и други проекти. Гиевска Андоновска соработува и со културно уметнички друштва, како КУД Владо Тасевски од Скопје и со повеќе културно уметнички друштва од Куманово. Во моментов работи како професор по виолина во основното музичко училиште ,,Панче Пешев„ во Куманово.

ЉУБИЦА БОШКОСКА – виола, дипломира на ФМУ во класата на проф. Фросина Балова.

За време на своето образование учествува на натпревари за камерна музика и на семинари по виола. Учесник е во проектот Улични музичари на Град Скопје кадешто настапува со гудачки квартет. Има реализирано повеќе концерти низ Македонија: во Битола, Прилеп, Скопје, Ресен и во други градови. Професор е по виола во музичкото училиште во Тетово, во период 2014 до 2016 година. Во моментов е редовен член на Македонската опера и балет.

ПЕТКОВСКА АЛЕКСАНДРА – виолинчело, дипломира на ФМУ во класата на проф. Жифко Фирфов.

За време на образованието учествува на бројни семинари кај професор Астрид Селита и кај професор Вернер Шмит. Настапува и со оркестарот на ФМУ и членува во помали камерни состави. Со младинскиот интернационален оркестар има настапувано во Берн, Швајцарија. Има реализирано концерти и во Италија, Босна и Херцеговина и во Хрватска.

Од 2009 година е надворешен член на државната Филхармонија. Моментално работи како професор по виолончело во МБУЦ Илија Николовски Луј.

Тагови: Пламенка Трајковска концерт

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

СДСМ: Дали и Савески е на екскурзија?

Клековски конечно прозборе.

Во водата во Гостивар имало „многу различни бактерии и вируси“.

Претходно Мицкоски уверуваше дека водата е технички исправна.

Како знаеше? Имаше „чувство“?

Сега фокусот е на следење хепатит.

Зар истиот Клековски не тврдеше дека епидемијата завршила, иако долго време ја криеше?

Сега повторно има проблем, а тој како „стручњак за хепатит“ ја следи ситуацијата?

Тошковски сигурно исто ја следи - како стручњак за хиперхлорирање и испирање цевки.

А како тогаш со недели уверуваа дека водата е „технички исправна“?

Како граѓаните да ја користат за капење и миење кога во неа имало бактерии и вируси?

Како Мицкоски, Клековски и Тошковски да зборуваат за контрола, кога претходно рекоа дека водата може да се користи?

Клековски минатата недела најавуваше дека водата наскоро ќе биде за пиење.

Сега е полна со бактерии. Не една - туку многу различни.

И сè уште нема ниту еден јавно објавен документ врз основа на кој дозволија користење на „техничка“ вода.

Илјадници луѓе се отруени.

Речиси 5.000 луѓе завршија по болници.

Отруена е и самата болница во Гостивар - пациентите се превезуваат во Тетово.

И сè уште нема никој да одговара, ниту едно име од власта.

Ама знаеме кој даваше изјави дека водата може да се користи.

Знаеме кој дозволи да се користи вода која била загадена уште пред јавноста да дознае за труењето.

Имаме и изјава од Стојанче Ангелов дека има бактерии.

А Обвинителството?

Ало, Савески?

Дали сте на екскурзија?

Или правилото „обвинителот не се повикува“ важи само кога не станува збор за Мицкоски?

Мицкоски може од Собрание, од телевизија и по телефон.

Граѓаните не можат.

Граѓаните сега можат јасно да ги видат на дело сите овие „стручњаци“ на криминалната група ВМРО - почнувајќи од шефот на тендер-бандата, Христијан Мицкоски.

Можете ли да замислите како би се снашле во Корона -криза?

Народниот правобранител веќе отвори предмет.

Граѓаните чекаат.

А Обвинителството сè уште молчи.

До кога?

СДСМ

Тагови: СДСМ

Македонија

На ГП Табановце за влез се чека околу 30 минути, на ГП Богородица за излез се чека околу 30 минути

Сообраќајот на државните патишта се одвива непречено, по суви коловози.

ФРЕКВЕНЦИЈА: Интензитетот на сообраќај на патните правци надвор од градските средини е зголемен. Поради зголемена фреквенција на возила на ГП Табановце времето на чекање за влез во државата е околу 30 минути, а на ГП Богородица за излез од државата времето на чекање е околу 30 минути. На останатите гранични премини од македонска страна, нема подолги задржувања за влез и излез од државата.

ВНИМАТЕЛНО: АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.

СЕЗОНСКИ РЕЖИМ НА СООБРАЌАЈ: Од 15 Април, патниот правец Охрид – Ресен преку националниот парк Галичица е отворен за сообраќај за сите видови возила до 3,5 тона.

ЗАБРАНА ЗА ТЕШКИ ТОВАРНИ ВОЗИЛА: Од 1 јули до 31 август на државните патишта во Македонија се воведува летен времен режим на сообраќај со кој се забранува движење на тешки товарни возила со вкупна маса над 15 тони, за време на деновите од викендот и за денови при екстремно високи температури. Термините се следни:

петок од 17:00 – 22:00 часот,

сабота од 09:00 до 18:00 часот и

недела од 09:00 до 22:00 часот.

