Македонија

ЕСМ ќе ја обжали одлуката за стопирање на истрагата за мазутот – Мицкоски очекува преразгледување на случајот

Од АД ЕСМ велат не се откажуваат од случајот, чекаат да пристигне решението, по што ќе посегнат по правните механизми кои им се на располагање.

ЕСМ најавува жалба до вишото јавно обвинителство, не се задоволни од образложението на шефот на ОЈО ГОКК Абази и предметната обвинителка Коларевиќ зошто е запрена истрагата за набавката на мазут – предметот тежок 167 милиони евра, во кој тие посочија, не произлегле докази дека опфатените во истрагата ги сториле кривичните дела за кои се сомничеа. Од АД ЕСМ велат не се откажуваат од случајот, чекаат да пристигне решението, по што ќе посегнат по правните механизми кои им се на располагање.

-Следејќи ги информациите објавени во медиумите, правниот тим на Компанијата веќе ги презема сите подготвителни активности да поднесе соодветна жалба, веднаш по официјалното примање на Решението. АД ЕСМ ќе ги искористи сите правни механизми кои ни стојат на располагање за заштита на интересите на компанијата. – АД ЕСМ

Во однос на тоа дали ќе биде преисптината ваквата одлука од страна на републичкиот обвинител - од ОЈО Скопје за Канал 5 велат, ако се поднесе приговор, тогаш ќе постапува Вишото јавно обвинителство.

Реакција имаше и премиерот Мицкоски кој вели дека е шокиран од запирањето на истрагата, а воедно и потврди и дека републичкиот обвинител Ненад Савески, со кој вчера разговарале телефонски, не бил запознаен со ваквата одлука на ОЈО ГОКК, која според Мицкоски, го губи институционалниот кредибилитет на чело со Абази.

-Во текот на вчерашниот ден јас разговарав и со јавниот обвинител Ненад Савески на оваа тема, тој ме информираше дека не бил информиран за оваа одлука на ОЈО ГОКК кое што го води Ислам Абази и претпоставувам дека по вложената жалба од страна на АД ЕСМ, случајот ќе биде преразгледан и вратен на повторно анализирање. - Христијан Мицкоски – Претседател на Влада

Одговори и целосна транспарентност, врз основа на кои факти и аргументи е донесена одлуката за запирање на истрагата што е донесена одлуката, побара и министерот за правда Игор Филков, кој смета дека истата мора итно да биде преиспитана.

На вчерашниот брифинг со новинарите обвинителката Коларевиќ посочи дека во година и половина, бројни испитани сведоци и илјадници прочешлани документи и вештачења, не произлегле докази дека 13те осомничени, меѓу кои и сопственикот на компанијата РКМ – Ратко Капушевски, екс-директорот на ЕСМ, Васко Ковачевски и сопственикот на „Пуцко Петрол“ – Асмир Јахоски, го сториле кривичното дело перење на пари и злоупотреба на јавна набавка за мазут на ТЕЦ Неготино.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Шоу биз

Откриен денот на свадбата на Кристијано и Георгина

Откриено кога се жени светската фудбалска ѕвезда Кристијано Роналдо: Местото на свадбата има посебно значење за него.

Најплатениот светски фудбалер Кристијано Роналдо и неговата долгогодишна свршеница Георгина Родригез треба да стапат во брак следниот викенд, пренесува „Сан“ (The Sun).

Според таблоидот „Сан“, Кристијано Роналдо и Георгина Родригез ќе го кажат судбоносното „да“ следниот викенд.

Повикувајќи се на португалски извори, парот одлучи да ја организира свадбата од соништата на островот Мадеира, поточно во Фуншал – градот каде што славниот Роналдо ја започнал својата фудбалска кариера.

Според локалните медиуми, катедралата во главниот град на островот е веќе резервирана за следната сабота, а свечената церемонија е закажана за 15:00 часот. По црковниот дел, големата прослава треба да продолжи во луксузниот хотел „Савој Палас“.

