Град Скопје продолжува со втората фаза од проектот за целосна реконструкција на зелениот појас на десната страна на кејот на реката Вардар, која се одвива во повеќе фази со цел воспоставување на мултифункционален модерен јавен простор со ново зеленило, информираат од Градот.

-Во втората фаза се започнува со обнова на зелениот појас на кејот на реката Вардар на потегот од мостот Беласица до мост Генерал Михајло Апостолски, при што со овој проект се формира нов зелен појас со нова хидрантска мрежа на површина од 12.000 квадратни метри и должина од над 1.500 метри, велат од Градот.

Проектот во сите фази го изведува јавното претпријатие Паркови и зеленило Скопје.

На покана на Генералниот секретар на Интерпарламентарното Собрание на Православието (ИПС на Православието), шефот на Делегацијата на Собранието во ИПС на Православието, пратеникот Миле Талевски, вчера присуствуваше на состанокот со Вселенскиот Патријарх Вартоломеј во Истанбул.

На средбата, информираат од Собранието, се разговараше за предизвиците со кои се соочува денешнината, споменувајќи ја агресијата на Русија врз Украина, конфликт кој покрај тоа што има силно геополитичко влијание, претставува конфликт меѓу два народа со православна вероисповед. Беше нагласена потребата да се промовира заедништвото, толеранцијата и соживотот, бидејќи поделбите не прават послаби и го уназадуваат човештвото.

Се разговараше и за одбележувањето на 1700 години од одржувањето на Првиот Вселенски собор одржан во Никеја, денешен Изник, Туркије. Првиот вселенски собор се одржал во 325 година, бил свикан од Светиот цар Константин Велики и е првиот Вселенски собор на Христијанската Црква.

Состанокот со Вселенскиот Патријарх Вартоломеј се одржува во соработка со координативниот Комитет од Иницијативата „Велигден Заедно 2025“, каде што членува и ИПС на Православието. На средбата, пред Вселенскиот Патријарх Вартоломеј беше претставен и новиот претседател на Генералното Собрание на ИПС на Православието Јоан Вулпеску, кој е пратеник во Парламентот на Романија. Дел од Делегацијата на ИПС на Православието беа и пратеници од парламентите на Грција, Кипар и Србија кои исто така се дел од ИПС на Православието.

На состанокот му претходеше литургија за празникот на Воздвижение на Светиот крст во црквата „Свети Георгиј Победоносец“, во Фанар, Истанбул која ја служеше Вселенскиот Патријарх Вартоломеј.

Европската Унија останува цврста во својата заложба да ја зајакне и брани демократијата и во и надвор од нејзините граници, се вели во заедничката изјава на високиот претставник на ЕУ за надворешна политика и безбедност Жосеп Борел и потпретседателката на Европската комисија за демократија и демографија Дубравка Шуица по повод Меѓународниот ден на демократијата – 15 септември.

Тие нагласуваат дека во текот на оваа 2024 година речиси половина од жителите во Земјата во над 70 држави имаа или ќе има можност да изберат свои претставници, потврдувајќи ја со тоа својата посветеност на демократијата, често и во предизвикувачки околности, без разлика дали се кандидати или гласачи.

- Европската Унија ги поздравува оние кои ја бранат демократијата, често изложени на голем личен ризик. Одржувањето на демократијата е клучно за зачувување и унапредување на достоинството на секој граѓанин, како и за поттикнување на социјалната правда, инклузивен развој и мир, се наведува во пораката.

Борел и Шуица потенцираат дека во различни региони на светот луѓето се соочуваат со закани и обиди за поткопување на демократските процеси, интегритетот на изборите и темелите на демократијата преку политичко насилство, изборна манипулација, измами, злоупотреба на државни ресурси, ширење дезинформации или странско мешање.

- Со распоредување на мисии за мониторинг на изборите и други инструменти за поддршка на демократијата, ЕУ работи на идентификување, одвраќање и издавање препораки, со цел да овозможи и охрабри активно учество на изборите. Ова не е само задача од еден ден: Посветеноста на Европската Унија се протега и надвор од изборите. ЕУ ги поддржува демократските принципи на учество, еднаквост, отчетност и транспарентност, со фокус на вклучување на жените, децата и младите во јавниот живот, порачуваат Борел и Шуица.

Тие нагласуваат дека ЕУ го поддржува граѓанскиот сектор и заштитниците на човековите права, се бори против корупцијата, се стреми да го подобри владеењето на правото и ги поддржува независните медиуми, безбедноста на новинарите и борбата против дезинформациите, истовремено промовирајќи правична дигитална трансформација.

- Ова се дел од основните вредности што не дефинираат. Последната деценија покажа дека демократијата е кревка и бара постојана будност. Мора да продолжиме да работиме на зајакнување на издржливоста на нашите демократии и да ги потиснеме сите обиди за нивно уништување, во и надвор од ЕУ. На овој Меѓународен ден на демократијата, ја потврдуваме нашата поддршка на сите оние кои се залагаат за демократските вредности и универзалните права и ја нагласуваме колективната одговорност за градење отпорни, инклузивни општества за сегашните и идните генерации, истакнуваат Борел и Шуица во заедничката изјава по повод Меѓународниот ден на демократијата – 15 септември./МИА