Негата на кожата е приоритет на повеќето жени. Иако денес постојат многу третмани за разубавување, сè повеќе дами применуваат природни препарати кои докажано не предизвикуваат алергиска реакција.

Еден од природните производи во чија ефикасност се колнат дури и холивудските ѕвезди е кокосовото масло. Иако порано главно се користеше исклучиво за нега на косата, кокосовото масло се покажа како одличен препарат за кожата. Ова масло има антибактериски и антивоспалителни својства, што го прави одличен избор за нега на кожата на лицето и телото, пишува „Ју-Ес -Тудеј“.

Што треба да знаете за кокосовото масло?

Кокосовото масло се цеди од свежо или суво кокосово месо, белиот дел од плодот. Билното масло се произведува како рафинирано и нерафинирано, или девствено масло. Маслото што се цеди од кокосовото месо доколку не е подложено на понатамошна обработка, ги задржува своите својства.

Од друга страна, рафинираното кокосово масло се подложува на обработка за да се неутрализира и избели, ова има бела боја и текстура на путер. Според стручните лица, рафинираната верзија е подобра за готвење, дерматолозите препорачуваат девствено или нерафинирано кокосово масло за нега на кожата.

Се верува дека редовната употреба на кокосово масло ги намалува знаците на стареење и ги омекнува постоечките брчки. Ова магично масло позитивно влијае на темните дамки, ги смирува благите кожни лезии, го поттикнува зараснувањето на раничките и гребнатинките на кожата, и е незаменливо за изгореници, вклучително и оние предизвикани од прекумерно сончање. Истражувањата покажале дека кокосовото масло може да помогне да се спречи губењето на влажноста на кожата и во заштитата од надворешните фактори, како хемикалии и алергени.

Како влијае на кожата?

Состојбата на кожата е еден од најважните показатели за добро здравје. Многу истражувања покажаа дека секое нарушување поврзано со најголемиот орган на човечкото тело може да влијае дури и на менталното здравје.

Кокосовото масло, како што истакнуваат експертите за „Инсајдер“, може да помогне и кај одредени кожни болести како атопичен дерматитис или егзема.

Ума Наидо, авторката на книгата „Ова е мозокот на храната“ ги фали антивоспалителните придобивки од кокосовото масло и додава дека ова масло може да помогне и при други дерматолошки нарушувања бидејќи „ја подмачкува и смирува кожата“. Кокосовото масло обезбедува и заштитна бариера од иритации на околината и штетни микроорганизми, но не обезбедува заштита од сончева светлина и нема да ве заштити од УВ зраците при сончање, но ја смирува кожата по претерано изложување на сонце, особено кога сте на море.

Дали треба да користите кокосово масло за вашето лице?

Кокосовото масло има бројни придобивки и е добро за многу типови на кожа, но има луѓе на кои им пречи неговата мрсна структура, па затоа треба да го избегнуваат, особено за лицето. Ова особено важи за луѓето со мрсна кожа и склони кон акни, бидејќи голема е веројатноста тоа да ги зачепи порите на лицето и дополнително да ја влоши состојбата на кожата.

За да видите дали кокосовото масло е добро за вашата кожа, стручните лица препорачуваат да почнете со мала количина за да видите како таа реагира на него. Сепак, иако многумина го користат и за кожата и за косата, треба да се знае дека кокосовото масло не е на водена база и не треба да се нанесува секаде.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.