Освен со дрегери за присуство на алкохол, полицајците на терен наскоро ќе прават и проверки за дрога со брзи тестови од плунка кај возачите. Набавени се 10 илјади парчиња кои во првата половина од август ќе стигнат до МВР, по што ќе следува мала обука на службениците кои во иднина во сообраќај ќе ги користат овие тестови по проценка. Тие кои ќе управуваат со возило под дејство на дрога и бидат фатени од полицијата, ќе одговараат за кривично дело по член 297а од КЗ - за безобзирно управување со моторно возило.

„Тестирањето ќе се врши на местото каде што е сопрено возилото и ќе се врши контрола на возачот на проценка на полицискиот службеник. Тестовите се карактеризираат со висока прецизност. Вакви видови на тестови ќе се употребуваат прв пат. Тестирање се прави и сега со анализа на крв и урина.“

Адвокатот Јанаки Митровски во изјава за Канал 5 вели дека секој возач треба да е совесен во сообраќај бидејќи под дејство на супстанци се јавуваат проблеми со моториката, вниманието и рефлексите, но оценува дека во пракса ќе се јават дилеми во однос на канабисот. Смета дека нема да се разграничува возење под дејство на псхитропни супстанци и супстанци во организмот кои се задржале подолг период.

„Психотропните супстанци за разлика од алкохолот многу подолго се задржуваат во организмот. Конкретно канабисот може и до 30 дена да се задржи. Од повеќе фактори тоа зависи- телесна тежина на управувачот, фрекфенција на конзумација, течности и храна.. Ова во пракса ќе создаде сериозни проблеми. Ова не е кафеанска логика, морам да реагирам на лаичката јавност, не е ова „сакаме да возиме под дејство на психотропни супстанци“ – секој совесен треба да знае дека тоа е за секаква осуда.“

Договорот за набавка Министерството за внатрешни работи го склучи со фирмата Визиомед Скопје, за вкупна сума од околу 5 милиони денари, или 80 илјади евра. Еден тест чини 218 денари, а во спецификациите пишува дека се зема за помалку од една минута, и резултатите се видливи за три до 10 минути. Ќе се детектираат повеќе видови на дроги, како ТХЦ, кокаин, амфетамин, метамфетамин, хероин, екстази и други психотропни супстанци.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Истражниот судија на Основниот суд во Улцињ ѝ одреди мерка притвор до 30 дена на македонската државјанка Сашка С. (46) поради основано сомнение дека сторила кривично дело - убивање и мачење животни и уништување на нивното живеалиште, дознава „Вијести“.

Основното државно обвинителство (ОДТ) претходно ѝ одреди мерка притвор до 72 часа.

„ОДТ Улцињ ѝ одреди мерка притвор на државјанката на Македонија, С. С., до 72 часа и поднесе предлог до Основниот суд во Улцињ за притвор, поради основано сомнение дека сторила кривично дело убивање и мачење животни и уништување на нивното живеалиште, со прегазување и убивање на кучето на неговиот сопственик, раса „шарпланинац“, со патничко возило „Мерцедес“ во близина на булеварот Теута. Ве информираме и дека со одлуката на истражниот судија на Основниот суд во Улцињ на осомничената ѝ е одредена мерка притвор од 30 дена“, се вели во соопштението од ОДТ Улцињ, потпишано од портпаролот Милош Миљаниќ.

Македонската државјанка беше уапсена во петок, 24 јули, попладне, додека се обидуваше да избега од Црна Гора, откако претходно намерно прегази куче со својот автомобил, како што може да се види на снимките објавени на социјалните мрежи и во медиумите.

Управата на полицијата вечерта објави дека полицијата во Улцињ, преземајќи координирани мерки и дејствија, брзо ја идентификувала, лоцирала и, по наредба на државниот обвинител при Одделот за безбедност на Улцињ, ја уапсила С. С. (46), државјанка на Македонија, која со возило прегазила куче во Улцињ и го убила.

„По извршувањето на кривичното дело, таа имала намера да ја напушти територијата на нашата земја, но полицијата ја спречила во тоа“, се вели во соопштението.

