„Паѓа ли во вода“ најавуваната екстрадиција на екс-премиерот Никола Груевски од Унгарија? – По објавата на унгарската истражувачката мрежа VSquare, дека поранешниот премиер добил целосно Унгарско државјанство уште во 2022 година, повторно се отвори прашањето дали Будимпешта воопшто ќе го испорача во Македонија – оти државата јавно има декларирано дека генерално не екстрадира свои државјани.

Од Министерството за правда, кои во изминатиов период ја интензивираа постапката за екстрадиција велат дека внимателно ги следат информациите во јавноста и дека независно од истите продолжуваат со постапката согласно домашните закони и билатералните договори.

-Независно од сите шпекулации и неофицијални информации за евентуалниот статус што го има во Унгарија, Никола Груевски останува државјанин на Република Македонија и е лице кое е предмет на правосилни судски одлуки и активни постапки. Министерството за правда нагласува дека постапката за негова екстрадиција продолжува согласно домашното законодавство, билатералните договори и меѓународните конвенции. Во рамки на своите наджености, Министерството и натаму ќе ги презема сите неопходни правни и дипломатски чекори во комуникација со надлжените органи во Унгарија. - Министерство за правда

За ова беше прашан и премиерот Мицкоски, на што тој кратко одговори:

-Немам таква информација.

И да биде одземен политичкиот азил, кој го најавуваше новиот премиер Петер Маѓар, одземањето или поништувањето на државјанстово е значително потешко, оти не почива само врз политичка волја, туку тоа значи институционален процес, кој на Груевски му нуди правни механизми и поголема сигурност, според тамошната легислатива. Токму поради ова, дел од правниците сметаат дека ваквиот момент би можел речиси целосно да ја закочи ионака долгогодишната и неизвесна постапка за негова екстрадиција.

-Во секој случај, ако добил и Унгарско државјанство ќе ја отежни целата постапка околу екстрадицијата, дополнително, што во мигот кога доби азил, го доби меѓудругото затоа што сметаа унгарските власти дека е политички прогон. Сево ова заедно ја отежнува, ако не ја прави и малку невозможна екстрадицијата. Ако Унгарија има таква пракса, може да се повика било кој на таа судска нивна пракса, но верувам дека и нивни билатерални спогодби, и во нивните прописи постои ваква одлука. Унгарија е членка на ЕУ, таму законодавната власт е одделена од извршната, и судската од извршната и законодавната, па верувам ќе се почитуваат правните правила, за разлика од некои други земји каде што е пресудна политичката волја и моќ.- Звонко Давидовиќ – Адвокат

Министерството за правда минатиот месец најави дека повторно ја активира постапката за екстрадиција на Груевски и побараа компетна документација од судовите, обвинителствата и МВР за сите актвини и стари предмети против него како подготвка за евентуално ново барање до Будимпешта. Првото барање за екстрадиција беше испратено во 2018 година, дополнувањето во јуни 2019, а во август истата година Унгарија официјално го одби барањето, оти екс – премиерот добил азил.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.