На брегот на езерото Ван, тој изгради кралски дворец, кој потсетува на палатата на селџучкиот султан Кеикубад од 13 век. Според турската влада, палатата се наоѓа точно на местото каде Алп Арслан, султанот на Турците Селџуци, подигнал шатор пред битката кај Манзикерт, во која Селџуците ја победиле Византиската империја во 1071 година.

Токму поради годината на битката, палатата на Ердоган ќе има површина од 1.071 квадратни метри. Турските медиуми известуваат дека изградбата досега проголтала 14 милиони евра, иако турската влада првично планирала трошоци од 3,5 милиони. Според истите тврдења, градежниот претприемач е училишен колега на Ердоган.

Уставниот суд ја запре изградбата на палатата пред една година, бидејќи го спречува јавниот пристап до крајбрежјето, но владата ја заобиколи пресудата со измена на законот. „Тие можат да стојат на глава, но палатата ќе се гради“, пркосно одговори Ердоган.

Во август, Ердоган одржа говор во Ахлат на брегот на езерото Ван на годишнината од битката кај Манзикерт. Потоа се упати кон блиската палата и симболично таму ја помина ноќта.

„Поради алчноста на еден човек, бреговите на езерото Ван се жртвувани за профит“, рече пратеникот од Републиканската народна партија, Гулизар Бисер Карача, во турскиот парламент, додавајќи: „Додека милиони наши граѓани се борат со економската криза, еден човек ќе си дозволува замок по замок. "

Сепак, ваквата критика не покажува никакво влијание врз владејачката Партија на правдата и развојот на Ердоган. Заменик-претседателот на парламентарниот клуб на владејачката партија, Кахит Озкан, одговори: „За нас, оваа зграда е дом на целата нација“.

Покрај оваа резиденција, Ердоган гради и летна резиденција во близина на Мармарис на медитеранскиот брег. Според извештаите на турските медиуми, овој проект е исто така екстремно скап и не ги зема предвид еколошките стандарди. Палатата со 300 соби досега чинела 37 милиони евра. Исечени се 50 000 дрвја при изградбата.

Друга раскошна палата е изградена во 2014 година. Таа е официјалната резиденција на Ердоган во Анкара. Чинела половина милијарда евра и е поставена среде природно подрачје кое е заштитено со закон. И тогаш опозицијата жестоко ја критикуваше градбата, но сето тоа беше залудно.

Политиката на сеќавање на Ердоган е исто така под критика, ставајќи го османлиското наследство пред турската република и нејзиниот основач, Кемал Ататурк.

Раскошните палати на Ердоган, како и многу други градежни проекти во последниве години значително се разликуваат од типичните монументални градби од времето по основањето на републиката во 1923 година. Тие се јасен архитектонски наклон кон селџучко-османлиското минато.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.