Наука

Големо откритие на Марс: НАСА пронајде досега најубедлива трага за можен живот

Роверот „Персеверанс“ на НАСА откри сложени органски молекули во карпите на Марс, што научниците го сметаат за еден од најсилните индикации дека Црвената планета можеби некогаш била погодна за живеење.

Иако ова не е доказ дека животот всушност постоел, откритието предизвика големо возбудување во научната заедница.

Органскиот јаглерод е пронајден во глинени карпи на локацијата „Брајт Ангел“ во долината Неретва, област каде што пред милијарди години течела река и се влевала во кратерот Језеро. Научниците веруваат дека водата можеби создала услови погодни за развој на живот.

Зошто е толку важно ова откритие?

Инструментот „Шерлок“, опремен со роверот „Персеверанс“, користел ултравиолетов ласер за да детектира макромолекуларен јаглерод во карпа наречена водопади Чејава. Она што е особено значајно е што органскиот материјал се наоѓа на површината на карпата, која успеала да се спротивстави на зрачењето и хемиската оксидација, процеси кои се многу ефикасни во уништувањето на ваквите траги на Марс.

Дополнително внимание е посветено на необичните дамки на карпите кои личат на обрасците што ги оставаат фосилизираните микроорганизми на Земјата.

„Ова би можело да биде најјасниот знак за живот што некогаш сме го пронашле на Марс“, рече Шон Дафи, поранешен вршител на должноста администратор на НАСА.

Ова не е прв пат органска материја да се најде на Марс. Роверот „Кјуриосити“ претходно регистрираше слични траги на локација оддалечена повеќе од 3.200 километри, дополнително зајакнувајќи ја претпоставката дека условите погодни за живот некогаш биле широко распространети низ голем дел од планетата.

За конечниот одговор ќе мора да се почека

Иако откритието претставува голем научен чекор, тоа сè уште не е доказ за постоење на древен живот. Органската материја може да се формира и преку природни геолошки процеси, што ќе бара детални лабораториски анализи на Земјата.

Како што објаснува истражувачот на Лабораторијата за млазен погон на НАСА, Кајл Укерт, инструментите на роверот не можат со сигурност да разликуваат дали пронајдената органска материја е формирана преку биолошки или неживи процеси. Затоа, дефинитивен одговор ќе биде можен само кога примероците ќе пристигнат во лабораториите на Земјата.

Тука се појавува нов проблем. Мисијата на НАСА за враќање примероци од Марс во моментов е ефикасно на чекање поради недостаток на средства, а нов план не се очекува до следната деценија. Во меѓувреме, Кина планира да ги врати своите први примероци од Марс на Земјата уште во 2031 година, па затоа би можела да направи едно од најголемите научни откритија во модерната историја ако биде првата што ќе потврди дека некогаш постоел живот на Марс.

Тагови: марс НАСА

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

СДСМ: Мицкоски ќе ја „држи“ цената на струјата со заем- сметката повторно ќе ја плаќаат граѓаните

Уште едно задолжување. Ново.

Арамијата Мицкоски пак излегува со истата трик-приказна. Сега преку ЕСМ сака заем од околу 33 милиони евра за батерии во Битола. Ќе ви каже: ова е за да не скокне струјата.

Не е.

Батериите не прават евтина струја. Ја ставаат струјата во склад и ја пуштаат подоцна.

Како фрижидер за киловати. Тоа може да помогне на мрежата. Ама не ја плаќа вашата сметка.

Заемот е долг. Долгот се враќа. ЕСМ веќе тоне - има загуба над 100 милиони евра, помалку домашна струја, поскап увоз.

Кога државната фирма нема пари да го врати кредитот, го враќа државата. Државата ги зема парите од граѓаните: од данок, од сметка, од тоа што нема за плати и пензии.

Денес велат - нема поскапување.

Утре стигнува каматата.

Цената не ја држат. Ја кријат во заем.

ВМРО-ОКГ така работи со сè. Концерт - “нула денари“ за диџејот, па Лотарија плати 5,5 милиони евра.

Сега струјата „ја држиме“, а граѓаните ќе ја враќаат - со 33 милиони плус камата.

Ако сакаше евтина струја, ќе произведуваше дома. Ќе ја среди ЕСМ. Нема. Се задолжува.

Нема бесплатни батерии.Има кредит. Има камата. Има банда што слави заем како грижа.

Граѓанинот плаќа два пати - еднаш на бројило, втор пат кога се враќа заемот.

Скопје, 16.09.2026

СДСМ

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Балкан

Во судот во Хаг почна изрекувањето на пресудата за Тачи, Красниќи, Весељи и Селими

Обвинителството во завршните зборови побара 45 години затвор за обвинетите Тачи, Красниќи, Селими и Весељи.

Судот во Хаг во 10 часот почна со изрекувањето на првостепената пресуда против четворица поранешни команданти на таканаречената ОВК - Хашим Тачи, Кадрија Весељи, Реџеп Селими и Јакуп Красниќи, кои се обвинети за воени злосторства и злосторства против човештвото против најмалку 407 затвореници, од кои најмалку 102 беа убиени.

Атмосферата во Хаг е напната - поддржувачите на ОВК ја чекаат одлуката пред судот. Во судницата се обвинетите, членовите на нивните семејства, кососвски министри, претседателот на здружението на поранешни членови на ОВК Хисни Гуцати, како и пратеници од демократската партија на косово.изрекувањето на пресудата, како што е најавено, ќе трае два часа, од 10 до 12 часот.

Обвинителството во завршните зборови побара 45 години затвор за обвинетите Тачи, Красниќи, Селими и Весељи. Обвинението ги товари врз основа на индивидуална кривична одговорност за шест точки за злосторства против човештвото и четири точки за воени злосторства.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

Град Скопје: Набавуваме 3.300 нови контејнери – чекор кон почисто Скопје

„Добив исклучително ниска цена за набавката на 3.300 контејнери, двојно поевтино од било кога во минатото“, изјави Ѓорѓиевски.

Градоначалникот на Град Скопје, Орце Ѓорѓиевски, синоќа информираше дека за десетина дена ќе започне испораката на 3.300 нови контејнери, со кои значително ќе се унапреди системот за собирање и управување со отпадот во главниот град.

„Добив исклучително ниска цена за набавката на 3.300 контејнери, двојно поевтино од било кога во минатото“, изјави Ѓорѓиевски.

Тој посочи дека со новите контејнери, заедно со новите специјализирани комунални возила, во значителна мера ќе се надмине состојбата со отпадот во Скопје и ќе се создадат подобри услови за одржување на јавната хигиена.

Покрај новите контејнери и комунални возила, Градот Скопје наскоро ќе ги стави во функција и новите метлачки и цистерни. Нивната употреба ќе придонесе за почисти улици, булевари и јавни површини, што е од директен интерес за сите граѓани.

Ѓорѓиевски најави и иницијатива која ќе биде доставена до Советот на Град Скопје, со која се предвидува еден ден во месецот депонирањето отпад на депонијата „Дрисла“ да биде бесплатно за граѓаните.

„Со конкретни мерки и инвестиции продолжуваме да работиме на подобрување на комуналната хигиена и создавање почист и поуреден град за сите скопјани“, порача градоначалникот.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.