Дежурната служба на Одделот за безбедност на Улцињ била известена од сопственикот на убиеното куче околу 15:15 часот во петок дека претходно непознато лице, управувајќи бел Мерцедес со скопски регистарски таблички, намерно го прегазило и убило кучето на улица.

„Полициските службеници веднаш излегоа на местото на настанот. Со преземање оперативни мерки и дејствија, дојдоа до идентитетот на лицето кое го управувало возилото. Веднаш беше започната потрага по лицето, а околу 16:40 часот беше пронајдена и запрена на заедничкиот граничен премин „Сукобин - Муриќани“, во обид да ја напушти нашата земја. Потоа С. С. беше донесена во полициските простории, каде што беше спроведена кривична истрага. За горенаведеното беше известен државниот обвинител во Основното државно обвинителство во Улцињ, кој изјави дека инцидентот содржи суштински елементи на кривично дело убивање и мачење животни и уништување на нивното живеалиште и нареди С. С. да биде лишена од слобода“, соопшти полицијата тогаш. На местото на настанот е спроведена истрага. Според „Вијести“, државјанка на Македонија убила шарпланинец откако го каснала нејзиното куче во Улцињско Поле. Веднаш потоа, таа го блокирала тесниот пат помеѓу два блока згради, плачејќи и барајќи помош за своето милениче.“ Несвесна за претходниот брутален чин, на помош ѝ притрчала работничка од блискиот хотел, В. Б., која го зела ранетото куче во раце и го однела со себе до првата ветеринарна установа.

Меѓутоа, поради сериозноста на повредите и колапсот во сообраќајот, кучето не стигнало до ветеринарната клиника.

„Ќе го направев истото повторно, само да знаев, ќе се обидев да му помогнам на другото несреќно куче. Но, за жал, се чини дека немало начин ниту тој да се спаси. Па, поради нечија невнимателност и неразбирлив став кон животните, умреа две невини кучиња“, изјавила видливо потресена и во солзи В. Б. за „Вијести“ малку подоцна.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Температурните осцилации и наглите промени на времето ги наполнија лекарските амбуланти. Вртоглавици, главоболки, промени на крвниот притисок и влошување на хроничните состојби се најчестите тегоби поради кои граѓаните деновиве бараат медицинска помош. Најпогодени се пациентите со кардиоваскуларни заболувања и повозрасните граѓани, но лекарите забележуваат дека временските промени сè почесто влијаат и кај младите. Хронично болните редовно да ја земаат препишаната терапија, да го следат крвниот притисок и да избегнуваат нагли промени во дневните навики, апелираат лекарите. При појава на посериозни симптоми, како изразена вртоглавица, болка во градите или нагло влошување на состојбата, препораката е навремена консултација со матичниот лекар.

„Тоа се пациенти коишто доста редовно си ја земаат својата хронична терапија. Значи, апел постојано да си ја земаат својата хронична терапија. И секако оние пациенти коишто во денот имаат некаков проблем, корекција на тензијата. Значи, доколку треба повторно да си измери, да се земе додатна терапија, консултација со матичниот. Ние сме барем премногу достапни за пациентите 24 часа и постојано се консултираме, било да се работи за телефон, било да се работи за преглед во амбулантата. Значи, кога нивната здравствена состојба ќе биде влошена, и покрај редовно земената терапија, сепак да се јават кара матичниот доктор.“

Нестабилното време со променливи температури, според прогнозата на УХМР ќе се задржи уште кратко. Од таму најавуваат дека по денешните врнежи и локални нестабилности, во наредните денови ќе следува период на стабилизирање на временските услови.

„Времето денес ќе биде променливо облачно, наместа нестабилно, со повремен дожд и грмежи. Локално процесите ќе бидат во форма на краткотрајно невреме, проследено со силен ветер, електрични празнења и изолирана појава на град. Од утре следува период на сончево, топло и стабилно време, со мала локална облачност. Тој период ќе трае до крајот на неделата.“

Со стабилизирањето на времето се очекува и намалување на ваквите тегоби, но метеочувствителните лица и хронично болните треба и понатаму да бидат внимателни при нови температурни промени. Остануваат препораките за внесување на доволно течности, избегнување директно изложување на сонце во најтоплиот дел од денот и постепено прилагодување при нагли промени на температурата.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.