Епидемијата се уште во полн ек, потребно е поригорозно спроведување на мерките

Последниот здравствен билтен за изминатите 24 часа, со направени 665 тестирања, регистрира 90 нови случаи со Ковид-19, најмногу во: Скопје-36, следат Охрид со 13 и Струга со 10 новодијагностицирани.

Починаа и девет пациенти, а оздравени се 48 лица.

Министерот за здравство Венко Филипче вчера информираше дека според анализите на Комисијата за заразни болести, викендите со недели наназад прават некаква промена на бројот и на тестови и на новодијагностицирани. Во однос на големиот број починати, наведе дека најголемиот број од нив се повозрасни пациенти, односно огромен процент се со поголем број на претходни здравствени хронични состојби.

– Во одделенијата за интензивна нега навистина се се прави за овие пациенти, но, за жал поради тешка форма на болеста имаме ваков број на починати, изјави Филипче.

Повторно апелира за поригорозно спроведување на мерките за спречување на ширењето на коронавирусот Ковид-19, оти смета дека тоа ќе даде резултат.

– Многу настани се случија во изминатиот период по што не се спроведе ниту контрола, ниту санкции и од тука произлегоа нови заразени. Секојдневно сме сведоци дека се организираат настани кои сега се забранети. Сметам дека контролата мора да биде поригорозна, порача Филипче на вчерашната прес-конференција.

Тој потенцира дека мерката со државен карантин е навистина добра и ќе прати сигнал до сите кои не ги почитуваат мерките оти треба да се придржуваат до нив, затоа што, вели, немаме друг механизам во борбата против вирусот. Информира дека во неколку наврати имало состаноци со претставници на МВР на кои се укажало на предизвиците и на проблемите со кои се соочуваат сите институции и од здравствениот систем, и оти сето тоа е сериозен сигнал секаде каде што може и треба поинтензивно да се работи.

– Сметам дека со таква интензивна работа на терен ќе се пушти сериозен сигнал до граѓаните и тие ќе сфатат дека овие мерки мора да се почитуваат, нагласи министерот Филипче.

Тој подвлече дека епидемијата е се уште во полн ек, а состојбата во регионот укажува дека практично во сите земји има пораст на случаите.

– Ова повторно не води до заклучокот дека вирусот е тука, ќе мораме да продолжиме да живееме со него, да се навикнеме на правилата за лична заштита и по тие правила практично ќе се функционира веројатно долг период, не само оваа година, веројатно и следната година, рече Филипче,и воедно, апелираше до политичките партии да ги почитуваат мерките и да бидат пример за граѓаните како се штити здравјето.

На македонските здравствени власти од вчера на располагање за лекување на Ковид – 19 им е и нов лек – Авиган кој што е обезбеден преку итна неповратна помош од Јапонија во партнерство со УНОПС (Канцеларијата за услуги на проекти на Обединетите нации). за лекување на 100 лица. Станува збор за антивирусна терапија што во Јапонија се користел за третман на инфлуенцата во 2014 година и се уште не е одобрен да биде специфичен лек за Ковид-19, но во тек се бројни клинички студии и од искуствата во апликацијата веќе има доста добри резултати во повеќе земји, рече Филипче. Генеричките форми, додаде тој, веќе се одобрени во Русија и во Индија, а се користат и во други земји во светот како офлејбл лек, кој што за да биде дефинитивно потврден потребно е да завршат клиничките студии.

Од Комисијата вчера е донесена одлука за постепено враќање во функција на останатите ЈЗУ и Клиники, односно секаде каде за тоа постојат услови, согласно претходно направени списоци за приоритет на пациентите, чии интервенции биле одложени.

Инаку, Комисијата за заразни болести и препорача на Владата да се отворат казината, автомат клубовите и ФЛТ апаратите во обложувалниците, да профункционира јавниот превоз во Тетово и кон крајот на неделава да се отворат теретаните и фитнес центрите согласно веќе утврдените протоколи. За отворањето на границите, како што рече Филипче,дополнително ќе се разговара денеска. Заради ризик од можна зголемена трансмисија на болеста, оценето е и дека се уште е рано да се отворат градинките и по разгледување на епидемиолошката состојба и бројките, одлуката за тоа ќе се носи понатаму.

Во меѓувреме, МВР вчера соопшти дека 566 лица добиле решенија за изолација, а 178 лица потпишале изјава за самоизолација во изминатото деноноќие. Контролата покажала дека само две лица не ја почитувале мерката за изолација и самоизолација.

