Иако Кристијано Роналдо неодамна официјално стана првиот милијардер меѓу фудбалерите, неговото богатство изгледа доста скромно во споредба со богатството на Метју Фламини, кое се мери во десетици милијарди евра.

Поранешниот фудбалер на Арсенал и француската репрезентација, Метју Фламини, пред повеќе од една деценија започна бизнис кој му донесе милијарди, а кој нема никаква врска со фудбалот.

Фламини беше познат како фудбалер кој не штеди енергија на теренот, а со години вешто ја криеше својата енергија и начинот на кој размислува надвор од фудбалскиот терен.

Откако ја заврши својата играчка кариера на зелениот терен во 2019 година, Фламини влезе во светот на биохемијата и стана извршен директор на „GFBiochemicals“, компанија која развива одржливи алтернативи на производите базирани на фосилни горива.

Со години, Фламини ги инвестираше парите заработени од фудбалот во научници, инфраструктура, вработени и разни истражувања, со цел да стигне до таканаречената левулинска киселина.

Најинтересниот дел од целата приказна е што никој, дури ни неговите родители, не знаеле за приватниот бизнис на Фламини.

„Соиграчите од Арсенал ќе дознаат кога ќе ги прочитаат весниците, а јас не му ја открив мојата работа дури ни на менаџерот Венгер. Никој, всушност, не знаеше ништо за ова. Мојот партнер е јавно активен, а јас отсекогаш сум работел од сенка“, рече тогаш Фламини, додавајќи: „Не беше лесно затоа што кога ќе започнете нешто такво, трошите многу пари, а има и стрес. Сепак, тоа беше одличен начин да се оддалечам од фудбалот, кој е полн со подеми и падови, па оваа работа ми го разјасни умот и ми донесе големо богатство. Тоа е пазар вреден околу 30 милијарди евра.“

„GFBiochemicals“ е позната по пронајдокот на производство на левулинска киселина, која ги намалува емисиите на CO₂ до 80% во производството на детергенти, а Фламини, заедно со поранешниот соиграч Месут Озил, го развиле хербалниот додаток UNITY.

Според некои извештаи, поранешниот фудбалер има повеќе од 11,5 милијарди евра на сметката, што го прави еден од најбогатите поранешни спортисти во светот.

Инаку, Фламини одигра 243 натпревари за Арсенал и освои два ФА Купа и играше во финалето на Лигата на шампионите, додека беше шампион на Серија А со Милан.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.