Роналдо и Георгина инаку се во врска од 2016 година, а се свршија во август минатата година.

Гласините за претстојната свадба дополнително ги поттикна самата Георгина, откако објави интересна фотографија на Инстаграм.

Тагови: Георгина Кристијано Роналдо

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Фудбал

Артета за Винисиус: Арсенал ќе биде многу амбициозен

Предводникот на англискиот фудбалски шампион Арсенал, Микел Артета се осврна на шпекулациите во медиумите за интересот на „топџиите“ за Винисиус Жуниор, изјавувајќи дека клубот ќе биде „многу амбициозен“ на трансфер-пазарот.

Според Goal.com, Арсенал внимателно ја следи ситуацијата со договорот на бразилскиот напаѓач во Реал Мадрид, бидејќи клубот бара засилување од светска класа за својот напад.

Менаџерот на Арсенал беше воздржан кога беше прашан за евентуалното ангажирање на ѕвездата на Реал Мадрид, но испрати јасна порака во врска со намерите на клубот.

По убедливата победа од 4:1 во подготвителниот натпревар против Џирона, Артета нагласи дека лондонскиот тим е подготвен да заземе одлучен пристап во потрагата по нови играчи.

Кога беше директно прашан за ангажирањето на бразилското крило, тој внимателно ги бираше зборовите, но јасно ги изнесе своите цели.

„Активни сме и се обидуваме да го подобриме и развиеме тимот. Тоа е јасно. Очекуваме одредени случувања во наредните недели бидејќи сакаме да напредуваме, исто како и сите други“, рече Артета. „Тоа е очигледно и на пазарот и преку потезите што ги прават нашите ривали – нема само да стоиме и да гледаме. Имаме големи амбиции за она што сакаме да го постигнеме.“ „Разликите се минимални.

Сакаме да бидеме подобри, а нивото на конкуренција ќе расте, па затоа мораме да ја зголемиме конкуренцијата во самиот тим. Мораме да утврдиме што ни недостасува за да стекнеме поголема предност. Тоа е нашиот начин на размислување“, додаде тој.

Оптимизмот на Арсенал произлегува од застојот во преговорите меѓу Винисиус и раководството на Реал Мадрид.

Шпанскиот клуб би можел да биде принуден да го продаде играчот доколку наскоро не се постигне договор, бидејќи постои ризик тој да си замине како слободен играч следното лето.

Тагови: Арсенал Артета Винисиус Жуниор

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Шоу биз

Новата љубов на Никол Кидман?

Мегапопуларната актерка, холивудската ѕвезда Никол Кидман има ново момче ? „Уловена“ во „Ферари“ со американски инвеститор.

Никол Кидман беше фотографирана со инвеститорот Мајкл Рајнштајн, што поттикна шпекулации дека можеби се во врска. Вечерта на 30 јули, 54 годишниот Рајнштајн ја пречека 5 години повозрасната Никол на аеродромот во Лос Анџелес, откако таа пристигна од Њујорк. На фотографиите што се појавија во медиумите, Кидман е прикажана како седи на совозачкото седиште во неговото црно „Ферари“. Таа носеше сиво сако и бела кошула.

Кидман и Рајнштајн првпат беа фотографирани заедно на почетокот на јули во Портофино, Италија. „Пејџ сикс“ (Page Six) тогаш објави фотографии на кои се гледа како тие се дружат на хотелски балкон.

Актерката носеше сатенски топ и здолниште во боја на слонова коска, додека Рајнштајн беше облечен во темноплава поло-маица и шорцеви. „Дејли мејл“ (Daily Mail) исто така ги фотографираше во хотелот „Белмонд Сплендидо“, каде што уживаа во коктели „Аперол шприц“ покрај базенот.

Мајкл Рајнштајн е американски бизнисмен и инвеститор, како и основач и претседател на инвестициската компанија „Реџент“ (Regent), со седиште во Беверли Хилс.

Компанијата инвестира во бизниси од различни сектори, вклучувајќи ги модата, медиумите, технологијата и малопродажбата.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.