Германија ги отфрла руските тврдења дека ја поддржува Украина поради реваншизам - Канал 5

Европа

Германија ги отфрла руските тврдења дека ја поддржува Украина поради реваншизам

Германскиот министер за надворешни работи, Јохан Вадефул синоќа ги отфрли обвинувањата од Москва дека поддршката на Берлин за Украина е водена од реваншизам.

Германија ги отфрла руските тврдења дека ја поддржува Украина поради реваншизам

Германскиот министер за надворешни работи, Јохан Вадефул синоќа ги отфрли обвинувањата од Москва дека поддршката на Берлин за Украина е водена од реваншизам, нарекувајќи ги таквите тврдења обид за одвлекување на вниманието од сопствените акции на Русија.

Русија претходно изјави дека германската надворешна политика кон Украина е обликувана од „фантазии за одмазда“, обвинувајќи го Берлин дека е опседнат со расчистување на историските сметки. Во соопштението издадено по годишната прес-конференција на Сергеј Лавров, руското Министерство за надворешни работи наведува дека безусловната поддршка на Германија за Украина е дел од реваншистичка агенда.

Зборувајќи за време на средбата со министерот за надворешни работи на Нов Зеланд, Винстон Питерс, Вадефул истакна дека Русија се обидува да го пренасочи вниманието од своето сегашно однесување. Тој додаде дека Германија нема проблеми да се соочи со сопственото минато и ја признава улогата на Советскиот Сојуз во поразот на нацистичкото владеење во Втората светска војна.

Вадефул нагласи дека Германија признава дека жртвите на нацистичката агресија вклучуваат луѓе од Украина, како и од други нации на поранешниот Советски Сојуз, додавајќи дека оваа историска реалност не се оспорува во Германија. Истовремено, тој порача дека Берлин нема да прифати обиди за замолчување на критиките кон денешните постапки на Русија, пренесе ДПА.

Руското Министерство за надворешни работи, исто така, го критикуваше фактот што 80 години по крајот на Втората светска војна, германското оружје повторно масовно се користи за гаѓање на руска територија.

Во руското соопштение се посочува дека германските вооружени сили веќе се стационирани во Литванија. Доколку Берлин го проба истото во Украина, војниците би биле третирани како „легитимни цели“, алудирајќи на дискусијата за учество на Германија во меѓународни безбедносни сили по завршувањето на војната во Украина.

Вадефул изјави дека секое евентуално распоредување на германски трупи за помош во обезбедувањето на иден мировен договор би зависело од тоа дали Русија ќе создаде услови за стабилен безбедносен поредок. Тој додаде дека потенцијален договор би вклучувал одредби за тоа дали странски сили можат да бидат стационирани на украинска територија и во каква форма.

За да престанат непријателствата, Москва бара Украина не само да се откаже од приклучувањето кон НАТО, туку и да направи значителни територијални отстапки.

Тагови: Германија русија

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Свет

Се урна Цесна во Велика Британија: Двајца загинаа

Две лица загинаа откако лесен авион се урна на поле во Есекс, соопшти британската полиција.

Се урна Цесна во Велика Британија: Двајца загинаа

Двоседниот авион Цесна се урна вчера попладне, кратко по полетувањето од аеродромот Норт Вилд на планирано „кратко патување“, објави Скај њуз.

Идентитетите на жртвите сè уште не се објавени.

Тагови: Велика Британија Цесна

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

Ѓорѓиевски: Поради силното невреме, кризниот штаб и екипите на јавните претпријатија се на терен

Градоначалникот на Град Скопје, Орце Ѓорѓиевски соопшти дека поради силното невреме, кризниот штаб и екипите на јавните претпријатија се на терен.

Ѓорѓиевски: Поради силното невреме, кризниот штаб и екипите на јавните претпријатија се на терен

„Почитувани граѓани,

Поради силното невреме кое во текот на денешниот ден го зафати Скопје, Кризниот штаб на Град Скопје, заедно со службите и јавните претпријатија, е целосно мобилизиран и подготвен за брза интервенција на терен, доколку има штети, поплави или потреба од итна реакција.

🫡 Во постојана координација сме со ЦУК, МВР, ЕВН, Противпожарната бригада на Град Скопје и сите надлежни институции.

Сите капацитети се ставени во функција, со една цел навремена заштита на граѓаните и спречување на поголеми последици.

Екипите на Град Скопје ќе бидат на располагање во текот на целата ноќ и ќе интервенираат секаде каде што ќе биде потребно.

Не можеме да го запреме невремето, но можеме организирано, одговорно и заеднички да спречиме поголеми штети.

