На интернет се прошириле фотографии од нејзиното излегување на кои се гледа како опуштено ужива во друштво. Премиерката тој ден вечерала во ресторан, а потоа продолжила да се забавува со сопругот Маркус Раиконен и пријателите.
Немало да биде ништо проблематично во тоа, доколку нејзиниот министер за надворешни работи не доби позитивен тест за ковид во саботата, поради што премиерката и некои нејзини министри требаше да бидат во изолација и да избегнуваат контакти.
Откако финскиот таблоид објави фотографија од премиерката како забава во ноќен клуб, Марин се извини во интервју за јавната телевизија.
„Згрешив. Требаше повнимателно да ја разгледам ситуацијата“, изјавила Марин во интервјуто.
Имено, Марин и нејзините двајца министри биле изложени на коронавирус на состанокот одржан во петокот, на кој присуствувал и министерот за надворешни работи Пека Хависто, кој во саботата доби позитивен тест за ковид-19.
Премиерката подоцна на Фејсбук напишала дека вечерала во ресторан кога ѝ се јавил нејзиниот државен секретар од кого дознала дека била изложена на вирусот претходниот ден.
„Ми рече дека министрите не мора да бидат ставени во карантин затоа што примиле две дози од вакцината“, напишала Марин на Фејсбук, обидувајќи се да објасни зошто не се изолирала.
Сепак, од кабинетот на премиерката подоцна соопштиле дека во саботата испратиле СМС пораки до експонираните министри и премиерката, во кои им порачале дека биле изложени на вирусот ден претходно и дека треба да избегнуваат контакти со луѓе.
Обидувајќи се да ја објасни својата одлука, Марин рече дека го оставила службениот мобилен телефон дома и со себе го зела само приватниот телефон.
Финската премиерка беше тестирана двапати од саботата, секој пат негативна, исто како и нејзините министри кои биле изложени на вирусот во петокот.