Од стапување во сила на уредбата за непочитување на решенијата за изолација и самоизолација од 12.06.2020 до денеска 22.06.2020 година во државен карантин на сопствен трошок спроведени се вкупно 13 лица меѓу кои и еден полициски службеник, а против лицата ќе бидат поднесени и кривични пријави по член 206 од Кривичниот законик на РСМ. Исто така по однос на мерката за неносење лична заштита на лице регистрирани се 707 прекршоци, наведуваат од МВР. /МИА

Ибрахимовиќ: Тешко ми беше да се откажам од фудбалот поради моето его

Поранешниот напаѓач Златан Ибрахимовиќ зборуваше за подкастот на „АБТалкс“ каде што разговараше за неговото пензионирање од фудбалот, неговото враќање во Милан како главен советник на сопственикот на клубот и за смртта на неговиот агент Мино Раиола.

-Добро сум, така ме третира животот. Секако, се повлеков од фудбалот пред повеќе од осум месеци, така што мојот живот сега е поинаков. Прифатив да се откажам од фудбалот, што беше тешка работа поради моето его и начинот на кој се доживував себеси. Мислам дека сум најдобар и сè уште сум таков. Можев да продолжам, но решив да престанам. Зошто? Сакам само добар живот за моето семејство. Сакав да правам работи со моите синови, а пред тоа не беше можно бидејќи имав проблеми со едното колено. Така го прифатив тоа и дојде момент кога си реков: „Во ред е, откажи се и отвори ново поглавје од твојот живот, вели популарниот Ибра.

Потоа, неколку месеци подоцна, го запознава Гери Кардинале, кој го надгледува фондот „РедБрд“ што го купи Милан.

-Ми даде понуда што не можев да ја одбијам. Така почнав да работам со Милан, откако бев во клубот три-четири месеци. Добро се однесуваат со мене таму, морам да признаам. Кога почина мојот агент Мино Раиола, тоа беше голем удар за мене. Многу плачев. Сè уште не е исчезнато чувството, бидејќи спомените постојано ми се враќаат. Скршен сум затоа што многу ми недостига. Секој што го познава знае колку бевме блиски. Да можам би му напишал: „Ми недостигаш“, сподели Ибрахимовиќ. /МИА

Почесна Златна палма за Мерил Стрип на Канскиот филмски фестивал

 Познатата американска актерка Мерил Стрип (74) ќе добие почесна Златна палма за време на церемонијата на отворањето на овогодишниот Меѓународен филмски фестивал во Кан на 14 мај, соопштија денеска организаторите.

Холивудската актерка со рекордни 21 номинација за престижниот Оскар само еднаш била на Канскиот фестивал. Тоа беше пред 35 години кога филмот „Плач во темнината“ во кој играше, доби една од наградите на Канскиот фестивал.

Мерил Стрип освои три Оскари за улогите во филмовите „Крамер против Крамер“ (1980), „Изборот на Софија“ (1983) и „Челичната дама“ во 2012 година.

Актерката се прослави во филмовите „Лов на елени“, „Жената на францускиот поручник“, „Мојата Африка“, „Мостовите на округот Медисон“, „Сомнеж“ и „Заљубување“.

Почесна Златна палма годинава ќе добијат креаторот на серијата „Војна на ѕвездите“, Џорџ Лукас и колективно Студио Гибли на јапонскиот режисер за анимација Хајао Мијазаки.

Канскиот фестивал ќе се одржи од 14 до 25 мај, а за Златната палма се натпреваруваат повеќе од 20 филмови, меѓу кои и новиот филм на Френсис Форд Копола „Мегалополис“. /МИА

ФА го суспендираше Тонали на два месеци

Сандро Тонали беше суспендиран од фудбалот на два месеци. Нему му пресуди Независната регулаторна комисија откако призна дека учествувал во забрането обложување.

Покрај тоа, тој е казнет со 20.000 фунти и предупреден за понатамошно однесување.

Суспензијата е таква што Тонали нема да може да се врати на терените до крајот на сезоната, до кога ќе истече десетмесечната казна што му ја изрече Италијанската фудбалска федерација на 27 октомври 2023 година.

Доколку не го повтори истиот прекршок до крајот на сезоната, нема да мора да ја одлежи оваа двомесечна суспензија.

Фудбалскиот сојуз и Регулаторната комисија оценија дека Тонали соработувал и признал се за што е обвинет „на исклучителен и досега неевидентиран начин“.

Тонали целосно ги признал сите свои прекршоци, а тоа го направил во ситуација кога доказите практично не постоеле.

Тој продолжува да оди на терапија и едукативни програми на кои е должен да присуствува со целосна поддршка од клубот и продолжува да тренира со екипата./МИА

притисни ентер