Вчера 17 лица починале од коронавирус во таа земја, додека денес овој број е уште помал - 12 лица. Ова е голем пад на бројот на мртви од претходните денови, особено во споредба со средата кога починаа повеќе од стотина луѓе. Од средата до петокот, повеќе од 90 луѓе умирале во Шведска секој ден, како последица на коронавирусот.
Покрај тоа, е забележано големо намалување на бројот на нови случаи во Шведска. Во неделата се пријавени 466 нови случаи, додека денес има 332 нови случаи. Споредено со неколку дена порано, ова е скоро двојно помалку. Повеќе од 720 нови случаи се пријавени во четврток и петок.
Вкупно 10.151 случаи се пријавени до сега во Шведска и 887 лица починале.
Но , за разлика од поголемиот дел од Европа, Шведска не воведе строг карантин, не затвори училишта, кафулиња, ресторани и барови. На луѓето не им е забрането излегувањето, но се препорачува тие да се изолираат веднаш штом ќе забележат најмали симптоми на коронавирус.
Забрането е собирање на повеќе од 50 лица.
Во соседна Данска, со население од околу 5,8 милиони, коронавирусот е потврден кај 6000 лица, со 260 смртни случаи.
Коронавирусот е потврден кај околу 6300 луѓе во Норвешка, земја со население од 5,4 милиони, а 114 луѓе починале.
Во Финска, со население од околу 5,5 милиони луѓе, потврдени се околу 2600 случаи на инфекција и 42 смртни случаи.
На Исланд, каде што се направени најмногу тестови, коронавирусот е потврден кај 1700 луѓе, а 19 починале.
На најранливите возрасни групи или лица над 70 години им се препорачува да не ги напуштаат своите домови и да го минимизираат социјалниот контакт. Остатокот од населението слободно се движи, а Швеѓаните се надеваат дека помладата и посилна популација ќе развие имунитет и со тоа ќе ја надминат кризата.
Два дена откако Шпанија прогласи карантин на 14 март, Шведска ги советуваше своите граѓани да ги мијат рацете и да останат дома доколку се болни. Десет дена подоцна, граѓаните беа советувани да не создаваат гужва во кафулињата и рестораните, но тие останаа отворени.
„Затворањето на училиштата ќе биде голем удар за здравствениот систем затоа што голем дел од нејзиниот персонал не би можел да дојде на работа, туку ќе мора да остане дома со своите деца. Децата исто така ќе страдаат затоа што нема да можат да одат на училиште, што не е она што го сакаме“, рече шведскиот епидемиолог Андерс Тегнел.
Дописникот на Си-Ен-Ен од Стокхолм изјави дека има многу помалку луѓе на улиците и во метрото и дека е очигледно дека граѓаните ги почитуваат упатствата, но и дека јавната свест варира во голема мера. Додека некои дури и не сакаат да ги бакнуваат своите најблиски, други организираат велигденски ручеци и забави.