Одлуката доаѓа како одговор на растечката закана што ја претставуваат беспилотните летала, објавува Политико.

Зборувајќи во Берлин, Добриндт рече дека зголемувањето на упадите со дронови над Германија и соседните земји е дел од „трајна хибридна закана“ што вклучува сè, од мали комерцијални квадрокоптери до координирани роеви беспилотни летала.

„Ова е трка во вооружување - помеѓу заканите со беспилотни летала и одбраната од беспилотни летала“, рече Добриндт, додавајќи: „Ова е трка што не можеме да си дозволиме да ја изгубиме“.

Зголемени закани во регионот

Законодавниот потег следи по серија инциденти со беспилотни летала низ Данска и северна Германија, што предизвика сериозни загрижености за безбедноста и можната шпионажа.

Во последните денови, беспилотни летала се забележани над бројни аеродроми и воени бази во Данска. Главниот аеродром во Копенхаген дури беше привремено затворен претходно оваа недела откако големи беспилотни летала беа забележани во ограничен воздушен простор.

Нов центар и нови технологии

Предлогот на министерот Добриндт се базира на два клучни столба. Првиот е формирање на национален центар за одбрана од беспилотни летала што ќе ги здружи ресурсите на федералната и покраинската полиција, федералната канцеларија за кривични истраги и германските вооружени сили (Бундесвер).

Целта на центарот ќе биде да го здружи буџетот, да промовира истражување и да го координира развојот на нови технологии за пресретнување, вклучувајќи системи за попречување, преземања и контрамерки „дрон-до-дрон“.

Вториот столб на предлогот е амандман на германскиот Закон за безбедност на воздухопловството од 2005 година. Новиот закон експлицитно би му дозволил на Бундесверот да интервенира како воена помош на цивилните власти во ситуации кога полициските капацитети се недоволни за справување со заканата.

„Ова, секако, вклучува и опција за соборување беспилотни летала“, нагласи Добриндт.

Правни предизвици и уставни ограничувања

Сегашната законска рамка во Германија ѝ дозволува на полицијата само ограничена употреба на системи за попречување на сигналите или мрежите, што создава безбедносни празнини во одбраната од поголеми или милитаризирани беспилотни летала.

Проширувањето на воените овластувања на домашен план покренува сложени правни прашања, бидејќи германскиот устав му забранува на Бундесверот да извршува редовни задачи за внатрешна безбедност. Ангажирањето на армијата на домашна територија е дозволено само во исклучителни ситуации, како што е помош при катастрофи, и по изрична барање на цивилните власти.

И покрај овие уставни пречки, Добриндт најави дека предлогот за измена на законот ќе биде презентиран во парламентот веќе оваа есен.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.