Почна пукање на делови од дискотеката, настана стампедо и заклучивме дека не можеме да излеземе. Кога паднав, почувствував дека врз мене капе жешка течност.

Со потресно сведоштво на членови на бендот ДНК, денеска продолжи рочиштето за пожарот во дискотеката „Пулс“.

Придружната вокалистка Ана Костадиновска опиша како започнал пожарот, кој како што кажа, првично не го сфатиле сериозно. Подоцна сцените наликувале како од хорор филм.

„Кога тргнавме кон излезот, оние луѓе кои не успеавме да излеземе навреме, почна пукање, многу топлина почна да се чувствува, настана стампедо пред излезот, заклучивме дека не можеме да излеземе. Со Сара Пројковска го поминавме шанкот, кон тоалетите и кон вратата, тука се створи метеж, не разделија и повеќе никогаш не се видпвме. Паднав пред самиот излез, настана паника, хаос, страшен мирис кој тераше на спиење. Еден дечко ми помогна, кој беше прилично свесен и не држеше сите будни во таа стапица од луѓе и мислев дека нема да излезам, имаше многу луѓе над мене, беше како сцена од хорор филм. Потоа се почувствува свеж воздух кој ни даде надеж дека ќе се спасиме, се отвори целосно вратата, ја ослободив ногата и ме извлекоа надвор. Мислам дека ме извлече Јован, дечкото од Виница кој спаси повеќе луѓе.“

Гитаристот на бендот, Горан Тонев кажа дека од пожарот има тешки повреди, кои се уште не му се залечени. Сведокот Алберто Миладинов пак рече дека и кобната вечер, но и претходно не им барале лична карта при влезот, но и дека секогаш добивале дојава ако има полициска рација.

„Од билетарата купивме билет, потоа ја дадовме на еден од обезбедувањето, a друг ни стави печат на раката, за да се знае дека сме платиле влезница. Лична карта на вратата не ни побараа од обезбедувањето. Најчесто преку бројот на инстаграм вршевме резервација. Секогаш дознававме пред да дојде полиција и да врши рација, од каде беше информацијата не знам.“

Таткото на загинатата во пожарот, Надица Наунова, Александар Наунов повторно го искажа револтот што дискотеката долг период работела, а била регистрирана како салон за теписи.

Адвокатот Петре Шилегов, на денешното рочиште упати остри критики до судот и обвинителството, посочувајќи на очигледни двојни аршини при одредувањето на мерките за обезбедување на обвинетите.

Адвокатката на сопственикот на „Пулс“, Дејан Јованов, на денешното рочиште побара судот да донесе решение за пренесување на Јованов во затворот во Идризово, бидејќи затворскиот персонал од затворот во Куманово, како што рече, се однесува „деградичарки нечовечки и понижувачки кон обвинетиот“.

Следното судско рочиште е закажано за 5-ти март.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.