Невакцинираните вработени ќе треба да работат од дома, пишува Би-Би-Си.

Правилата стапуваат на сила следниот месец, а нивната цел е да дозволат укинување на другите правила воведени поради пандемијата.

Минатата недела, извршниот директор на банката ги повика работниците да се вратат во канцелариите. Во внатрешното писмо се вели: „Од 12 јули, сите вработени, клиенти и посетители ќе треба да потврдат дека се целосно вакцинирани доколку сакаат да влезат во зградите на Морган Стенли во Њујорк и Вестчестер“.

Морган Стенли веќе вовеле работни простори во некои оддели кои можат да ги користат само вработените кои биле вакцинирани.

На почетокот на овој месец, извршниот директор на Морган Стенли, Џејмс Горман, рече: „Ако можете да влезете во ресторан во Њујорк, можете да влезете во канцеларијата“.

Говорејќи на конференцијата, Горман рече дека ќе биде „многу разочаран“ доколку американските работници не се вратат во канцелариите до септември.

Џејми Димон, шеф на најголемата американска банка ЏП Морган, неодамна изјави дека сака вработените во САД да се вратат во канцелариите од јули.

Во меѓувреме, банкарите на „Голдман Сакс“ добиле упатства да ја известат компанијата дали биле вакцинирани пред да се вратат во своите канцеларии.

Во декември, Комисијата за еднакви можности за вработување на САД им даде на компаниите дозвола да забранат невакциниран персонал да доаѓа на работа, со исклучок од религиозни и медицински причини.

Извршниот директор на Баркли, Џес Стали, во февруари рече дека работењето од дома „не е одржливо“. На виртуелниот состанок на Светскиот економски форум, тој рече: „Растечкиот предизвик ќе биде одржување на културата и соработката што овие големи финансиски институции се трудат да ги имаат и треба да ги имаат“.

Инаку, истражувањето објавено од Би-Би-Си минатиот месец покажало дека 50-те најголеми британски работодавци не планираат да ги враќаат вработените во канцеларија со полно работно време.