Овие таканаречени „жичени камикази дронови“ предизвикуваат сериозни промени во начинот на борба, а украинските и руските сили сè почесто ги користат, пишува Гардијан.

Капетанот Јуриј Федоренко од украинската дрон-единица „Ахил“ вели дека станува збор за одговор на сè посилното попречување на конвенционалните ФПВ дронови.

„Ако пилотите се искусни, можат да летаат ниско, меѓу дрва, каде што стандардните дронови губат сигнал“, објаснува тој.

Руските сили моментално имаат предност во користењето оптички дронови, пред сè благодарение на подобриот пристап до кабли. Тие особено се истакнаа за време на контраофанзивата кај Курск, кога со овие дронови уништија значајни украински позиции.

На фронтот, борците и медицинските тимови веќе ги чувствуваат последиците. Во регионот Покровск, дневните евакуации на ранетите станаа речиси невозможни поради неможноста за попречување на дроновите. „Тоа сега е главниот проблем на првата линија“, вели еден воен болничар.

Експертите проценуваат дека дроновите, вклучувајќи ги и оптичките, учествуваат во 70 до 80 проценти од сите воени загуби на фронтот. Оптичките дронови, според аналитичарот Самуел Бенедето, први влегуваат во напад бидејќи не се подложни на електронско попречување. Тие ги нишанат противничките системи за попречување и со тоа го отвораат патот за стандардните дронови.

Во импровизирани работилници, како една во Харков, украинските сили изработуваат стотици дронови, од кои сè повеќе се опремени со оптички кабли. Проблем остануваат цената и обуката – каблите се чувствителни, а на пилотите им треба посебна обука поради поинаквото управување.

Украинскиот претседател Володимир Зеленски најави забрзување на производството.

- Од почетокот на годината развиени се повеќе од 20 сертифицирани модели на овие дронови. Единаесет домашни фирми веќе ги произведуваат, рече тој.

Командантот на армијата, генерал Олександар Сирски, извести дека се погодени „77.000 непријателски цели“ со дронови, вклучително и оние со домет до 20 километри.

Во исто време, украински дронови погодија фабрика за производство на оптички кабли во Саранск, длабоко во територијата на Русија. Руски извори тврдат дека тоа била единствената таква фабрика во земјата.

Сепак, и за оптичките дронови постојат противмерки. Освен мрежи кои ги фаќаат каблите, украинските сили експериментираат со техники за пресекување на жиците. „Сите прашуваат дали може кабелот да се уништи. Ќе кажам само дека е многу цврст, но работиме на тоа“, вели Федоренко, наведува Гардијан.

Фото: Гардијан

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.