Ги повикувам граѓаните на внимателност, смиреност и соработка со надлежните служби.

Службите се на терен.

♥️ Граѓаните не се сами.“- соопшти скопскиот градоначалник.

Тагови: Орце Ѓорѓиевски

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

Тошковски и Дачиќ од Табановце ја започнаа заедничката кампања „Вози одморен“

Одморен возач е најдобрата превенција за безбедно патување

Тошковски и Дачиќ од Табановце ја започнаа заедничката кампања „Вози одморен“

Министерот за внатрешни работи Панче Тошковски, заедно со претседателот на Републичкиот совет за безбедност на сообраќајот Горан Ангеловски, денеска на граничниот премин Табановце, со министерот за внатрешни работи на Република Србија Ивица Дачиќ и вршителот на должност директор на Агенцијата за безбедност во сообраќајот на Република Србија Бранко Стаматовиќ, официјално ја означија првата заедничка превентивна акција „Вози одморен“.

Кампањата има за цел да ја подигне свеста кај возачите за опасностите што ги носи заморот зад воланот, особено во екот на летната туристичка сезона кога значително се зголемува фреквенцијата на возила на Коридорот 10, од граничниот премин Табановце до граничниот премин Богородица.

Во своето обраќање, министерот Тошковски истакна дека оваа убава кампања и заедничките превентивни активности се уште една потврда за успешната соработка меѓу двете соседни и пријателски држави.

„Заедно со нашите колеги од Србија испраќаме силна порака дека превенцијата е најдобриот начин за заштита на човечките животи. Возачите кои во овие жешки денови тргнуваат на подолги патувања треба да бидат одморени, а за време на патувањето да прават пауза на секои два до три часа, во траење од најмалку петнаесет минути. Во рамките на патувањето да консумираат доволно вода во рамки на патувањето, да ги почитуваат сообраќајните правила, особено брзината на движење, Најголем број на сообраќајните несреќи се случуваат затоа што имаме преголем умор на оние што го управуваат возилото или затоа што го управуваат пребрзо. Заради сето тоа сметам дека ова е клучна кампања, бидејќи човековиот живот нема цена, еден човечки живот да спасиме сите ние заедно повеќе, ќе биде благодат за сите нас.“, истакна Тошковски.

Министерот Тошковски потсети дека со имплементација на One Stop системот со Република Србија, чекањето на овој граничен премин, од неколку часа е намалено на максимални половина час овие денови иако фреквенцијата на патници е зголемена од 15 до 20 проценти.

Министерот Тошковски исто така апелираше до сите што транзитираат низ Коридор 8 и Коридор 10 во Македонија, дека камерите на „Безбеден град“ функционираат, работат и евидентираат сообраќајни прекршоци.

„Секој сообраќаен прекршок што е сторен од 01.02.2026 година од пуштање на системот во работа, ќе се достави до секој еден што направил прекршок без разлика дали управувал моторно возило со македонски или со странски регистарски таблички. За брзо ќе бидете сведоци на конкретната имплементација на вториот чекор којшто се однесува во однос на достава на казните на оние кои управуваат моторни возила со странски регистарски таблички и почетокот биде токму од овој граничен премин.“, нагласи министерот Тошковски.

Министерот за внатрешни работи на Република Србија Ивица Дачиќ ја нагласи важноста на оваа заедничка иницијатива, оценувајќи дека таа претставува пример за успешна регионална соработка во интерес на безбедноста на сите учесници во сообраќајот и уште еднаш ја потенцираше одличната соработка меѓу двете министерства и двете полиции во сите сфери на безбедноста.

„Наш приоритет е да биде спасен секој човечки живот, особено животот на најмладите и тоа е голема работа. Затоа апелираме до сите возачи да патуваат одморени и одговорно, посебно на долгите летни дестинации“, порача Дачиќ, додавајќи дека соработката со македонската полиција во реализацијата на оваа превентивна акција има особено значење во периодот кога илјадници туристи транзитираат низ двете држави.

Во рамки на кампањата, на возачите кои поминуваа низ граничниот премин Табановце им беа поделени шишиња вода, едукативни летоци со совети за безбедно возење и промотивен материјал со препораки за спречување на сообраќајни незгоди предизвикани од замор.

Оваа превентивна активност претставува дел од заедничките напори на двете министерства и институциите задолжени за безбедноста во сообраќајот за намалување на бројот на сообраќајни незгоди и заштита на животот и здравјето на сите учесници во сообраќајот за време на летната сезона.

Тагови: Панче Тошковски

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

притисни ентер