Поради бизарна грешка при плаќањето на две кафиња, од нивната сметка биле одземени повеќе од 4.400 долари (3.822 евра), што на крајот ги принудило да откажат долго планирано семејно патување.

Грешка од 4444 долари за две кафиња

Инцидентот се случил во јануари 2023 година, кога Џеси застанал во продавница „Старбакс“ во Талса за да купи ладно американо за себе и фрапучино за неговата сопруга. Сметката била 11,83 долари. Тој платил со картичка и ја избрал опцијата „без бакшиш“ на екранот. Неколку дена подоцна, неговата сопруга Диди се обидела да ја користи истата картичка за да плати во продавница, но трансакцијата била одбиена. Проверувајќи ја состојбата на нивните сметки, откриле шокантен трошок: „Старбакс“ им наплатил бакшиш од 4.444,44 долари.

Двојката, која има четири ќерки, веднаш контактирала со „Старбакс“ за да ја исправат грешката. Џеси тврди дека воопшто не го внел износот на бакшишот. „Не ја одбрав опцијата за бакшиш, но некако огромна сума заврши на сметката“, изјави тој за NBC News во тоа време.

Откажано патување и проблеми со враќањето пари

Откако контактираа со Starbucks, компанијата им вети враќање на парите и им испрати два чека по пошта. Меѓутоа, кога двојката се обиде да ги реализира чековите, тие се покажаа како неважечки. Поради заробените пари и неизвесноста, семејството беше принудено да откаже патување во Чонбури, Тајланд, од каде што потекнува Диди. „Не сакав да патувам на другата страна од светот со илјадници долари блокирани некаде“, објасни Џеси.

Дополнителен проблем беше што авионските билети беа купени без можност за враќање, што создаде уште поголема финансиска загуба за нив.

Случајот е решен по интервенција на полицијата

Очајниот татко на крајот го пријавил случајот во полицијата во Талса. Истрагата откри дека огромниот бакшиш бил додаден „или случајно или поради грешка на уредот“. Во полициското соопштение беше наведено дека детективите не пронајдоа докази за намерна измама од страна на вработениот. „Веќе не го истражуваме случајот бидејќи знаеме дека „Старбакс“ се обидува добронамерно да им врати пари на клиентите“, соопшти полицијата.

По интервенцијата, „Старбакс“ им испрати на двојката нови чекови кои тие успеаја да ги реализираат и конечно да ги вратат парите. Портпаролот на компанијата потврди дека ситуацијата е решена. „Тоа беше несреќна ситуација која е решена. Имаше грешка со бакшишот и работевме на тоа да ја решиме што е можно побрзо. Чековите беа издадени и клиентот ги реализира во готово“, се вели во нивното соопштение.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.