Во деновите со екстремно високи температури, определени од Министерство зa здравство, забранaта ќе важи и од понеделник до четврток во период од 11:00 до 17:00 часот.

Ограничувањето не се однесува на возила кои превезуваат животни, цвеќе, хуманитарна помош, жито и житни култури и леснорасиплива стока, нафта и нафтени деривати, превоз на опасни материјали и возила кои вршат превоз за компании кои имаат склучено договори за изведување на проекти на државните патишта со ЈП за Државни патишта.

На магистралниот пат А2 делница: Скопје – Охрид – Скопје (со важност до 01 септември) се забранува движење на тешки товарни возила чија вкупна маса преминува 7,5 тони за време на викендите, во следните интервали:

петок од 15:00 – 22:00 часот,

сабота од 07:00 до 12:00 и од 18:00 до 24:00 часот и недела од 07:00 до 22:00 часот.

Овој посебен режим на сообраќај се воведува во текот на летото со цел избегнување на застојот во сообраќајот на патната делница кон најпосетуваното туристичко место во Република Македонија, намалување на застоите на пунктовите за наплата на патна такса и воопшто побрз проток на возилата и непречено движење на туристите.

Ограничувањето не се однесува на возила кои превезуваат живи животни, цвеќе, хуманитарна помош, жито и житни култури и леснорасиплива стока.

РАБОТИ НА ПАТ:

Од 06.07.2026 г. започна времена измена на сообраќајот при санација на мост на река Брегалница на Р1204 во Штип и ќе трае до завршувањето на санацијата.

Од 21.05.2026 г. во 8 часот ќе се започне со изведување на градежни активности-санација на мостови на државен пат А2 делница Гостивар-Стража конкретно на мост бр.4 Вијадукт на Атанасова река и мост бр.7 Вијадукт на Дол и истата ќе трае до завршување на санацијата. Со таа цел ќе биде воспоставен времен режим на сообраќај кој ќе трае до самото завршување на градежните активности.

Од 14.04.2026 г. се изведуваат градежни активности на Државен пат А2 делница Гостивар – Стража на мост бр.7 Вијадукт на Дол. Со цел да може да се реализираат работите за санација на мостови, ќе биде воспостовен времен режим на сообраќај додека траат градежните активности.

Од 30.03.2026 година, ќе се изведуваат градежни активности на државен пат А2, мостови на А2 на реката Вардар во близина на с.Желино во двата правци (Скопје – Желино и Желино – Скопје), со цел санација на истите. Времениот режим ќе се спроведува согласно Одобрението за временска измена на режим на сообраќај издадено од Министерство за транспорт.

Од 13.03.2026 година започна со активности за изведба на премин на интерконективен гасовод под автопат А1 (М1) Пријателство, делница Смоквица – Гевгелија. На делницата се поставени знаци за времен режим на сообраќај.

На државниот пат А2 (скопска обиколница) се врши рехабилитација во должина од 250 метри од клучка Волково до клучка Кондово. Има поставено соодветна сигнализација за затворањето на левата сообраќајна лента за претекнување. Сообраќајот се одвива по лентата за движење (средна) и лентата за принудно запирање (десна).

Од 12.09.2025 започната е градежната активноста – санација на свлечиште на регионален пат Р1202 делница Косоврасти – Мелнички Мост, односно воспоставена е времена измена на режимот на сообраќај до завршување на активностите.

Според известување од Виадукт Треј Дооел – Гостивар, како дел од изведбата на Коридор 10Д, во тек е важност на времен режим на сообраќај на патен правец Прилеп – Битола, каде ќе се пренасочи движењето на возилата по регионалниот пат Прилеп – Битола, од делот од клучка Лагово до Тополчани.

Тагови: АМСМ

Метео

Денес сончево и многу топло

Времето денес ќе биде сончево и многу топло со мала до умерена локална облачност.

Ќе дува слаб до умерен, а наместа долж Повардарието повремено засилен ветер од северен правец кој повремено ќе достигнува брзина од 40 km/h. Во попладневните часови особено во северните делови, ќе има локален развој на нестабилност со краткотраен пороен дожд и ретки грмежи. Минималната температура ќе биде во интервал од 12 до 20, а максималната ќе достигне од 33 до 40 степени.

Во Скопје, сончево и многу топло со мала до умерена облачност. Ќе дува слаб до умерен ветер од северен правец. Минималната температура ќе се спушти до 18, а максималната ќе достигне до 39 степени.

За време на викендот и во текот на следната седмица ќе се задржи сончево и многу топло време со појава на мала до умерена облачност во текот на денот. Во попладневните часови ќе има појава на локален развој на нестабилна облачност со пороен дожд и ретки грмежи.

Тагови: сончево