Иако дводневната средба во Софија се уште трае, ставовите на двајцата копретседатели искажани синоќа на Бугарската национална телевизија, навестуваат дека разговорите пропаднале уште пред официјално да завршат. И Димитров и Ѓоргиев соопштија дека нема договор за средниот век во учебниците по историја, зашто како што велат, различно го перцепираат периодот од 9 век, кога според бугарската историографија, бил создаден бугарскиот идентитет.
-Големото несогласување со нашите колеги е дека во 9 век и потоа, кога поголемиот дел од географска Македонија стана неразделен дел од бугарската држава во период од два века, се формира бугарската националност. Тоа нашите колеги не сакаат да го прифатат, вели Ангел Димитров, предводник на бугарската страна на Комисијата
-Формирање на таа бугарска народност ние не го спориме, но дека е формирана на целокупната територија и дека сите верски и идеолошки слоеви не влијаеле на тоа население да се формира на друг начин и да формира други идентитети, тука не се сложуваме, изјави Драги Георгиев, предводник на македонската страна на Комисијата
Денеска на маса е прашањето за Гоце Делчев, кое и Ѓоргиев и Димитров го осудија на неуспех, уште пред да ги почнат денешните разговори.
-Доколку оваа Коамисија инсистира да утврди дали Гоце Делчев бил Бугарин или Македонец, решение нема да има. Во тоа време не станува збор за „еден црно-бел свет" и не постоела јасна поделеност на бугарска или македонска свест, вели Ѓоргиев.
-Ако не се знае каков е човекот, не можеме точно да го оцениме неговото дело. Гоце Делчев сам кажал каков е. Тоа го кажало и неговото семејство, вели Димитров
Ова е девета и последна предвидена средба на мешовитата Комисија за годинава. Бугарскиот историчар Димитров вчера побарал до крајот на годинава да се одржи уште една.